कलावती श्रेष्ठ, नाय् द्वाल्खा म्यासमुचा खलक
द्वाल्खा म्यासमुचा हङन् घत्केथ्येन् ओंसिदोन्जु । उ थिगुर द्वाल्खाकु बुयेन् पिपान ब्याहा जुयेन वंगु मिसामि तिताकेहेपे थिगुर खलक खेउ । थनु सोयन निदँ हाखेन उ स्वनिग देशकु च्वंङनदिउ तिताकेहेंपेन् ग्वार्मुङन् दकेय् थिगुर सामाजिक ज्य खँ यकु खलक खेउँ । द्वाल्खाय् मयजुपेन् अञ्जु श्रेष्ठ ड्वाक्छें, शारदा राजभण्डारी कोर्छें, रामदेवी प्रधान कोतबिहार्छें, रमा श्रेष्ठ ड्वाक्छें, ज्योति श्रेष्ठ सैंजु थात बिहार्छेंय् तिताकेहें पिसिन् द्वाल्खालान् ब्याहा जुयेन् पितयउ तिताकेहें दाजुकिंजपिस्त गुंब्यालाकु हातिं बाँलकु बामलकु ज्ये परैजुइफरै, मफयेन् वासर इसर यरि मफयेन् च्वइँ फरै आनागु ब्यलाकु ग्वाहार बि मलेउ हङन् दकेय् खलक खेङ् ।

उ खलक दकेइ ताक्कुय् नकिन् अञ्जु श्रेष्ठ खेङ् आमताक्कु पेम्हा ङामा तिताकेंहेंन् ढ्याबा ग्वार्मुइँ त थउ थउ तु ग्वार्मुङन् गुलि फरै आम्लि ग्वाहार बियेन् च्वङ दउजु, आले दुजपेन् ग्वार्मुङन् दोलखा चेलिबेटी बचत तथा ऋण सहकारी टुल्के चल्केयेन् बाँलस्के ज्ये खँ हिल्के ययन चोन्गुतन । ईथी ज्य खँ यङन ययन चोन्ङ चोन्ङ उ कुठी बाँलस्के वङन् हिलेन च्वंगुजु, थउ थउ व्यावहारिक हो व्यावसायिक ज्येय् कारण न लिमलङन्लि मयजु अञ्जु श्रेष्ठन् नकिन पद त्वार्तयेन्लि मयजु ज्योति श्रेष्ठ सैंजुन् उ कुठीय् जिम्मेवारी कायेन् उ त गसान गसान हिल्के ययन चोङ खलकय थनुकेसीय नाय् मयजु कलावती श्रेष्ठ जुयन चोन ।

कलावती श्रेष्ठ भीमेश्वर नगरपालीका वडा ल्याखाः २ द्वाल्खाय् थातकोर्छेंकु चोङनदिउ बा स्वर्गिय भाजु मोहन नारायण श्रेष्ठ हो माँ मयजु सन्तलक्ष्मी श्रेष्ठय् खुम्हा मिच मध्येकु काइँली मिच खेङ् । मुचान्नसि आखर ब्वइँत घत्केङ् लगनशील जु मयजु कला श्रेष्ठ खेङ । माइती हाबिय् ल्याखाःन् दोलखा पूर्व नं.२ द्वाल्खा, आउय भीमेश्वर नगरपालीका वडा ल्याखाः २ थात कोर्छेकु बुयेन् यये जुर्सङ् मयजु कलावतीय् ब्याहारि पश्चिम नेपालय् बागलुङय् भाजु राजेन्द्र प्रसाद श्रेष्ठनाप जु खेउँ । व्यावहारिक जीवन बित्यारि त येँ देशय् महानगरपालिका वडा ल्याखाः २ लाजिम्पाटकु चोङन ययन दिएन चोन ।

मुचाताक्कु छेँ हाखेनय रासकुलेश्वर ब्वङकुठीकु ब्वङ कक्षा ६ न्नसी थाब्न पाखलती भीम माध्यमिक ब्वङ कुठीकु आखर ब्वङन् येँ देशकु ड्वाकु शिक्षा ज्ञान काइलागिन् ययेन्लि बाग्लुङ छें दउ भाजु राजेन्द्र प्रसाद श्रेष्ठनाप ब्याहा जु खेङ् ।

