Aug 20 2026 | २०८३, भाद्र ४ गते
२०८३, भाद्र ४ गते
Aug 20 2026 | २०८३, भाद्र ४ गते
नेपाल सम्वत् ११४६, बछलागाः ११ एकादशी (३० बैशाख, २०८३, १३ मे, २०२६) बुधबार, बाँपिझ्याला । श्रेयासी जिरेल ले शैक्षिक सत्र २०८२ को माध्यमिक शिक्षा परीक्षा (एसईई) मा ३.९५ जिपीए प्राप्त गर्दै जिरी नगरपालिका भरिकै उत्कृष्ट विद्यार्थी बन्न सफल भएकी छन् । उनको नतिजाले व्यक्तिगत सफलता मात्र होइन, नगरको शैक्षिक क्षेत्रमा पनि नयाँ उत्साह थपेको छ ।
श्रेयासी जेम एकेडेमी की छात्रा हुन् । यस विद्यालयले यस वर्ष उत्कृष्ट शैक्षिक गुणस्तर प्रस्तुत गरेको छ । विद्यालयबाट एसईई परीक्षामा सहभागी १२ विद्यार्थीमध्ये १० जना उत्तीर्ण भएका छन् । तर सबैभन्दा बढी चर्चा श्रेयासीको नतिजाले पाएको छ, किनकि उनले नगरमै सर्वाधिक जिपीए हासिल गरेकी हुन् ।
उनको यो उपलब्धि आकस्मिक होइन । श्रेयासी यसअघि कक्षा ८ को आधारभूत तह परीक्षा (बी.एल.ई) मा पनि नगर प्रथम भएकी थिइन् । लगातार दुई महत्वपूर्ण परीक्षामा उत्कृष्ट प्रदर्शन गर्नुले उनको मेहनत, अनुशासन र अध्ययनप्रतिको प्रतिबद्धता स्पष्ट देखाउँछ ।
परिवार, शिक्षक र विद्यालय प्रशासनले श्रेयासीको सफलतालाई नगरकै गौरवको रूपमा लिएका छन् । विद्यालयका शिक्षकहरूका अनुसार उनी सुरुदेखि नै अध्ययनमा लगनशील, नियमित र जिज्ञासु विद्यार्थीका रूपमा परिचित थिइन् । कक्षाकोठामा सक्रिय सहभागिता र समय व्यवस्थापन उनको सफलताको मुख्य आधार बनेको बताइन्छ ।
यस वर्ष जिरी नगरपालिका मा कुल १३१ विद्यार्थी एसईई परीक्षामा सहभागी भएका थिए । तीमध्ये ८७ जना उत्तीर्ण भएका छन् भने नगरको औसत उत्तीर्ण प्रतिशत ६६.४१ रहेको छ । यस्तो अवस्थामा श्रेयासीले हासिल गरेको ३.९५ जिपीएलाई अझ विशेष उपलब्धिका रूपमा हेरिएको छ ।
श्रेयासीको सफलताले जिरी क्षेत्रका अन्य विद्यार्थीलाई पनि प्रेरणा दिएको छ । ग्रामीण क्षेत्रबाट पनि मेहनत र निरन्तर अभ्यासद्वारा उत्कृष्ट नतिजा सम्भव हुन्छ भन्ने उदाहरण उनले प्रस्तुत गरेकी छन् ।
१९९७–०७७–०७८
© 2026 All right reserved to bampijhyala.com | Site By : Sobij
