द्वाल्खा अभयपुर शहरय् नाम जायेन्च्वंगु सामाजिक संस्थाय् ल्याखाकु ड्वाकुन्दांगु क्लव व गुठीपेन् मसिगि हात्तजेउ गुल्पनुं खोइँमजिउ ल्याखान् साँसय् तारान् टियेथेँ टियेन् पिपान लाङाकु पित येइत ठाकके च्वंगु कालिन्चोक युवा क्लव, द्वाल्खा गुठी, तिलिन्चो परिवार थिनागु सकृय संस्थापेन् हाबि हाबि गुलि नाम जाके, ङाके व डाके च्वंगुजु ।

दाँच्छि न् थिपुल निस्पुल सोँपुल जुर्सं द्वाल्खा ओँगन् ट्वाल सफा येँगन् येँचके तइत ल्यास्म्हा ल्यासिमिसान्नसि बुरापेन् टुल्के ल्हाहाकु तुफि, त्वार्नी, चक्रि, सुरीचा ज्वङन् थाब्न, कोब्न, दुङ्गल, पिङ्गल, रास्कुल, सेङ, राइती व बज्रवती दोखुनुं सफा येँगन् घत्केतुं आखर ब्वङन् येउ शिक्षित दर्जा क्येँगन् ज्ये येत्न छिजि द्वाल्खाकु आउ गिबिङ् बामलकु हङ ठाइँतु खोइँ मदयेउ जेउ हँगन् पिपान् देश परदेश उइँ मफयेन् च्वंगु बुराबुरी व बु–स्वाँराय् ज्येकु थायेन् च्वंगुपिसिन् गुलि ड्वाकु आश कायेन् मनकु टोँगन् च्वँगन् च्वंगुतन् ।

आमु हाबिय् द्वाल्खाय् क्लव संघ संस्थाय् मिपिसिन् ज्ये मयेँग मखे, भीमसेन द्यउय् लिखनय् पार्खल डुङन् उइँताक्कु थउथउन तु ढ्याबा मुङन्, सरकार नाप ग्वाहार फोँगन् जुर्सं दुपान व पिपानय् गुठी व कुठीपिस्त ल्वाप्ठोँगन् आमु डुरिटेंगु पार्खल त दके सामाजिक दायित्व क्येँग खँ त गुनानुं बाँमलकु हरिमजि । भीमसेन द्यउय् नित्यपूजान् नसि ङाकेइमल्गु जात्रा त टुल्के द्वाल्खा गुठीन् येल्पनु येँगन् च्वंगु खेउँ ।

आमताक्कुय् ल्याखाकु स्वर्न, मदयेन् ओंगु राजसभा स्थायी समितिय् दुज द्वारिकामान सिं, मदयेन् ओंगु नेपाली काँग्रेसय् नामजाउ नेता माधवमणि राजभण्डारी आले थन्केसि मफयेन् च्वंगु भन्सारय् हाकिम केदारमान सिं, आमताक्कुय् पर्यटन व्यवसायी समाजसेवी बैकुण्ठ नारायण प्रधान, नामजाउ प्याखनमि कलाकार मदनदास श्रेष्ठ, गुठियार व समाजसेवी हेमराज श्रेष्ठ, इन्जिनियर राजकुमार जोशी, द्वाल्खाय् नाम जाउ साहित्यकार अमरकुमार प्रधान, प्राध्यापक डाक्टर श्याम जोशी, ल्यास्म्हा समाजसेवी भल्ला मास्के, नरेन्द्र श्रेष्ठ, लवकुश प्रधान, विनोद (उदय नारायण) श्रेष्ठ, विनीत कुमार (प्रल्हाद) श्रेष्ठ, पे पालाकु दउ कालिन्चोक युवा क्लव व द्वाल्खा गुठीन् गुलि नाम डायेन् च्वंगजु आमु घसान घसान ताङन् ओंगु कारण हातिले ?

