Nov 14 2026 | २०८३, कार्तिक २८, गते
२०८३, कार्तिक २८ गते
Nov 14 2026 | २०८३, कार्तिक २८, गते
नेपाल सम्वत् ११४७, कछलाथ्वः ५, पञ्चमी (२८ कार्तिक २०८३, १४ नोभेम्वर, २०२६) शनिवार, बाँपिझ्याला । छठ पर्वको अवसरमा काठमाडौंका गौरीघाट र कमलपोखरी झिलिमिली बनेका छन् । छठ पूजाका लागि दुवै स्थानमा घाट सजावट, सरसफाइ तथा आवश्यक व्यवस्थापनका काम अन्तिम चरणमा पुगेका छन् ।
छठ पर्वलाई लक्षित गर्दै व्रतालु तथा श्रद्धालु भक्तजनलाई सहज र व्यवस्थित रूपमा पूजा गर्ने वातावरण निर्माण गर्न नदी तथा पोखरी किनारको सरसफाइ गरिएको छ । साथै, घाट परिसरमा आकर्षक रंगीन बत्ती जडान गर्नुका साथै सूर्यलाई अर्घ्य दिने स्थान र पूजा सामग्री राख्ने ठाउँसमेत व्यवस्थित पारिएको छ ।
छठ पर्वमा अस्ताउँदो र उदाउँदो सूर्यलाई अर्घ्य दिएर सूर्यदेव तथा छठी माताको पूजा आराधना गर्ने धार्मिक परम्परा रहेको छ । चार दिनसम्म विधिपूर्वक मनाइने यस पर्वमा व्रतालुहरूले श्रद्धा, निष्ठा र पवित्रताका साथ विभिन्न धार्मिक अनुष्ठान सम्पन्न गर्छन् ।
पर्वको मुख्य दिन आइतबार साँझ व्रतालुहरूले गौरीघाट र कमलपोखरीलगायतका जलाशयमा पुगेर अस्ताउँदो सूर्यलाई अर्घ्य अर्पण गर्नेछन् । त्यसपछि सोमबार बिहान उदाउँदो सूर्यलाई अर्घ्य दिएसँगै यस वर्षको छठ पर्व समापन हुनेछ ।
छठ पर्वका लागि गरिएको आकर्षक सजावट र व्यवस्थापनले गौरीघाट तथा कमलपोखरी क्षेत्रलाई थप आकर्षक बनाएको छ । पर्व मनाउन आउने व्रतालु तथा भक्तजनको सुविधालाई ध्यानमा राख्दै आयोजक तथा सम्बन्धित निकायले आवश्यक तयारीलाई अन्तिम रूप दिइरहेका छन् ।
१९९७–०७७–०७८
© 2026 All right reserved to bampijhyala.com | Site By : Sobij
