छिजि दोखुनु थउ न थउ तु ड्वाकु मि खेउ । गुन सोयन गुन हातीकुङ कम खोईमद । छिजि दोखुनु थउ ठाँईकु सक्षमतु खोईदमु । उ खुसीय खँ व गौरव यरी मल्गु खोईदमु ।

आन्थतीतु दोखुनु द्वाल्खावासी दाजुकिंज, तिताकेहपिसिन् द्वाल्खा दुपान चोन्सङ, द्वाल्खा पिपान चोन्सङ, देश दुपान चोन्सङ, देश पिपान चोन्सङ थउ गच्छे थे हातिन फरगु आमुन ग्वाहार यङन चोनगु । उ बाँलकु व खेउ खँतु खेङ ।

तर हातिङ साझी ज्य खँ यर हर्स छिजि दातीकु कस्कन काउ खँन् सिवाय मेवु हातिङ खँ जुई मफउ उ द्वाल्खा दुपानय थिगुर रोग थिनागु लगई जुयन चोन । उ रोग गिथी यङन लाकेईरी हङन छिजिन थउ थउ ठाँईलान् ग्वाहार यरी मल्गु खोईदमु ।

सन्दर्भ भिमेश्वर देउय बारेकु भीमेश्वर गुठी व्यवस्थापन समितीन फागुण ८ तिथीनन्सी देउकु पूजा यरीउरी सारदाम व विधीकु बात्चा हिल्के चोय खँ (सूचना) पित हायन्ली थनुकेसी सामाजिक सञ्जालकु चोईजिउ, चोईमजिउ नानाथरीय खँपेन पित यउ खोईदमु ।

ईथि सामाजिक सञ्जालकु चोयन ल्वारीउरी ज्य खँ छिजि गुनेङन लागि बाँलकु मखे, वय लागिन् थिठाई चोङन खँ लायन सहमतीकु तु उई मल । हातीङ खँकु ज्य खँ यङन ओन्ङ समस्या यई फरई आम्त नाप चोङन समाधान यरी मल्गु खोईदमु । नकी फेसवुककु छरपरस्त चोयन गुनेङ चरित्र हत्या यकु थिनागु खँपेन चोई मजि हङ जन थउ व्यक्तीगत विचार उकु प्वन्केरगी ।

जिन दोखुसेय समाचारपेन देश दुपान पिपान छोईय लागिन् सम्प्रेषण यतगी तर द्वाल्खाय बाँलकु समचार सम्प्रेषण यरीत गत्केङ ठाकउ महशुष यङन चोनगी । सियउर तायउरा हङन चुफाहान त्यालगु । तर गु खँ न द्वाल्खा व छिजि दाती हानी नोक्सान यकु जुर हर्स आकुरी छिजि दोखुसेनुङ माताय व मसिय सुकाएन न्हुन माहायन चोनगु हात्त ज्यउ ? उ खायउ तर यर्थात खँ उतु खेउ ।

छिजि दोखुनु द्वाल्खाय ल्यास्मापुस्तापेन द्वाल्खाय शुभचिन्तक खेउ । मुचान्नसी आमुतु भीमसेन देउय लाङाकु जन्म जुयन ब्वकु तुलेन मुलेन डिङन चा नर्न नर्न जा नई सेङ ठाँई खेउ । उ मुल खँ त छिजि दोखुसेनुङ लुँओन्केई मल । मेवु खँ छिजि हाखेनय जुजु आले पुस्तापिसिन् गत्केङ ज्य खँ यङन त्वार्त ओङन चोन ।

वय संरक्षण व निरन्तरता विईरी थिगर चुनौती दमु हर्स साझी ज्य खँकु छिजि ल्वाङन जुकुन चोनगु उ मेवु चुनौती दमु ।

उ जुयलागिन् छिजिन् थउ ठाई दकेईत, बाँलस्केईत फेसवुककु खँ प्वन्के मखे, नाप चोङन द्वाल्खा आले साक्षात भीमसेन देउय महिमा बाँलकस्केईत सहमती कायम यरीलौं । उतु दोखुनु सोयन बाँलकु व भिङ्गु खँ जुई फरई । हातिङ ज्य खँपेन हिल्नसिन् गुनुङ बुरी फरई हर्स गुनुङ त्यारी फरई आमु खँ साझी रा व्यक्तिगत रा हङन थुई मल ज्यउ छिजिन् । यउता जुर्सङ द्वाल्खा त बुरी विई मजि उ खँकु थि जुईलौं ।

छिजिके थउ थउ लाहाकु सञ्चारय साधन मोवाईल, कम्प्यूटर, सुत्ता गत्के साधनपेन दुम तर द्वाल्खाय बारेकु गिविङ चोईमजिउ व चोई माबाल्गु खँपेन पित यईत ग्वाहार यङन छिजि चुलाचापेन हिल्के चोनगु रा ? आमु जुयलागिन् उ खँकु विचार यरीलौं, मोवाईल छिजि खेउ विचार छिजि खेउ तर पित उई धोन्गु समचार मेवे लागिन् खेउ । उ खँ बाँलस्के थुई मल्गु आवश्यकता दमु ।

गत्केङ खँपेन छिजिनतु सिरगु आमु जुयलागिन् मेवु खँकु जिन हातिङ सल्लाह मविगी, थिगुरतु खँ हाति हतगी हर्स द्वाल्खाय साझी ज्य खँकु थि जुईलौं । नाप चोङ समस्याय समाधान यरीलौं, सामाजिक सञ्जालकु छरपरस्ट चोयन मेविस्त मङील्केईलौं ।

उ मुल खँ मनकु तयन ज्य खँ यरीलौं हङन जिन दुपान नुगरलान्नसी छिजि दोखुसेत सत्बुद्धि थविउ हङन् भीमसेन देउनाप आशिक फोङन चोनगी ।