Aug 19 2026 | २०८३, भाद्र ३ गते
२०८३, भाद्र ३ गते
Aug 19 2026 | २०८३, भाद्र ३ गते
नेपाल सम्वत् ११४६, गुंल्लाथ्वः १ प्रतिपदा (२८ साउन, २०८३, १३ अगष्ठ २०२६) बिहीबार, बाँपिझ्याला । पत्रकार तथा जनआस्था साप्ताहिकका प्रकाशक किशोर श्रेष्ठविरुद्ध जिल्ला अदालत काठमाडौंले अनुसन्धानका लागि तीन दिनको म्याद थप गर्न अनुमति दिएको छ। श्रेष्ठलाई प्रहरीले बुधबार साँझ ललितपुरको कुसुन्तीस्थित निवास नजिकबाट पक्राउ गरेको थियो।
श्रेष्ठविरुद्ध वैयक्तिक गोपनीयतासम्बन्धी ऐन, २०७५ अन्तर्गतको कसुर गरेको आरोपमा उजुरी परेको प्रहरीले जनाएको छ। सोही उजुरीका आधारमा प्रहरीले काठमाडौं जिल्ला अदालतबाट पक्राउ अनुमति लिएर उनलाई नियन्त्रणमा लिएको हो।
पक्राउपछि श्रेष्ठलाई काठमाडौं जिल्ला प्रहरी परिसरमा राखिएको थियो। बिहीबार अनुसन्धानका लागि म्याद थप गर्नुअघि उनलाई जिल्ला सरकारी वकिलको कार्यालयमा उपस्थित गराइएको थियो। त्यसपछि प्रहरीले उनलाई काठमाडौं जिल्ला अदालतमा उपस्थित गराएको हो।
यसअघि श्रेष्ठलाई हतकडी लगाएर अदालत लगिएको विवरणसमेत सार्वजनिक भएको छ।
श्रेष्ठ पक्राउ परेपछि नेपाल पत्रकार महासंघले विरोध जनाएको छ। महासंघले काठमाडौं प्रहरी परिसर, भद्रकाली अगाडि धर्ना दिँदै पत्रकारलाई पक्राउ गरी अनुसन्धान गर्ने क्रममा प्रेस तथा अभिव्यक्ति स्वतन्त्रताको संवेदनशीलतालाई ध्यान दिनुपर्ने बताएको छ। धर्नाका क्रममा पत्रकार र प्रहरीबीच केहीबेर धकेलाधकेलसमेत भएको जनाइएको छ।
त्यस्तै, विभिन्न सञ्चारसम्बद्ध संघ–संस्थाले पनि श्रेष्ठको पक्राउप्रति असन्तुष्टि जनाउँदै उनको रिहाइको माग गरेका छन्।
तीन दिनको म्याद थपिएसँगै प्रहरीले अब श्रेष्ठमाथि लगाइएको आरोपसँग सम्बन्धित विषयमा थप अनुसन्धान गर्न पाउनेछ। अदालतले म्याद थप गर्नु आरोप प्रमाणित भएको निर्णय भने होइन; अनुसन्धानका क्रममा प्राप्त प्रमाण र बयानका आधारमा प्रहरीले थप कानुनी प्रक्रिया अघि बढाउनेछ।
१९९७–०७७–०७८
© 2026 All right reserved to bampijhyala.com | Site By : Sobij