येँ देशकु च्वँगन् थउ हो पारिवारिक जुनी भिंकेइत घत्केङ् ज्ये खँ यङन् जुर्सङ समाज दुपान च्वङन् समाजय् गरीब गुरुवापिस्त ग्वाहार यरीत रसताउ मयजु कला श्रेष्ठन् द्वाल्खा म्यासमुचा खलककु दुत ययेन् सामाजिक सेवा यरित घत्केङ् मन तये लिविय द्वाल्खा म्यासमुचा खलकय नाय्कु मयजु कलावती श्रेष्ठ यउ खेउ । आमतु दातिकु चोङन बाँपिझ्याला डटकम खेन्नलान् सह–सम्पादक भाजु बालकृष्ण श्रेष्ठ “पासा“ नाप जु खँपे मुल खँपेन् थपे हाखेन् ब्वयन तय खँ सिकेरगु ।

मयजु कला श्रेष्ठ त इसि बाँपिझ्याला डटकम ब्वङपतिकु लसकुस (स्वागत) दमु ।
स्याउदाइ दाइ त, जन्त बेस्न खुशी लगैजुर, म्यासमुचा हो जन्त लुवन्के आले थि निस्गोटी खँ तइत ब्यला बियेकु ।
आले हाति दमुले म्यासमुचाय् ब्वखँपेन् ? थन्केसि हाति येङन् च्वँङ दमु ?
न्हुलु वा हातिङ् मद दाइ, विश्वकु संक्रमण जुयन चोन्गु कोरोना किरन् यङन् दोखुनुं मिपिस्त जीवन काटेरित तु ठाकयेन् च्वन, म्यासमुचा खलकयेङ् हातिङ उपलब्धि मद, थउ मनन टोङथें ग्वाहार यरी मफर्सङ गुन्तङ् हातिन फरगु आमुन ग्वाहार यङन ययन चोनगु ।

आले माइती छें हो थउ छें खेन्नय् ब्वखँ गिनागु दम ?
थउ तु बु बामाय् छें (माइती) य् खँ वा हाति दयेउ हङन् । थउ त उ धर्तीकु टुटीन् चुकेउ बा माँन् उ संसार त तु त्वार्त ओन्हिन् । तिताकेहें दोखुन्हु थउ थउ ठाइँकु तु च्वनहिन्, बा हो माँ मदर्सङ् थपेन थिनागु दाइपेन् दयेलागिन् अभिभावकय् खाँचो महशुस म्वजु हङन् च्वङ दमु । आउ कर्म छेँय् खँ ल्हाइमल्नसिन् उक्न दोखुनुं बाँलकु तु दमु, निन्मा कुबा हो छेंय् जहानपिसिन् बाँलकु तु व्यवहार यतहिन्, उलिकु तु जि रसतायेदमु ।

आउ छिजि थउ प्रसङ्गकु दुत उइँलौ मजिरा ?
जिर हर्सिन् ।

म्यासमुचा खलकये जिम्मेवारी थउ ल्हाहाकु कायेन्लि गिनागु महसुस जुयेन् च्वनले ?
जन्त वा गर्व लगैजुयन् च्वन । जिन् मुचान्नसि मनकु टोङ दउजु कि गिथि यङन् गरीब गुरुवापिस्त ग्वाहार यरि दयेउ हङन् आमु माङस आउ गसान गसान पुरा जुयन ययन चोन ।

आन्थि हर्स थमुन थउ इच्छा त गिथि यङन् ज्ये खँ यङ दमुले ? हाति श्रोत न सामाजिक सेवा जुयेन् च्वन ?
जिन् सामाजिक ज्ये खँ थउतु आयस्तान् यङ मद । उ खँकु थमु प्रष्ट जुसिन्, जन्के आनागु क्षमता मद, गुनानुं समाज दुपान दउ तर आयस्ता मदउ असहाय पिस्त गुं तरिकान् ग्वाहार बिईम्वालै हर्स आनागु दातापे मनकु दउ सोच त थउ जिम्मा कायेन् ग्वाहार ग्वारमुङन् मदउपिस्त ग्वाहार बिईत टुटीन् लिङायेन् छेंछेंकु थ्येंकेइरि ज्ये इसिन् येङन् च्वङ दमु । इसि म्यासमुचा खलकय् ढुक्ठीकु आयस्ता मद, जिनुं थउतु बुन्चा भाकारीलान् पित कायेन् ग्वाहार बिइउरि क्षमतां मद, गुनानुं हातिङ् चीज बियेन् उरि फलाना त बीउ ना हङन् बिसार्जु हर्स बिइउरि खेङ् ।