कालिन्चोक युवा क्लवकु लिबिय् पालाकु च्वंगु प्रकाश श्रेष्ठन् थउ जागीरय् ब्यालात तु धिके यले च्वन्सं द्वाल्खाय् नखत, जात्रा तायेङ् हँगन् ब्वाँगन् लिङायेन् हतिइथि ग्वाहार फोँगन् जुर्सं जात्रा ङाकेतु च्वंगु थिमा समाजय् बाँलकु ल्यास्म्हामि खेउँ, ङाद खुदन्नसि जाउदियेन् च्वंगु बुग्द्यउ डुकेइत ड्वाकु ज्येखँ येँग खोइँदमु । आम्ततु निरन्तरता बिइत गोपाल प्रधान व निरेन्द्र मास्केयेङ् बाँलकु तु पहल दमु, आन्थिनु हाबिय्थेँ सक्रिय जुयेन् हाखेन येइँ मफयेकु हातिउरि कारण पितयेर, उ खँरि थन्केसिय् कायुक्लवय् निरेन्द्र मास्केन् लिसर बिइतु मल्गुदमु ।

कायुक्लव न थउ साधारण सभा टुल्के येरिमफयेन् च्वन, हाति जुकुन येरि हँगन् तिम्तिमुकु ल्यास्म्हामिपेन् ह्याग् मिलान् हेङ्ला म्वजुयेन् थिपुल्नं नोलु जुयेन् ओंगु खँ थुकेइत ठाकयेन् च्वन । उ इथि जुयेन् ओंगु कारण राजनीतिक हस्तक्षेप जुवा मखे ? हँगन् न्येइत सर् पितययेन् च्वन वय् लिसर गुनान् बियेउ ? बुरा बुरी पाकोपिसिन् जुकुन् ड्वाकु पदय् ठाइँ ज्वँगन् च्वइँ मजिर हँगन् कुसी तिम्मुकु थेँ तिम्मुकु ल्यास्म्हापेन् हात्त डाँस नादउथेँ नादयेन् ओन ? वय् लिसर् गुनान् बियेउले ?

आले मेबु थिगुर संस्था बुके तउजु थिगुर जमानाकु तिलिन्चो परिवार हँगन् द्वाल्खाय् मि छोउथेँ छोउ प्रगतिशील बिचारधाराय् ब्यागलतु संस्थाङ् मदउ मखे, आमताक्कु वा झन् देशकु जनवादी, अखिल, क्रान्तिकारी हँगन् आउतुङ् सर्गय् नक्तितु च्वात्कायन् हायेन् थउ लाङाय् तुर्सिपुजा येँग मठकु तयेन् लुँ व वहो तुरा बुकेयेउ हँगथेँ येँगन् कुठा कुठाकु, छेँरी प्वाकलकु, चपकु सुलेन् सुलेन् बैठक च्वँगन् दुजपेन् दके, प्रगतिशील म्ये हलेन् हल्के द्वाल्खाय् ख्वालतु हिल्केइरै हँगथेँ मिसान्न् ओन्सा दोखुनुं ग्वार्मुङन् प्रगतीशील साँफरपेन् ब्वठयेन् येरिमयेरि येकु ल्यास्म्हापेन् दउजु ।

आमताक्कुय् ल्यास्म्हापेन् मुक्ति प्रधान, पुरुषार्थ श्रेष्ठ, तिर्थ नारायण जोशी, सुनिल मास्के, हरि दर्शन श्रेष्ठ, जंगम कसजु, यादव कसजु, रविभक्त श्रेष्ठ, माधव प्रधान, सुरेश प्रधान, मधु श्रेष्ठपे बगालपिसिन् द्वाल्खाय् ख्वाल म्वग्र तु हिलेन् द्वाल्खा त बेइजिङतुरा दकेइरै हँगथेँ लिङाउतन् । ज्ये मयेङरि मखे लित प्रगतिशील हँग हाति, जनमुखी हक अधिकार हँग हाति, हात्त थउ हकय् लागिन् शासकीय वर्गनाप संघर्ष येरिमल हँग ज्ञान व शिक्षा मबिये मखे तर थउ केसि ओँगन् प्याटातु ड्याल्यात्के उ वर्ग संघर्षय् लागिन् मेबे लिखन जुकुन् लिङायेन् थउ जीवन पार लगैम्वजुजिन हँगन् थिम्हा थिम्हा येँगन् बाठोपेन् लिचिलेन् ओँगुपेउरि जीवन बाँलङन्तु ओन, गुनुरि थउ सिद्धान्तय् मुलोँ त्वार्तैतु मज्यू हँगन् मास्टर जुयेन् थिगुरतु मन्त्रकु यार्गायेन् च्वंगुपेनुरि आम्तु चपिल, आम्तु लाङा हँगन् गुल्पनुं थात येइमफयेन् च्वन्हिन् । न द्वाल्खाकु हातिङ परिवर्तन जुर, न परिपक्व सिद्धान्तय् छेँ तैयार जुर । हति सोउ, इथि सोउ ७ तियान् २१ आले ३ सातन् २१ हँगथेँ, नाइचाय् नाइचातु जुर ।

