बाँपीझ्याला, येँ, ने.सं.११४३ दिल्लागा द्वादशी तिथि शुक्रबार (२०८० असार २९) । नेपाल देशये नेवारपे दोखनु स्वयेन् ड्वाकु राष्ट्रिय मुङ ज्येकुठी नेवाः देय् दबू (नेवार देशये डोबर) न घत्के दन् लिखन थउत नामकु छेँ डोइँरि ल्याखान् थन्हु नेपाल सम्वत् ११४३ दिल्लागा द्वादशी शुक्रबारये न्हि खुन्हु जग स्वारिउरी ज्ये जुर ।

बौद्ध गुरु भाजु नरेश बज्राचार्यज्यू न थन्हुये न्हिखुन्हु छेँ दकेइत जग स्वारिउरी ल्याखान् दोखुनुं स्वयेन् बाँलकु व भिंगु ब्याला (मूहुर्त) सुन्हिये ९ः०० ब्याला ताक्कु दये लागिन् उ ज्ये येरिटेङ खेङ् हङन् नेवारी परम्पराये ल्याखाकुतु तन्त्र साधना येङन् विधिज्याल्के मंगल धून बाजाक ठ्याङन् ब्वँ पूजा येरि धोन्के जग स्वारिउरी ज्ये येङ दउजु । आमु ब्यालाकु नेवार देशये डोबरये मूलमि नाइके भाजु पवित्र वज्राचार्य व नकिन मैजु सुजाता वज्राचार्यज्यू (पवित्र वज्राचार्यये जाहान्) नाप च्वङन् पूजा येङ दउजु ।

थन्हुये ज्ये खँकु नेवार देशये डोबरय संरक्षक भाजु मल्ल के. सुन्दर, जनकवि दुर्गालाल श्रेष्ठ, येँ महानगरपालिकाये क्वमूलमि (उपमेयर) मैजु सुनिता डंगोल, हाबिये मूलमि भाजु विद्यासुन्दर शाक्य, सल्लाहकार पूर्व महान्याधिवक्ता आले बरिष्ठ अधिवक्ता भाजु मुक्ती प्रधान थ्येंगु दउजु ।

केन्द्रीय ज्येकुठी खलकलान् मूलमि नाइके भाजु पवित्र वज्राचार्यज्यू नापनापं येँ देश दुपान च्वंगु दोखुनु पदाधिकारीपेन्, स्वनिग प्रदेशये मूलमि नापं मेबु पदाधिकारीपेन्,येँ जिल्ला ज्येकुठी खलकये मूलमि भाजु धनबहादुर तिमिला, येँ महानगर खलकये मूलमि मैजु शोभा वज्राचार्य महर्जन, यल महानगर खलक, ख्वप नगरपालिका खलक , दोलखा जिल्ला काँचा ज्येकुठी खलकये मूलमि भाजु देवेन्द्र नारायण प्रधान, द्वाल्खा–स्वनिग मञ्च खलकये मूलमि मैजु सकुना श्रेष्ठ नापनापं दोखुनुखलकये पदधिकारीपेन् ये दउजु । आन्थितु ने.दे.द.सिन्धुपाल्चोक तौथलीलान् भाजु दिलिप श्रेष्ठ व साङत, रामेछापलान् अनिल लेकाली व साङतपेन् येउ दउजु ।

थन्हुये ज्येखँये दातिकु तु ने.दे.द.ये छेँ दकेइत येक्कु मिपिन् िढ्याबा दान ग्वाहार बियेङ दोइँदत । आम ब्यालाकु थन्हुजुकुन् गुस्सरदोलतेक ढ्याबा मुङ सिदत । उ ब्यालाकु गुनानुं बैंकये चेक लाछाये दउ हर्स गुनानुं पकका वचन बिये दउजु ।

उ नेवार देशये डोबरये मूल छेँ डोइँत येँ महानगरपालिकान् ओल्तेचाकुं निस्दोलत्यालाख टाका ढ्याबा बिइउरी वचन बियेन् तये खँ सिदत । आन्थितु उ छेँ दकेइरि ल्याखाकु ब्वँ काइतङ् मतिन् झिम्थिस्सरदोल्ननसि ङास्सरटाका टुल्के ग्वाहारबिउपेन् येक्कु पितयेउ खँ इस्त मूल ज्येग्वउमि (छ्यान्जे) सत्यनारायण डंगोल्न ङेङ्केये दमु ।

नेवार देशये डोबरये मूलछेँ दकेइत हाबिन्नसि ज्येखँ ग्वये दर्सं हङ ब्यालाकु ब्वँ (जमिन) नापमलङ लागिन् ठाइँठाइँकु कुठा हिलेन् ल्येयेन् बालकु च्वङन्च्वङ दउजु । उतु ल्याखान् थन्केसि उ संस्थाये मूल ज्येकुठी टेकू होण्डा शोरुमनाप च्वङन् च्वन ।