बेस्न तु बाँलकु खँ खेङ आमुवा । यिनागु ग्यारदउ कोरोनाय् ब्यथा दर्नसिनुं थउ जिउ व स्वास्थ्यय् ल्याखाः मतयेन् ज्ये यङन् च्वङ दोखुसेनुं खोङन् तरै, वय् मूल्यांकन वा खोंगुपिसिन् यहे यत्चुजेउ, थउ के मदर्सं मेबु मिपिसिन् बिये दान त मदउ मफउ पिस्त ब्वठइरि ज्ये यङकु दोखुसेनुं सुभाय् बियेन् च्वंगु खोईदमु,‘ आले कोरोनान् ग्रसित जुयेन् च्वंगु ब्यालाकु भातिचां ग्यार्मदरा ?
हात्त ग्यारिउरिले दाइ, कोरोना हङ ब्यथा आउ जुकुन् मखे, घुस्ना व देसान् हाबि हाबिङ ययेन् च्वंगु तु खेउँ । तर भातिचा ब्यागल किर (भाइरस) य् ख्वाल बुयेन् यये लागिन् मिपेन् ग्याकु जुकुन् खेङरा हङथें जुर । विश्वकु तु बामलस्के फिंजइजुये लागिन् सतर्क जुइमल्गुरि खेङ् आन्थिनुं थिपुल सिरिमल्गु जुनी खेङ्, मदउ मफउपिस्त ग्वाहार यत्न यत्नं सित हर्स वा झन् बाँलकु जुयन नाम जायउ हङ आश दय लागिन् लिर्ङारगु ।

बिचार गत्केङ बालकु खेउँ‘ मिपे लागिन् समर्पित भावनाय् कदर यङन् आउ त खँ दिकेइ टेनगि, दिकेइ स्वयेन् हाखेन उ बाँपिझ्याला डटकम पतिलान् हातिङ खँ हरित रा ?
बाँपिझ्याला डटकम अनलाइन पतिलान् द्वाल्खाय् नेवार भाषा त ल्वाप्ठोङन् म्वात्के तइत घत्केङ् ड्वाकु ग्वाहार जुयन चोन । आमु खँकु जि सुत्ता गत्केङ छिजि थउ पहिचान म्वात्के तईमल हकुपेन खुसी चायन चोङ खोईदमु ।
मेवु खँ उ पतीन थनु भाषा, संस्कृती म्वात्के तई मल हङन् गु भूमिका म्येथयेन् ययन चोन आम खँकु जन व म्यासमुचा खेन्नलान् नुगरन नसि बाँपीझ्याला डटकम खलक हो हिल्के ययन चोङन दिउ दाजु उपेन्द्र प्रधान, थमु बालकृष्ण श्रेष्ठ आले उ ज्य खँत दुपान पिपानलान् थउ हातिन फरई आमुन ग्वाहार यङन थिठाई चोङन ययन दिएन चोङ्गु दोखुसेत सुभाय् विरगी ।

ईथीतु वय नाप नापङ द्वाल्खाय् नखत, चखत छिजी तिताकेहे, दाजुकिंजपे बुदिन्, ब्याहा, पस्ताउ, जा नकेय थिनागु बाँलकु हो भिङ्गु खँ नाप नापङ सिकु तान्गुय खबरपेन देश दुपान पिपान चोङ्गु द्वाल्खायवासी हो शुभचिन्तक दोखुनु नेपालीपेलागिन् च्वय खँ वियन ययन चोन उ मेवुरी बाँलकु पक्ष खेउ । ईथि बाँलकु हो भिङ्गु ज्य खँकु ग्वाहार यङन ययन चोङ लागिन् घत्केङ खुशी चायेन् च्वङ दमु । वय नाप नापङ उ पतिय् उत्तरोत्तर प्रगति थ्वजु हङन जन हो द्वाल्खा म्यासमुचा खलकखेन्नलान् भिंगु टोङ दमु दाजु ।
सुभाय् ।