आमताक्कु द्वाल्खाकु विक्रम सम्वत् २०३५–३६ दँ ताक्कु जुइमल जनमत संग्रह जुइताक्कु तिलिन्चो परिवार स्ांस्थाय् ल्यास्म्हा मिपे निकै जगजगी दउजु, प्रगतिशील म्ये हलेन् जिररा, प्याखन् क्येङन् जिररा, छेँछेँकु सुलेन् बैठक तयेन् जिररा, मिपिस्त चेतनशील खँल्हायेन् सिकु बटीतु म्वात्केयेउ हँगथेँ तिम्तिमुत्केउतन् । झन् घत्केतु ड्वाकु शिक्षा कायेन्तउ प्राध्यापक पिसिन्तु प्रगतिशील प्याखन् क्येन्नसिन्वा हाबिय् रुढीवादीकु च्वंगु बुराबुरीपिसिन् उ थन्केसिय् मुचापिसिन् गुनानुं म्वब्वङ आखर ब्वङन् ययेन् द्वाल्खाय् संस्कारतु नासेरिरै हँगन् बोल बिउतन् ।

आन्थिनुं आमु तिलिन्चो परिवारय् ल्यास्म्हापिसिन् टेरैमयेँगन्तु थउ थउ बल्न चाके अन्याय व अत्याचार आले शोषकी सामन्ती पिस्त म्वकेइमल आपिस्त सजाय बिके गरीबपिस्त ल्वाप्ठोइँमल, उत्थान् येरिमल वा हकुतन् तर आमु दोखुनु नारा व भाषणकु स्वाक्टायेन् गुरि क्वाराङकु तान, पत्तातु मन्त ।

आँकुलान् जनमत संग्रहय् चुनाव जुर, पञ्चायत न तु त्यात्केर्जु, खँ ल्हाइसउ, ल्हाहा मुसारेङन् टुक्छिउपेन् थात थ्येन्हिन्, जोँ स्यात्के, गल स्यात्के भारी कुँ बुयेन्, सिठु बुयेन्, सार बुयेन् च्वंगुपेन् आम्कुतु थायेन् च्वइँत बाध्य जुर्हिन्, द्यउय् पर्खाल डुकु खोंगु मिखान् हातिङ् मदउपे मन डुङन् हाउ मिखाय् ख्वबि गुं सामाजिक संघ संस्थान् खोइँ त बल मयेत्चु ।

माइककु ड्वाक्ड्वाकु सर्न भाषण बियेन् आउ गुनुङ् प्याटा प्वङ्लान् म्वग्र लाङ्टा जुके च्वइँ माबालेउ, गुनेङ् धम्की व हप्कि नयेन् च्वइँ माबालेउ हँग आशा वा तुतुरवतीय् लोखु थिनागु तु जुर । हाबिय् सामाजिक संघ संस्थान् ज्ये मयेङ मखे येँग दमु तर दिगो म्वजुर, आम्लि ड्वाक्ड्वाकु संघ संस्था व बुद्धिजीवीपेन् दयेनुं द्वाल्खाकु हातिङ सरकारी ज्येकुठीपेन् तइत पहल येरि मफर्हिन् । दयेन् च्वंगु घरेलु उद्योग, कृषि बिकास बैंक, परिवार नियोजनय् अपिस टुल्के बटिन् चाउरि ल्ययेथेँ ल्येयेन् येन्नसिनुं बालकु तु जुर, थउ मिच इरिपेन् वा सुरक्षित जुर हँगन् ल्हाहा प्वार्चियेन् च्वंगु संघ संस्थाय् हाति गुनगान येरि ग्वा ….।

उकु ईसिन् ब्वयन तय खँपेन खेउ जुयलागिन् उकु गुलीङ खँ चाकई फरई गुलिङ खँ खायई फरई हाती थउ खेन्नलान् छिजिन् यङ ज्य खँ थातकोत जुर्स सच्याङन हाखेन उईलौं । उतु बुद्धि दोखुसेत थविउ हङन द्वाल्खा भीमसेन देउकु आशिक फोङन चोनगु ।