नेपाल सम्वत् ११४५, बछलागाः ८ नवमी (७ बैशाख, २०८२, २१ मे, २०२५) बुधबार, बाँपीझ्याला । थनु सोयन ङैदँ हाखेन पित काय द्वाल्खा नेवारी भाषाय् प्याखन “मिसामी” राष्ट्रिय नाचघरकु यउ शनिवारकु न्हिनेसय ३ः३० घडीकु केन्द ओङन चोन् ।

डा.श्याम जोशीन् थउ ल्यास्मा जुएनदिए व्यलाकु चोएनदिए उ प्याखन ङैदँ हाखेन छायाँ परिवारन द्वाल्खा शहरय थाब्न ट्वालय् सेङ हाखेन २०३० दँ कु केङ खेउ । द्वाल्खा नेवारी भाषाय् संरक्षण व स्याहार आले म्वात्के तईत ग्वाहारय लागिन् उ प्याखन त लितङ पित हाय हङ डा.श्याम जोशीय थउ खँ दमु ।

भाजु केदार श्रेष्ठ निर्देशन यङ उ “मिसामी” प्याखन न्युर्योक विश्व विद्यालय आबुदाबीय लागिन् द न्युज प्रालिन् दकेय खेउ । ईथितु डब्बली थिएटर व थिएटर मलन पित केई टेङ खेउ । उ प्याखनकु द्वाल्खाय म्यासमुचापिसिन् ब्व कायन तयन दिएन चोङन दिरहिन् । उ प्याखनकु खुम्ह सोयन गत्केन ब्व कायन तरै ।

द्वाल्खा नेवारी भाषाय विकासक्रम हो वय संरक्षण अभियानकु प्रा. डा. श्याम जोशी, प्रा.डा. हरिदर्शन श्रेष्ठय् उ मिसामी प्याखन पित हाईकु ग्वाहार यङन दिए व्यालाकु ईसि बाँपिझ्याला खलक खुसी चायन चोनगु । ईथितु आउ द्वाल्खा नेवारी भाषालान् मेवु खँकुठी पित यई टेनई झन खुसीय खँ खेउ । भाजु उपेन्द्र प्रधानय सम्पादन आले प्रकाशनकु २०५५ दँनन्सी पित काय बाँपिझ्याला लछिपती हो २०७७ दँनन्सी पित काय बाँपिझ्याला अनलाईन खबरपती, २०६९ दँकु पित काय द्वाल्खा नेपाल भाषाय् खँकुठी न थनु द्वाल्खा नेपाल भाषाय् विकास क्रमकु ग्वाहार यङ सावित जुयन चोन । उ खायौ खँ तर यर्थाथ उतु खेउ ।

भाजु अमरकुमार प्रधानन् द्वाल्खाय् ऐतिहासिक रुपरेखाकु २०३१ दँकु राजकुमारी गुने हङ शिरय खँकु द्वाल्खा नेपाल भाषाय चिय खँ चोयन छिजि द्वाल्खा नेवारी भाषा आले द्वाल्खा मीपे थउ मा भाषा त ब्वरकु दस्तावेजिकरण यङ उतु पहिला खेउ । ईथि जुर्ङ जुङ थनुटुल्ले प्याखन पित यर उ खँकु छिजि दोखुनु द्वाल्खामीपे खुसी चायन भाजुपेन डाक्टर निस्म भाजु श्याम जोशी, भाजु हरिदर्शन श्रेष्ठ तरी सुभाय् विईतु मल । मान तईतु मल ।

ईतिहासकु “मिसामी” प्याखन न मेवु थिगुर दर्खा कोरेत्चु । वय लागिन् चोउ, ब्वकाउ, ग्वाहार यङन दिउ दोखुसेत बाँपिझ्याला, द्वाल्खामी हो ईसिखेन्नलान् बाँलकु थ्वजु हङन भिङ्गु टोनगु । जय द्वाल्खा भीमसिन् देउ ।

थनु टुल्ले द्वाल्खा नेपाल भाषाय विकासक्रम थिताल सोईलौं । ऊ लिङ्गकु क्लिक यरीलौं । https://bampijhyala.com/2020/09/25/437/