स्याउदाइ ! ज्वजोलपा ! नमस्कार !
भीमसेन द्यउ न दोखुसेतं जय थयेतु कल्याण थयेत् ! दोखुनुं स्वयेन हाखेन छिजि बाँपिझ्याला द्वाल्खा टेलिभिजनकु थपेन् दोखुसेतं लसकुस येङन् थन्हुय् ज्ये ङाकेइत जि बालकृष्ण पासा थपे हाखेन ययेन् च्वनगी ।

दोखुनुं स्वयेन् हाखेन बाँपिझ्याला अनलाइन मिडियम त रस्तायेन् न्येङन्, म्वालेन, स्वयेन् व ब्वङन् थउथउ खँ तयेन्दिउ ड्वाकुन्दांगु मानेरि मल्गुन्नसि चिचा किँजकेहेँ व साङतपिस्त भिंगु टोङन द्वाल्खा भीमसेन देउकु आशिक फोङन इसिनु थन्हुय् ज्ये ङाकेइ टेङ खँ थपिस्त सिकेरगु ।
उ बाँपिझ्याला इसि जुकुन् मखे थपेन् दोखुसे खेउँ । उकु दुपानलान् इसिन् हातिं ज्ये खँ ग्वयेन् पितकार्न दोखुसे राय सल्लाह त नुगरकु तयेन् येरिम्वाले दमु ।

थपे हाखेन उ बाँपिझ्याला द्वाल्खा टेलिभिजन नक्कतिनी हाक्वइँ म्वाल्गु मुचा तु खेउँ ओ त लिङाइ स्येँइत थपे तु ग्वाहार मल । थपिसिन् भरोसा, बल व ज्ञान मबिगर्गु हर्स ईसि गिथि थाट्वँ गयेन् थात उइँ फयेउले ? उ खँ थप्सिन् सिके काइसिन् । आउ मेबु खँ बाँपिझ्याला अनलाइन पति पितकार्न थप्सिन् गुलि माया बिर्गु आमु आड न तु थन्हु छिजिन् टेलिभिजन टुल्के टेक्काइफयेन् च्वङ दमु । उ स्वयेन् हाखेन अनलाइन पति जुकुनु चल्याङन् च्वन्नसिन् थपिसिन् बाँलस्के ज्ञान मबिये लागिन् बाँलकु मूलोँ क्येइँत ठाकौ चाय् लागिन् इसिन् हातिं ज्यखँ ग्वर्न आले पितकार्न गिबिं गिबिं खँग्वारापेन् च्वाक्ठ्यालेन् वन ज्येउ । आमे लागिन् बँपिझ्यालाखेन्नलान् क्षमा फोङन् च्वङ दमु ।

आउ इसिन् उ बाँपिझ्यालालान् द्वाल्खा नेपाल भाषा, नेपालभाषा, पर्वते भाषा व अंग्रेजी भाषालान् अनलाइन् पतिकु ब्वय्खँ पितकायेन् गुल्प गुल्प सोंगु किपाय् ल्याखाकु ठाइँठाइँये सोङ्गुकिपा (भिडियो) पेनुं तयेन् क्येङन् च्वङकु आउ न लिरि इसिन् थपेतु लाङाय् फरय् खँपेन्, थपेतु द्यउ देगलय् खँपेन् आले थप्सिन् मानेङन् ङाके ययन् च्वङ नखतचखत, रीतिरिवाजय् ज्येखँपेन् वृत्तचित्र दके सोंगुकिपा दके क्येइँ टेङ दमु ।
साङत, दाजुकिँज ताताकेहेँ पिस्त इसिन् फयेसये खँपेन् ब्वठयेन् गुल्प बाखन् गुल्प चिये खँ, गुल्प प्याखन् आले मुक्तक हाइकु इथितुं ठाइँठाइँय् ब्बये खँ पेन् पितकायेन् थपेनाप येइत टुटि पाराक ल्येयेन् ययेन् च्वनगु । उ स्वयेन् हाखेन येङ बाँपिझ्यालाय् ज्ये खँ थपिस्त गिनागु लगैजुर थिपुल बाँलकु सुझाव व सल्लाह बियेन्दिर्स इस्तं भातिचा बल पितययेउरा हङ आश कायन चोनगु ।

आउनलि इसिन् उ बाँपिझ्याला द्वाल्खा टेलिभिजनलान् येक्कु मिपिस्त सत्तयेन् घत्कें विषय त स्वाङन् खँल्हाइरि ज्ये येरिटेङ दमु । उ ज्येखँकु सामाजिक, साँस्कृतिक, धार्मिक व पौराणिक हाबिहाबिये खँ पिस्तकायेन् थपेन् दोखुसेतं रसताकेइरि ज्ये टोङन तरगु ।

इसिन् येरिम्वाले उ ज्येखँ त ग्वाहार बियेन् थप्सिन् थउ गाउँठाइँकु हातिं प्याखन् पेन् दर्स, हाति मूल खँ पेन्, पित मायाउ अमूल्य खँपेन् दर्स या गुनानुं गुल्पनुं मसिये माताये खँपेन् दमु हर्स कि इसित छुसासिन् कि इस्त सत्तसिन् आले इसिन् सोङ्गुु किपा दके दोखुबल्येङ क्येङन् थउ नाम जाकेइ दयेउ हङ खँ तयेन् थन्हुय् ज्येखँ उलिकुतु जाउदित बाँपीझ्याला द्वाल्खा टेलिभिजन खेन्न्लान् जि बालकृष्ण श्रेष्ठ “पासा” न ईनाप यगतु ।