Aug 19 2026 | २०८३, भाद्र ३ गते
२०८३, भाद्र ३ गते
Aug 19 2026 | २०८३, भाद्र ३ गते
नेपाल सम्वत् ११४६, बछलाथ्वः १४ पूर्णीमा (१८ बैशाख, २०८३, १ मे, २०२६) शुक्रबार, बाँपिझ्याला । अभिनेता रितेश देशमुखद्वारा निर्देशित र अभिनीत बहुप्रतिक्षित फिल्म ‘राजा शिवाजी’ आजदेखि प्रदर्शनमा आएको छ। ऐतिहासिक पृष्ठभूमिमा आधारित यस फिल्ममा बलिउड सुपरस्टार सलमान खानले विशेष भूमिका निभाएका छन्। निर्माण पक्षका अनुसार, सलमानको भूमिका फिल्मको कथाको लागि अत्यन्तै महत्त्वपूर्ण छ, र उनको बिना कथा अधुरो हुने थियो।
फिल्ममा सलमान खानले मराठा साम्राज्यका प्रख्यात योद्धा जीवा माहाला (जीवाजी महाले) को भूमिका निभाएका छन्। इतिहासमा जीवाजी महाले छत्रपति शिवाजी महाराजका अत्यन्तै वफादार र साहसी अङ्गरक्षक थिए र एक पटक शिवाजी महाराजको ज्यान बचाउन महत्त्वपूर्ण भूमिका खेलेका थिए। फिल्ममा सलमानलाई बलशाली र वीर योद्धाको रूपमा देखाइएको छ, जसले दर्शकको मन जित्ने अपेक्षा गरिएको छ।
‘राजा शिवाजी’ मराठी र हिन्दी दुवै भाषामा रिलिज भएको छ। रितेश देशमुख र सलमान खानका अलावा फिल्ममा संजय दत्त, अभिषेक बच्चन, महेश मांजरेकर, सचिन खेडेकर, भाग्यश्री, फरदीन खान, अमोल गुप्ते, विद्या बालन र बोमन इरानी जस्ता चर्चित कलाकारको अभिनय छ।
फिल्मले भारतका महान् योद्धा छत्रपति शिवाजी महाराजको जीवनलाई पर्दामा उतार्छ। रितेश देशमुखले स्वयम् शिवाजी महाराजको मुख्य भूमिका निभाएका छन्। फिल्मले देखाउँछ कि कसरी शिवाजी महाराजले मुगल साम्राज्य विरुद्ध लडेर ‘स्वराज्य’को जग बसाए। फिल्मको एक्शन र VFX दृश्यहरू दर्शकबीच चर्चा बटुल्दै छन्। शिवाजी महाराजको वीरता र उनलाई साथ दिने वीर योद्धाहरूको गाथा पर्दामा हेर्न दर्शकमा ठूलो उत्साह देखिएको छ।
१९९७–०७७–०७८
© 2026 All right reserved to bampijhyala.com | Site By : Sobij
