हिन्दूधर्म मानेकु पिसिन् तुर्सिसिमा त विष्णु द्यउय् ल्याखान् पूजा येरिउरि व व्रत च्वइँरि ज्ये येतहिन् । हिन्दूधर्मय् ल्याखाःकु ओंगु तछलाथ्व निर्जला एकादशी खुन्हु थउ छेँय् लाङाकु दउ तुर्सिय् थलकु पिय् तुर्सिब्व (बिरुवा) त थन्हु दिल्लाथ्व एकादशी खुन्हु थउथउ तुर्सिमोठकु पियेन् विष्णु द्यउ मानेङन् पिलाटुल्के भजन किर्तन येँगन् व्रत च्वइँरि ज्ये येतहिन् ।

हाबि हाबि छेँकु मिसामिपे छेँ बुँय् ज्ये बाहेक मेबु अड्डा अपिस ओंगुपेन् मदय्लागिन् पिलाटुल्केतु निराहार व्रत चोंगुतन् । आउ थन्केसिय् मिसामिपेन् घत्केथेँ सरकारी ज्येखँकु लगैजुये लागिन् आम्लिस्टुलके यिनागु धर्म येँगन् द्यउ देगल ओँगन् पूजाआजा येँगन् च्वइँत लिमलङ कारण्न नित्यपूजाय् विधि जुकुन् येँग खोइँ दमु ।

हाबिय् मिपिसिन् येउता ज्येखँकुं नियम तयेन् घत्कें विधिविधान दकेय् कारण्नतु आउय् मिपिसिन् आमु मूलोँकु लिङाइसये खेङ् । यदि आमताक्कुय् मिपिसिन् उ तुर्सिय् महत्व मक्येँगन् थिपु घाँसय् ल्याखान् वास्ता मयेँग जुर्स गुनानुं वास्ता मयेकुजु ।

धार्मिक साँफरकु चोयेन्तय् ल्याखाकु थन्हु न्हिखुन्हुतु तुर्सिब्व ल्हेइमल्गु अर्थरि थन्हुय् न्हिन्नसि द्यउ भगवान विष्णु क्षीरसागरकु ओँगन् डिँइउरि ज्ये येँगन्दिय् लागिन् हतिइथि द्यउ विष्णु त नापलरि मफइरि स्थिति पितययेन्लि उ तुर्सि त तु भगवानय् मूल किपाय् ल्याखाकु मान्यता बियेन् थउथउ लाङाय् तुर्सिमोठकु पियेन् पूजा येरिउरि चलन येँग खेङ् ।

उ तुर्सि सिमा त द्यउ मानेङन् पूजा येरिउरि चलन पितकाउ मिन् ड्वाकु बुद्धि पितकाय् खेउँ । हात्तहर्स उ तुर्सि सिमाय् हान्नसि पुयाटुल्के संजीवनी बुटीय् ज्येयतै, अझ फर्जुहर्स, ठाइँ दतहर्स थउ छेँय् थिगुरीतु तुर्सि सामा पियेन् तर्स घत्कें ज्ये बिरै । उ सिमाय् बासनान् थिगुरि ब्वयेन् च्वंगु किरपिस्त थउखेन्न येइत ज्ये येतै । वय् बासना किरपिस्त घत्कें साकु तारै । उ तुर्सि सिमान् छिजि मिपिस्ति हाति लाभ दमु, उकु स्वइलौ,

(१) तुर्सिय् लप्ति थिबार्चा लोखुकु ठुङन् सुन्हि सुन्हि तोइँ बानी येत्चु हर्स पिनास जुत तांके बिरै न्हास बन्दजु चल्के बिरै, मुथु नादउ तान्केरै,

(२) भाति भाति क्वाकु लोखुकु थिघडी ठुङन्तयेन् तोइँरि बानी येत्चुहर्स गल काँठा सफा येँगन् बिरै, कब्जियत जुयेन् च्वंगु त येँगके बिरै, उ कब्जियत जुपिस्त थिपत् लप्तिन् मग ओल्तेचाकुं ५–७ पत् लप्ति मल ।

(३) कुब्यलाकु निर येउ बानी दर्स तुर्सिय् हा (जरा) नियेन् त्वन्स निर तांके बिरै, उ तुर्सि हँग दोखुनुं धर्म मानेकुपे लागिन् अमृत सरह खेउँ । उकु तु उलि मल हँग मद, आन्थिनुं हाबिय् पूर्खापिसिन् बाँलस्के सियेन् थुयेन् ओत न्हासेरि मजि तांकेइ मजि हँगन् तु द्यउय् ल्याखाकु तये खेउँ । थन्हुय् लागिन् उलि जुकुन् ।