नेपाल सम्वत् ११४४ चौलागा, चतुर्दशी, इनायन्हि (मंगलवार), बैशाखकृष्ण ।

थुनय व्यालाकु छिजिन् थुई मल्गु खँ
भाषा म्वार्स छिजि म्वारेउ, संस्कृती म्वार्स छिजि म्वारेउ, आमु जुयलागिन् उ दोखुनुय छिजिन महत्व थुयन विई मल । सरकार न मेह्गन्नसी बागमती प्रदेश दुपान नेपाल भाषा व तामाङ भाषा त कामकाजी भाषाय रुपकु छ्यालीत घोषणा यत्चु ।

उ जुयलागिन् आउ वत गिथी छ्यालेन हाखेन उईरी हङ ड्वाकु चुनौती दमु । उ नाप नापङ छिजि न थउ थउ ठाँईलान् हातिन फरै आमुन ग्वाहार यरी मल्गु न्हि ययन चोन । व्यला यर तर आमु व्यलाकु व्यालाङ नाप नापङ यर हङ थिगुर आहानदमु । तर आमु व्यलाकु नाप व्यालाङ नाप नाप ययन चोन्गु खँ मोथुर्गु हर्स आमुन छिजित पसितो यरीउरी सिवाय मेवु हातीङ मविउ उ जुयलागिन् व्यला आले व्याला सियन ज्य खँ यरीलौं । उ छिजि लागिन् ड्वाकु महत्वय घडी खेउ ।

छिजि पुस्तापिसिन् त्वार्त ओङ छिजि मा भाषा, संस्कृती, देउ देगल पिस्त गिथी यङन छ्यालीउरी, गिथी यङन संरक्षण यरीउरी हङ खँकु थिठाई चोईलौं सल्लाह यङन हाखेन उईर्लौं । नाप गस फुङन उईलौं । ट्वाकस्यार्स माला तियथे तियन उईलौं । ईथि जुर्स बाँलकु जुयउ उ खँ त दोखुनसेनुङ सिईलौं । छिजि व्यक्तिगत रुपन सोर्गु हर्स गुन सोयन गुन कम मखे थउ थउ ठाँईकु छिजि दोखुनु ड्वाकुतु खेउ ।

तर सामाजि ज्य खँकु आनागु मोजुई फरई, गुनान हाती खँ सिरहिन् आमे खँ खेउ जुकुन हङन विईलौं मेवु हातिङ महरीलौं । थउ त थउ जुकुन ड्वाकु मि महरीलौं, मेवुपिस्न ड्वाकु मि हरीउरी व्यला हाईलौं । हातिङ ज्य खँ जिन मखे छिजिन यङ हङ खँय भावना यरीलौं । उ द्वाल्खाय ड्वाकु रोग जुयन चोन, खायौ सत्य उतु खेङ । वत छिजिन हट्यारीतु मल ।।।

आउ लिवात्के जुर्सङ बागमती प्रदेश सरकार न नेपाल भाषा व तामाङ भाषा त कामकाजीय भाषाय रुपकु हिल्केईरी ज्य खँ चल्केर्जु उकु छिजि लास माचायन छिजि वडा आले नगरपालीकाय ज्यकुठीकु छिजि मा भाषा न चिठ्ठी व च्वय खँपेन चोयन विईरी वानी छ्यालीलौं ।

मुथुन जुकुन छिजि द्वाल्खा पुरान हङन घमण्ड मयरीलौं, वय खेउ खँ हाती खेङ आमे बारेकु अध्ययन अनुसन्धान यरीलौं, साझी ज्य खँकु गुनानुङ सियउरा हङन चुफाहान ब्वरपेन त्यालेन घिके मोचोईलौं । थउ दसीपेन पित हायन म्वाली ख्वाली ज्य खँकु ग्वाहार यरीलौं ।

अझङ नास जुयन चोन्गु हातीङ मोजुनी सिरी सोयन हाखेन बाँलकु ज्य खँ यङन नाम तयन जुकुन सिरीउरी रा ?
साक्षात नामजाउ भिमसेन देउय व्यवस्थापन व स्याहार बाँलस्के यरीलौं । यकुपिस्त ग्वाहार यरी सेईलौं । यत्न यत्न हाती कोतथात व सुधार यरी मल्स नाप चोङन सल्लाह यरीलौं । साझी सम्पत्ती छन व जन हङ भावन मतईलौं । उ दोखुसेय खेउ हङ भावनाय विकास यरीलौं ।

उ न गुन्तङ बाँलकु मयत, मेग छिजिन हाती हायन ययन चोनगु, केसी हाती यङन उईरी आमुजुयलागिन् नाम जुर्सङ बाँलस्के त्वार्त उईलौं । उतु सत् बुद्धि छिजि साक्षात देउ द्वाल्खा भीमसेन देउन थविउ हङन छिजि दोखुनुसेय बाँलकुय लागिन् आशिक फोङन चोनगु ।