Aug 20 2026 | २०८३, भाद्र ४ गते
२०८३, भाद्र ४ गते
Aug 20 2026 | २०८३, भाद्र ४ गते
नेपाल सम्वत् ११४६, कछलागाः १, प्रतिपदा (२० कार्तिक, २०८२, ६ नोभेम्वर, २०२५) बिहीबार, बाँपिझ्याला । ललितपुर महानगरपालिकालाई युनेस्कोले संगीतको सिर्जनात्मक सहर घोषणा गरेको छ।
महानगरले आज बिहीबार पत्रकार सम्मेलन गरी उक्त जानकारी दिएको हो। महानगरले संगीतको माध्यमबाट नगरवासीलाई रोजगारीको नयाँ अवसर सिर्जना गर्नसक्ने महशुस गरी संगीतको विधामा परम्परागत संगीतको संरक्षण गर्दै समकालीन संगीतलाई युनेस्को सिर्जनात्मक सहरहरूको सञ्जालको सदस्यताका लागि पहल गरेको थियो।
गत अक्टोबर ३१ मा विश्व शहर दिवसको अवसर पारेर ललितपुर महानगरलाई युनेस्कोले संगीतको सिर्जनात्मक सहर घोषणा गरेको गरिएको महानगरले जनाएको छ।
युनेस्कोबाट संगीत विधामा सदस्यता प्राप्त गरेसँगै महानगरले चार वर्षको लागि संगीतको क्षेत्रका काम गर्ने योजना समेत तयार पारेको छ। महानगरले यस क्षेत्रमा अनुसन्धान तथा शैक्षिक कार्यक्रम गर्ने, आवश्यक नीति निर्माणमा पहलकदमी गर्ने तथा श्रोत तथा साधनको विकास गर्नको लागि ललितपुर सिर्जनात्मक कला केन्द्रको स्थापना गर्ने लगायतका योजना तयार पारेको छ।
महानगर प्रमुख चिरिबाबु महर्जनले युनेस्कोबाट महानगरपालिकालाई संगीतको सहर घोषणा गरेपश्चात परम्परागत, समकालीन तथा आधुनिक संगीतको जगेर्ना गर्दै यस क्षेत्रमा युवाहरूलाई प्राथमिकताका साथ सहभागी गराउने बताए।
संगीतलाई रोजगारी सिर्जनाको माध्यम बनाउन महानगरपालिकालाई महत्वपूर्ण जिम्मेवारी र अवसर प्राप्त भएको उनको भनाई छ। संगीतको माध्यमबाट महानगरको छवि र परिचयलाई अन्तर्राष्ट्रियस्तरमा थप उचो बनाउन सबैको साथ सहयोग हुने उनले बताए।
संस्कृति तथा सिर्जनशीलतालाई दिगो विकासको बाहकको रुपमा अंगिकार गरेका सहरहरूलाई एकै थलोमा ल्याई राष्ट्रिय तथा अन्तराष्ट्रिय लक्ष्य प्राप्तीमा सहयोग गर्ने उद्देश्यले युनेस्कोले २००४ देखि युनेस्को सिर्जनात्मक सहरहरूको सञ्जालको सुरुवात गरेको हो।
हस्तकला तथा लोक कला, डिजाईन, फिल्म, खानपान, साहित्य, मिडिया कला, संगित र वास्तुकला विधामा सञ्जालको सदस्यता लिन सकिन्छ।
१९९७–०७७–०७८
© 2026 All right reserved to bampijhyala.com | Site By : Sobij
