निर मायाइरि घत्केङ् कारण दइफरै, निर काइ मफयेन्लि घत्केङ् व्यथान् थि फरै, निर यकेइत मिपिसिन् घत्केङ् अकत्न ज्ये येतहिन्, गुय् कारण्न मिपेन् घ्यार्दके मफउ जुरहिन् । मिय् स्वास्थ्यकु घत्केङ ज्ये खँय् तालमेल मिलैजुइमल, मनकु तिर्सना, पीर दत हर्सं नीर मायाइरि स्वभाविक खेङ् । उ त बाँलस्के तइत दोखुनु स्वयेन् ड्वाकु खँ हङ पीर काइमजिर, नुगरकु हाबि उइँ दोंगु खँपेन् म्येथकेइ मजिर, गिथि सुन्हिलान् बल्न्हि जुर आले लितं सुन्हि जुर ।

आन्थितु जीवन जुनीय् उ जाउ मदिउ लीला खेङ् हङन् थउ मन्त क्वाट्टकेइ फइमल, मेबु दउ मिपे नाप थउ त ल्होँइ मजि, थउ स्वयेन् क्वतय् मिपेन् गिथि म्वाङन् च्वनहिन् हङन् मन्कु कायेन् सादा जीवनय् खँ टोङन् च्वन्गु हर्स निरुं ययेउ, प्याटाङ् प्वङ्ला म्वजुयेउ ।
दु:ख पीर हङ गिनागु ड्वाकु मिपिस्तं दमु, मदउपिस्न स्वर्न खोइ मदउ जुकुन् खेउँ, आपिस्त घत्के दकेइरि गिथि येङन् धन प्वार्चिरि हङ पीर्न निर मायाजेउ, मदउ पिस्त थउ मुचाखाचा त गिथि येङन् लहिज्येउ हङ पीर्न निर मायाजेउ, उ जुनी जीवनय् पिरलोन् म्वग्र व स्वास्थ्य त हात्त सास्ती बिइउरिले…! आम् कारण्न नीर काइत थउ निश्चिन्त जुयेन् डिंताक्कु केसि सुन्हि चर्कोंगु निभार त्वयौ क्वारेउ हङन् भिंगु टोङन् निर काइत बल येरिमल ।

यदि इथि येङनुं निर काइ मफर्जु हर्स उ सोँगुर विधि त मनकु काइलौ आले आनन्दन् डिँलौ । उ सोँता विधि खास येङन् एक्युप्रेसरय् सूत्र खेङ । उ विधि हङ थउ म्वग्रय् गु गु ठाइँकु त्याल्न नीर येइ फरैले, उ खँ सिके तइलौ कि बालँस्के नीर र काइत योगाय् ड्वाकु आड दमु ।
ल स्वइलौ !

(१) उ थिगुर उपाय:- टुटीय् ड्वाकु मुला व माइली चुलाय् दातिलान् भातिचा थात डिं स्वयेन् हाखेन ५-१० सेकेण्डटुल्के ल्हाहाये माइली चुलान् त्यालिलौ ।

(२) ल्हाहाय् पञ्जालान् सोँपु चुलाय् ल्याखान् त्वार्तयेन् ल्हाहाय् माइली चुलान् तु ५ मिनेट घडी टुल्के बिस्तार्न त्यालेन् च्वन्गु हर्सङ् निर काइत ग्वाहार बिफरै ।

(३) टुटी पालीय् दात्तिकु थिपुल ३० सेकेन्ड त्यालेन् ५ सेकेण्ड त्वार्तयेन् लितं ३० सेकेन्ड त्यालेन् लितं त्वार्तैइरि येत्चु हर्सं नीर काइ त सहज जुयेउ । थिपुल येङन् स्वइलौ ना ।