बालकृष्ण श्रेष्ठ “पासा”
स्वनिगः देशय् घत्केथेँ खोय् तिरकु च्वंगुपेन् दोखुनुं सुकुम्बासी तु खेउँरा हङन् हतितु ठाकयेउ थिनागु जुयेन् येर हङन् ड्वाक् ड्वाकु आयोग व मन्त्रालय दुपान च्वंगु सही येरिम्वख्वंगु हाकिम पिसिन् च्या त्वङ ठाइँ व निजानये ठाइँकु छेर स्वंके मिखा भाउयेङन् खँ ल्हायेन्च्वङ खोइँदमु ।

स्वनिग देश हत्नसिन् उपत्यका हङन् सिरगु, अझ नस्कन्थेँ येँचके तु हरिमल्नसिन् येँ, यल व ख्वप देश खेउँ । उ देश दुपान दउ खोपेन् (खोला, नदि) येक्कु दमु, गु गुरि हङन् हरिमल्न मनहरा, बागमति, विष्णुमति खोतु मुल खेउँ हङन् ओँसिरगु, तर वय् काँचापेन् घत्केतु दमु । उ हरेक खोय् तिरकु थन्केसि द्यउ द्यगल स्वयेन् घत्के सकम्बासीय् टहरा व छेँपेन् घत्के खोइँ दयेन् येउ दमु ।

ए सुकुम्बासी ट्वालकु घसान दुत ओङन् स्वर्गु हर्स पत्यारतु लगैम्वजु खँङ् खोइँदइफरै । उ ठाइँ दुपान भुखाप ययेन् छेँ बुँ मदउपेन्, छेँ बुँ दुर्पुन् येङन् च्वइँत बास मदउ जुकुन् मखे, ड्वाक् ड्वाकु शहर दुपान खुटोँ नस्टोँ छेँ दउपेनुं सुकुम्बासी जुयेन् च्वंगुपेनुं खोइँदमु ।

महाराजगंजय् शिक्षण अस्पताल लिखनय् सुकुम्बासी ट्वाल, थापाथली पुललान् बल्खुखेन्न ओङ मुलोँकु दउ सुकुम्बासी ट्वाल, बालकुमारी पुललान् पश्चिमखेन्न ओन्न नेकपा एमाले बागमती प्रदेशय् मुल कुठीनाप दउ सुकुम्बासी ट्वाल, शंखमुललान् पश्चिमखेन्नय् सुकुमबासी ट्वाल थिनागु घत्कें सुकुम्बासी बस्तीपेन् नापलरि फरगु । उ दोखुनु ठाइँय् सुकुम्बासीपेन्ये दातिकु सत्नयेतु च्वनहिन् रा नक्कली सुकुम्बासी च्वनहिन् हङन् गुनान् छुट्ट््यारेउ ?

२०७२ दँय् भुखाप्न येँ देश नाप नापं घत्कें ठाइँकु छेँपेन् डुङन्लि आपतकालीन अवस्था जुर, मिपिस्त च्वइँत ठाइँ दम हङन् स्थानीय सरकार व तारागाउँ रिजेन्सी कम्पनीन् चाबहिल चुच्चेपाटी भाटभटेनी हाखेनय् मुलोँन् थातय् खाली जग्गा च्वइँत बिर्जु, आमु ठाइँकुं सोँगर पेँगर छेँ दउपेन् थउ छेँकु बाहालकु बियेन् छेँतु मदउ हङन् नाम च्वके च्वंगुङ् खोइँ दउजु ।

लिबि आँकु च्वंगु पिसिन् दुपान दुपानतु संगठन दके आमुतु जग्गा सुकुम्बासी त बिकेइमल हङन् माफिया पिसिन् चलखेल येरि म्वालेन्लि महानगरपालिका व प्रशासन ययेन् डोजर हायेन्तु लियेन् छोइमल्दन ।

हो इथितु यिनागु तु चलखेल मेबु सुकुम्बासी ट्वाल धुन्दु म्वजुयेउ मखे । खासै छेँ बुँ तु मदउ सुकुम्बासी त न स्थानीय सरकार न म्वाल्गुदमु, न केन्द्रीय सरकार न । उकु यले स्वर्सं माफियाय् तु राज्य चलैजुयेन् च्वंगुु खोइँदयेन् च्वन ।