नेपाल सम्वत् ११४६, दिल्लाथ्वः४ चौठी (२ साउन, २०८३, १८ जुलाई, २०२६) शनिवार, बाँपिझ्याला । दोलखा जिल्लाको भीमेश्वर नगरपालिका–२ डोक्थली निवासी अन्दाजी ५० वर्षीय भक्तबहादुर थामीको विषालु सर्पको टोकाइबाट मृत्यु भएको छ। शुक्रबार राति आफ्नै घरमा सर्पले टोकेपछि उपचारका लागि अस्पताल लैजाँदै गर्दा बाटोमै उहाँको निधन भएको हो।

प्राप्त जानकारीअनुसार शुक्रबार राति करिब ९ बजेको समयमा थामी आफ्नै निवासमा रहेका बेला विषालु सर्पले टोकेको थियो। सर्पले टोकेपछि उहाँको स्वास्थ्य अवस्था अचानक बिग्रिएपछि परिवारका सदस्य र स्थानीयवासीले तत्काल उद्धार गरी उपचारका लागि अस्पतालतर्फ लगेका थिए। तर अस्पताल पुग्नुअघि नै बाटोमै उहाँको मृत्यु भएको पारिवारिक स्रोतले जनाएको छ।

मृतकका ज्वाइँ मिलन थामीका अनुसार सर्पदंश भएको थाहा पाएलगत्तै प्राथमिक उपचारको व्यवस्था गर्दै अस्पताल पुर्‍याउने प्रयास गरिएको थियो। यद्यपि विषको प्रभाव तीव्र भएका कारण उपचार केन्द्र पुग्नुअघि नै उहाँले अन्तिम सास फेर्नुभएको हो।

यस दुःखद घटनापछि डोक्थली क्षेत्र शोकमा डुबेको छ। स्थानीयवासी, आफन्त तथा शुभेच्छुकहरूले थामीको असामयिक निधनप्रति गहिरो दुःख व्यक्त गर्दै शोकसन्तप्त परिवारप्रति समवेदना प्रकट गरेका छन्।

वर्षायाम सुरु भएसँगै सर्पको जोखिम बढ्ने भएकाले घर–आँगन, गोठ, खेतबारी तथा झाडी भएको क्षेत्रमा काम गर्दा विशेष सावधानी अपनाउन स्थानीयले आग्रह गरेका छन्। रातिको समयमा टर्च वा पर्याप्त उज्यालोको प्रयोग गर्ने, घर वरपर झाडी सफा राख्ने तथा सर्प देखिएमा आफैं नियन्त्रण गर्ने प्रयास नगरी सम्बन्धित निकायलाई खबर गर्नसमेत सुझाव दिइएको छ।

स्थानीयवासीले ग्रामीण क्षेत्रमा सर्पदंशका घटना बारम्बार भइरहे पनि समयमै उपचार सेवा र विषप्रतिरोधी औषधि (एन्टिभेनम) सहज रूपमा उपलब्ध नहुँदा ज्यान गुमाउनुपर्ने अवस्था दोहोरिने गरेको बताएका छन्। उनीहरूले ग्रामीण अस्पताल तथा स्वास्थ्य संस्थामा सर्पदंश उपचार सेवा थप प्रभावकारी बनाउन, आवश्यक औषधि र दक्ष स्वास्थ्यकर्मीको व्यवस्था गर्न सम्बन्धित निकायको ध्यानाकर्षण गराएका छन्।

घटनाबारे आवश्यक कानुनी तथा प्रशासनिक प्रक्रिया सम्बन्धित निकायले अघि बढाइरहेको जनाइएको छ।