Aug 19 2026 | २०८३, भाद्र ३ गते
२०८३, भाद्र ३ गते
Aug 19 2026 | २०८३, भाद्र ३ गते
नेपाली कांग्रेसका वरिष्ठ नेता तथा पूर्वउपप्रधानमन्त्री गोपालमान श्रेष्ठको पार्थिव शरीरमा नेपाली कांग्रेसका महामन्त्री गगनकुमार थापाले पार्टीको झन्डा ओढाएर अन्तिम श्रद्धाञ्जली अर्पण गरेका छन्। कांग्रेसका नेता–कार्यकर्ता, शुभेच्छुक तथा परिवारजनको उपस्थितिमा श्रद्धाञ्जली कार्यक्रम सम्पन्न भएको हो।
८३ वर्षका श्रेष्ठको मंगलबार जावलाखेलस्थित हेलिअस अस्पतालमा उपचारका क्रममा निधन भएको थियो। स्वास्थ्यमा समस्या देखिएपछि उनी केही समयदेखि उपचाररत रहेका थिए। उनको निधनसँगै नेपाली कांग्रेससहित समग्र राजनीतिक वृत्तमा शोकको लहर छाएको छ।
महामन्त्री थापाले पार्टीको झन्डा ओढाउँदै श्रेष्ठले पार्टी, लोकतान्त्रिक आन्दोलन र राष्ट्रिय राजनीतिमा पुर्याएको योगदानको स्मरण गरेका थिए। श्रद्धाञ्जली कार्यक्रममा कांग्रेसका शीर्ष नेताहरू, विभिन्न दलका प्रतिनिधि, शुभेच्छुक तथा परिवारका सदस्यहरूले पनि स्वर्गीय श्रेष्ठप्रति श्रद्धाञ्जली व्यक्त गरेका थिए।
परिवारका अनुसार श्रेष्ठको पार्थिव शरीरको आजै काठमाडौंमा शवयात्रा निकालिनेछ। त्यसपछि हिन्दू परम्पराअनुसार पशुपति आर्यघाटमा अन्त्येष्टि गरिने कार्यक्रम रहेको छ।
गोपालमान श्रेष्ठ नेपाली कांग्रेसका लामो समयदेखि सक्रिय नेतामध्ये एक थिए। उनले पार्टीको संगठन विस्तारदेखि लोकतन्त्र स्थापनाका विभिन्न आन्दोलनमा महत्वपूर्ण भूमिका निर्वाह गरेका थिए। उनी विभिन्न समयमा मन्त्री तथा उपप्रधानमन्त्रीको जिम्मेवारीसमेत सम्हालिसकेका थिए। पार्टीभित्र समन्वयकारी, शालीन र अनुभवी नेताका रूपमा उनको छुट्टै पहिचान रहेको थियो।
श्रेष्ठको निधनप्रति राष्ट्रपति, प्रधानमन्त्री, विभिन्न राजनीतिक दलका नेताहरू तथा सामाजिक क्षेत्रका व्यक्तित्वहरूले दुःख व्यक्त गर्दै नेपालको लोकतान्त्रिक आन्दोलन र राजनीतिमा उनले पुर्याएको योगदानको स्मरण गरेका छन्।
उनको निधनसँगै नेपाली कांग्रेसले एक अनुभवी, निष्ठावान र लामो राजनीतिक यात्राका धनी नेता गुमाएको टिप्पणी नेताहरूले गरेका छन्।
१९९७–०७७–०७८
© 2026 All right reserved to bampijhyala.com | Site By : Sobij
