ज्ये गिथि गिबि येतहिन,

थन्केसि ख्वाल खोंगुपत्तिनुं हतै जिन अनलाइन जव येतगी हँगन्, गिनागु जव ज्येउ हँगन् मिपेन् फस ब्उथें ब्वइम्वालहिन्, तलब भातिचा घत्के क्येङन्लि लोभ लगैजुइरि स्वभाविकतु खेउँ । झन् लिबात्के च्वँगन् ज्ये येकु त घत्के ब्याला (ओभरटाइम ) कु च्वँगन् ज्येयेकु त अझ घत्केतु बिइउरि हङन्लि गुनान् मयेरेउ यिनागु अनिकालय् ब्यालाकु ।

तर उ अनलाइन जब दमु हँगन् सूचना पितकाउपिसिन् गिनागु ज्ये बिटेनै हातिउरि ज्ये ज्येउ हँगन् म्वालेन् ओनहर्स थिखन ज्ये यङ ठाइँ मेबुखेन्न नाप्लङ ठाइँ, आले उलि ढ्याबाय् फाराम भरेरि मल, उलि रि भर्ना शुल्क, उलिरि तालिम म्वधोँत्टुल्के हँगन् कस्ती स्वयेनुं चाकके खँलायेन् आमु ठाइँलान् तु पित येइतु मायाउ ख ल्हायेन् आशा व भरोसा क्येङन् ज्येकु तइ म्म्वालहिन् ।

आनागु जागीर नकेइ हँगन् सामाजिक सञ्जालकु येउ येक्कु दमु, तर गुलिरि आनागु ज्ये ल्यात्केउ मिपे अफिस तु दर्ता म्वजु खोइँदमु,यदि दर्तातु जुजुर्सं सम्पर्क येकु मिय् नामकु आमु कम्पनीय् अफिसकु दउ प्यान नं. व सरकारी निकायलान् प्रमाणित जु खोइँमद । जिल्ला प्रशासनमु दर्ता जुये वा प्रमाणपत्र दइमल्गु आनागु मद ।

उ थिगुर तर्क जुर हर्स मेबु सामाजिक सञ्जालकु मिफोंगु पिसिन् कमिशनय् लोभ क्येङन् तलब घत्के बि हङन् नागरिकता, योग्यतय् भ्वँरपेन् दोखुनु कायेन् ढ्याबाङ् हाउ हतहिन् तर हङथेँ ज्ये गुल्पनुं म्वजु ।

यिनागु ज्ये खँकु पुलिसय् ड्वाकु ड्वाकु तहकु च्वंगुपेङ् ल्हाहादउजिन हङन थुकेइमल्गु दमु ।हातिङ् जुयेन् नाप्पदउ पुलिस चौकीकु ओँगन् हत्चु हर्स, यिस्तवा आनागु लगैम्वजु आमु कम्पनी वा बाँलकु तु खेउँ, ज्ये येरि मन मदर्स मयेर्स जिर, हात्त रिपोर्ट बिमल हङन् लिपुल्के छुसारहिन् ।

थिता खँरि घत्केङ् ख्याल येरिमल्गु हाति हर्स यदि गुं कम्पनीन् हातिं ज्येय् आश क्येँगन् विज्ञापन बिर्जुहर्स सोमा पेमा थउतु साङतपेन् ओङन् बाँलस्के खँ थुयेन् जुकुन् लिङार्स बाँलकु जुयेउ हङ इसि राय दमु ।

ज्ये मदउ पेन् सरकार त दोष बियेन् रोजगारी मबिउ हँगन् भट्टी होटलकु च्वँगन् मेपिस्त ख्याङन् , त्याङन् अझ लत हर्सं बामलकु ज्येकु ज्याङनुङ् लिङारहिन् ।

आले लूँडो म्येथइरि, गाँजा म्वालेन् त्वइँरि ज्ये येङन् च्वंगु पिसिन् बाँलकु थउ त गकु जिउ खाले ज्ये नापलर्सं मयेत्हिन् ।
उक्न पट्टि सरकार बल्लतल्ल थिगुर कम्पनी, बैंक, सँस्था प्रोजेक्टकु जागीरय् विज्ञापन बियेन् ढ्याबा ग्वार्मूनहिन् आले खुल्हा नस्ल्हाटुल्के निर कायेन् च्वनहिन , आले गिथियेङन् तायें रोजगारी ? हाबि हाबि कल कारखाना दउ जु, रहरनं ज्ये येरित अोंगुतन् जु । थन्केसि वा आमुङ मद आले हाति ज्येयेरेउ ले हङन् उल्टै ख्याङन् छुसायेउ हङन् घ्यारिमल्गु ब्याला येर ।