नेपाल सम्वत् ११४६, चौलाथ्वः ६ षष्ठी (१० चैत्र, २०८२, २४ मार्च, २०२६) मंगलबार, बाँपिझ्याला । दोलखाको भीमेश्वर नगरपालिकास्थित पशुपति चौलागाईं स्मृति अस्पतालले आफ्नो ५१औँ वार्षिक दिवस एक विशेष समारोहका साथ मनाएको छ। अस्पताल व्यवस्थापन समितिका अध्यक्ष सुवास रिमालको अध्यक्षतामा सम्पन्न उक्त कार्यक्रममा अस्पतालको सेवा विस्तार र भौतिक पूर्वाधार निर्माणमा सहयोग गर्ने व्यक्तित्वहरूलाई सम्मान गरिएको छ।

आकस्मिक कक्षको उद्घाटन र मानवीय सेवा
वार्षिकोत्सवको अवसरमा समाजसेवी तथा वरिष्ठ इन्जिनियर आत्मा कृष्ण श्रेष्ठले व्यक्तिगत ८ लाख ६० हजार रुपैयाँ लगानी गरी निर्माण गरिदिएको र आवश्यक सामग्री जडान गरिएको ‘आकस्मिक कक्ष’ (Emergency Ward) को उद्घाटन गरिएको छ। कार्यक्रमका विशिष्ट अतिथि भीमेश्वर नगरपालिकाका उपप्रमुख कमला बस्नेत र समाजसेवी श्रेष्ठले संयुक्त रूपमा उक्त कक्षको उद्घाटन गर्नुभयो। उद्घाटन पश्चात् अतिथिहरूले अस्पतालको वार्डमा भर्ना भएका बिरामीहरूलाई फलफूल समेत वितरण गर्नुभएको थियो।

समाजसेवी श्रेष्ठको ठूलो घोषणा
आकस्मिक कक्ष निर्माणमा पुर्‍याएको योगदानबापत प्रमुख अतिथि एवं नगर प्रमुख ईश्वर नारायण मानन्धरले इन्जिनियर श्रेष्ठलाई सम्मान पत्रद्वारा सम्मान गर्नुभयो। सो अवसरमा मन्तव्य राख्दै श्रेष्ठले अस्पतालमा आउने अति विपन्न परिवारका बिरामीहरूका लागि आफ्नो जीवनकालभर वार्षिक ५० हजार रुपैयाँ बराबरको निःशुल्क औषधि उपलब्ध गराउने प्रतिबद्धता समेत व्यक्त गर्नुभयो।

नगर प्रमुख र अस्पताल प्रशासनको धारणा
प्रमुख अतिथि नगर प्रमुख मानन्धरले आफू निर्वाचित भएर आएपछि अस्पतालका अधुरा भवनहरू सम्पन्न गर्न र जटिल मानिएको डायलासिस सेवा सुरुवात गर्न नगरपालिकाले महत्त्वपूर्ण र समन्वयकारी भूमिका निर्वाह गरेको बताउनुभयो।
त्यस्तै, अस्पतालका कार्यालय प्रमुख डा. अच्युत पौडेलले अस्पतालको स्थापनाकालदेखि हालसम्मको विकासक्रम, सेवा विस्तार र वर्तमान अवस्थाबारे विस्तृत जानकारी गराउनुभएको थियो।

व्यवस्थापनमा सुधार र चुनौती
अस्पताल व्यवस्थापन समितिका अध्यक्ष सुवास रिमालले आफ्नो कार्यकालमा अस्पतालको आन्तरिक व्यवस्थापनमा कुनै कमी हुन नदिएको दाबी गर्नुभयो। उहाँले अस्पतालमा बिरामीको चाप बढेसँगै स्वास्थ्य बीमा, निःशुल्क औषधि आपूर्ति र कर्मचारी व्यवस्थापन जस्ता केही विषयहरू आफ्नो पहुँचभन्दा बाहिर रहेको उल्लेख गर्दै ती समस्या समाधानका लागि सबै पक्षसँग हातेमालो र सहयोगको अपेक्षा गर्नुभयो।

कार्यक्रममा स्वास्थ्यकर्मी, समाजसेवी, सरोकारवाला र पत्रकारहरूको उल्लेख्य उपस्थिति रहेको थियो।