Aug 21 2026 | २०८३, भाद्र ५ गते
२०८३, भाद्र ५ गते
Aug 21 2026 | २०८३, भाद्र ५ गते
नेपाल सम्वत् ११४६, चिल्लागाः १५ चतुर्दशी (५ चैत्र, २०८२, १९ मार्च, २०२६) बिहीबार, बाँपिझ्याला । प्रतिनिधिसभा निर्वाचनमा अपेक्षाअनुसार नतिजा नआएपछि नेपाल कम्युनिस्ट पार्टी (नेकपा) भित्र संगठनात्मक समीक्षा र पुनर्संरचनाको बहस तीव्र बनेको छ। पार्टी नेतृत्वले छिट्टै सचिवालय बैठक बोलाउने तयारी गरेको जनाएको छ।
निर्वाचनमा पार्टी १७ सिटमा सीमित भएपछि आन्तरिक रूपमा असन्तुष्टि बढेको छ। विशेषगरी नेपाल कम्युनिस्ट पार्टी (माओवादी केन्द्र) सहितका वाम घटकहरूबीच तालमेल र एकताका प्रयास भए पनि अपेक्षित सफलता हासिल हुन नसक्दा नेतृत्वमाथि प्रश्न उठ्न थालेका छन्।
पार्टी स्रोतका अनुसार अब बस्ने सचिवालय बैठकमा चुनावी परिणामको गहिरो समीक्षा गरिनेछ। संगठनको संरचना किन कमजोर बन्यो, जनमत किन जोगाउन सकिएन, र निर्वाचन रणनीतिमा कहाँ कमजोरी रह्यो भन्ने विषयमा विस्तृत छलफल हुने तयारी छ। साथै, पार्टीभित्र विचारधारात्मक स्पष्टता, नेतृत्व शैली र कार्यदिशाबारे पनि आत्मसमीक्षा गरिने बताइएको छ।
यसैबीच, नेकपाले आगामी असार महिनासम्म महाधिवेशन गर्ने प्रारम्भिक तयारी गरेको छ। महाधिवेशनलाई संगठन सुदृढीकरण, नयाँ नेतृत्व विकास र भविष्यको राजनीतिक दिशा तय गर्ने महत्वपूर्ण अवसरका रूपमा हेरिएको छ।
पार्टीभित्र बढ्दो दबाबका बीच अबको बैठकले लिने निर्णयहरूले नेकपाको आगामी रणनीति र वाम राजनीतिको दिशा निर्धारणमा महत्वपूर्ण भूमिका खेल्ने अपेक्षा गरिएको छ।
१९९७–०७७–०७८
© 2026 All right reserved to bampijhyala.com | Site By : Sobij
