नेपाल सम्वत् ११४५, कौलागा ९, नवमी, (२९ असोज, २०८२, १५ अक्टोबर, २०२५) बुधबार, बाँपिझ्याला । गाजामा मृत बन्धकहरूको शव फिर्ता प्रक्रिया सुस्त भएकोमा इजरायलले युद्धविराम सम्झौताको उल्लंघन भएको आरोप लगाएको छ । मानवीय सहायता बोकेका ट्रकहरूको संख्या आधा घटाउने घोषणा पनि गरेको छ ।

यसअघि इजरायल र हमासबीच जारी युद्धविरामलाई लिएर आशाको किरण देखिएको थियो । संयुक्त राष्ट्रसंघको मानवीय सहायता शाखाका प्रवक्ता ओल्गा चेरेवकोले आफूलाई गाजामा मानवीय सहायता पु‍‍र्‍याउने जिम्मा लिएको इजरायली सैन्य एजेन्सीबाट यो कटौतीको जानकारी दिइएको बताइन् ।

जीवित बन्धकहरू सबै फिर्ता गरिए पनि हमासले अझै फिर्ता नगरेका २० जना मृत बन्धकहरूको शवलाई लिएर हमास र इजरायली सरकार दुवैमाथि दबाब बढिरहेको बताइएको छ ।

मंगलबार जारी विज्ञप्तिमा इजरायल रक्षा बल (आईडीएफ) ले भन्यो, “हमासले सम्झौताअनुसार आफ्नो जिम्मेवारी पूरा गरी सबै बन्धकहरूलाई उनीहरूको परिवार र उचित अन्त्येष्टिका लागि फिर्ता गर्न आवश्यक प्रयास गर्नुपर्छ ।” 

इजरायलका रक्षा मन्त्रीले प्यालेस्टिनी सशस्त्र समूहलाई चेतावनी दिँदै भने, “कुनै पनि ढिलाइ वा जानाजानी बेवास्तालाई सम्झौताको गम्भीर उल्लंघन मानिनेछ र त्यसअनुसार जवाफ दिइनेछ ।” 

इजरायली अधिकारीहरूले हमासले बन्धकहरूको शव हस्तान्तरण गर्न नसकेर युद्धविराम सम्झौता उल्लंघन गरेकाले सहायता अवरोध सहित इजिप्टसँगको राफाह सीमा नाका खोल्ने योजनामा ढिलाइ गर्ने निर्णय गरिएको बताए ।

हमासले भने मृत बन्धकहरूको शव पत्ता लगाउन गाह्रो भइरहेको प्रतिक्रिया दिएको छ ।

हमासद्वारा थप चार बन्धकको शव फिर्ता
इजरायल रक्षा बल (आईडीएफ)ले हमासले मृत्यु भइसकेका थप चार बन्धकहरूको शव फिर्ता गरेको जनाएको छ । रेड क्रसले मंगलबार राति ती शवहरूलाई कफिनमा राखेर इजरायली सेनालाई हस्तान्तरण गरेको थियो ।

हस्तान्तरण हुनुअघि इजरायलले हमासले मृत्यु भएका सबै २८ बन्धकहरूको शव फिर्ता नगरेसम्म गाजामा राहत सामग्रीको आपूर्ति अवरुद्ध गरिने चेतावनी दिएको थियो । प्यालेस्टिनी सशस्त्र समूहले सोमबार २० जना जीवित र चार जना मृत बन्धकहरूलाई फिर्ता गरेको थियो ।

रेड क्रसले मंगलबार जारी विज्ञप्तिमा इजरायलमा रहेका ४५ जना मृत प्यालेस्टिनीहरूको शव गाजामा फिर्ता गरिएको जनाएको छ । अमेरिकी राष्ट्रपति डोनाल्ड ट्रम्पको युद्धविराम योजना, जसलाई इजरायल र हमास दुवैले स्वीकार गरेका थिए, त्यसअनुसार सबै ४८ जना बन्धकहरूको हस्तान्तरण सोमबार मध्याह्नभित्र पूरा भइसक्नुपर्ने थियो ।

इजरायली प्रधानमन्त्रीको कार्यालयले रेड क्रसले इजरायली सैन्य अधिकारीहरूलाई चार बन्धकका शव हस्तान्तरण गरेको पुष्टि गरेको छ । यी अवशेषहरूलाई फोरेन्सिक पहिचानका लागि राष्ट्रिय केन्द्रमा पठाइएको छ, जहाँ परिवारहरूलाई जानकारी दिइनेछ ।

यद्यपि, इजरायलको सैन्य एजेन्सी सीओजीएटीले निर्धारित ६०० ट्रकको राहत आपूर्तिमा आधा कटौती गर्ने निर्णय कार्यान्वयन गर्छ वा गर्दैन भन्ने अझै स्पष्ट भएको छैन ।

युद्धविराम सम्झौताअन्तर्गत सबै बन्धकहरूलाई ७२ घण्टाभित्र फिर्ता गरिनुपर्ने थियो । तर, हमासले गाजामा व्यापक विनाश र शव खोज्न कठिनाइका कारण ढिलाइ भइरहेको बताएको छ । एपी