बाँपीझ्याला, येँ । मदइधोङ्गु गणेशदेवी मानन्धरये नामकु दउ थिगुर ज्यकुठी गणेशदेवी स्मृति प्रतिष्ठान्न ग्वये थिगुर ज्येखँकु नेपालभाषा खेन्न योगदान येङन् च्वंगुपेन् स्वम्हा नामजाउ मिपिस्त थिगुर ज्येखँकु मानेरिउरि ज्ये येङ दमु ।

उ मानेङ ज्येखँकु जनताये लागिन् म्ये हल्गु मि भाजु भृगुराम श्रेष्ठ, दोखुनुस्वयेन् ड्वाकुन्दांगु स्वङ्गु किपाये पत्रकार विजयरत्न अस.बरे व नक्क नक्कये न्हुलु प्रतिभा खेन्नये म्ये हल्गु मि भाजुसिद्धार्थ बज्राचार्यत थिगुर समारोह दुपान ड्वाकु मान मिलैजु सिरपाउ मरुहिटी ब्याङ्क्युट भ्वसछेँकु ल्हाछाये खँ सिदत ।

प्रतिष्ठानये मूलमि भाजु विजयकुमार मानन्धरये सभामूलमिकु स्वङ्केये आमु ज्यखँकु बागमती प्रदेशये सांसद शैलेन्द्रमान बज्राचार्य, नेवाः देय् दबूये मूलमि भाजु पवित्र बज्राचार्य पाउनामिये ल्याखाकु व आले ड्वाकुन्दांगु शिक्षाविद् भाजु हितकरवीर सिंह मूल पाउनामिये ल्याखाकु जायेन्दिउ खोइँदत ।

आमु ज्यखँकु सिद्धार्थ बज्राचार्यत सम्मानपति नापं ङादोल टाकाये प्रतिभा सिरपाउ, विजयरत्न अस.बरेत सम्मानपति नापं झिम्ङादोल टाकाये नेपालभाषाये पत्रकारिता सिरपाउ, व जनगायक भृगुराम श्रेष्ठत सम्मानपति नापं निङादोल टाकाये दीर्घ सम्मान सिरपाउ ल्हाछाये दउजु ।

मदयेन् वंगु गणेशदेवी मानन्धर येँ महानगरपालिका वडा ल्याखा १३ये समाजसेवी दिलबहादुर मानन्धरये कालत (जाहान) खेउँ हर्स आपे कयपेन् प्रा.डा. राजु मानन्धर (अष्ट्रेलिया), राजेश मानन्धर व सज्जु मानन्धर खेउँ । मदउ गणेशदेवी मानन्धर त लुवन्के तइरि ल्याखान्तु प्रतिष्ठान दकेये खेउँ । उ प्रतिष्ठानये खलकपिसिन् सिरपाउ बिइउरि ज्येखँ येरित ज्येग्वउमि (कजि) पवन जोशीत तयेन् परामर्श समिति दकेये खेउँ । आमुतु समितिकु काँचाज्येग्वउमि (क्व–कजि) नगिना जोशी आले ज्येमि (दुज) म्ये लय चिङ्गुमि सुरेन्द्र श्रेष्ठ, म्येहल्गुमि निशा देशार, व पेजथ्री बछिपतिये सम्पादक दर्शनवीर शाक्यत मायाये चिन्न ल्हाछाये दउजु ।

आन्थितु आमु ज्ये खँकु म्येहलेन ज्ये चल्केये आमु ब्यालाकु भृगुराम श्रेष्ठनुं थिपु म्ये ङेङ्केये दउजु । आन्थितु आमु ज्येखँये ल्याखाकु तु जुजुकाजी रञ्जित, निशा देशार व सिद्धार्थ बज्राचार्य नापं मेप्सिनु म्ये हलेन् छुत्केये दउजु । उ तु ज्ये खँकु नेवार म्ये हल्गु खलकये मिपेन् सुरेन्द्र श्रेष्ठ, सबिना माननधर, सुरेन्द्र मानन्धर, राजेन्द्र डंगोल व आमु खलकलान् जनगायक भृगुराम श्रेष्ठ त म्येहल्गु खलकलान् मान बिये खँ सिदत ।