श्रेष्ठ सत्य
द्वाल्खा आउ बेलायत
नर्सिङ होमय शैयाकु चोङन काल कुरेरीतु आउ चार्लीय दिनचर्या जुएन चोन । जुईत वा आमे वास्तविक नाम चाल्र्स खेङ । तर आमे परिवार, नातेदार आले साङत पिसीन दोखसेनुन मायाँन आम्त चार्ली हङन सत्तउजु । नर्सिङ होेमकु दोखुनुङ कर्मचारी पिसीनुङ आम्त चार्ली हङन सतरई । मस्तिष्क सम्बन्धी जटिल रोगए कारण चार्लीन थउ खलाई हो बुझ्इजुइरी सामथ्र्य गुम्याङ खेङ । आमे व्यक्तिगत फाइलकुङ विगत ङादन् नसी गसान गासान् आमुन थउ जम्मै खँलाइरी क्षमता गुमाएङ खँय विवरण उल्लेख दमु ।

शुरुकु आम नर्सिङ होमकु भर्ना जुर्ङ चार्लीए बानी व्यवहारुङ मेबु मफउपेन थेँतु सामान्य लगईजुउजु । आमे निस्गुर मिखा पेन यल्पनुङ बन्द तुङ जुएन चोङ्गुजु हर्स सञ्चारय लागिन सांकेतिक भाषाकु छ्याल्गुजु आमुङ गत्के तुङ अनिवार्य जुर्स जुकुन । मर्खेस उ यलपनुङ सुम्मके तुङ चोङ्गुजु । मेबु मफउपेन प्रायः थे ब्याला टिभी सोएन या रेडियो, मे ङेङन चोनहिन हर्स चार्लीरी सुनसान हो एकान्तकु तुङ चोइत मनपर्याकुजु । रेडियो, टिभी खोलेरर्स राकएकुजु ।

चार्ली यउ निस्लाङ पूरा मर्जुङ नर्सिङ होमय प्रायः दोखुनुङ न्हुलुँ कर्मचारीपेन आमे कुठाकु उइत ग्याकुजु । आपिस्त गुनुङ चार्लीए कोठाकु उइ मल्स हातिङ बाहाना यङन मेलेतुङ ओन्गुजु । आम व्यलाकु जि बातिचा पुरान कर्मचारी जुय नातान जी तुङ गत्केथे चार्लीनाप उइ मल्गुजु । आम क्रमकु जीन हाती खँ सिरगी हर्स चार्लीत आमे कुठाकु गुनुङ यउ मन परई मोजुइरी, आमे नजिक यर्स राक यङन लाहा टुटीन हाखेन हाति दम आमुनतुङ कक्केरी यकुजु । आमे ख्वाल हो हाउभाउ सोर्ङ यउसेतङ आमे नाप उइ ग्याकुतनजु ।

न्थिनतु जी गुली आमे टुटी हो मुड्कीए शिकार जुइमल्गुजु । तर आमे रोग आनागुतुङ खेङ हङन जी धैर्यपूर्वक आम चोङ्गु ठाँइकु ओउइजु । जन्त थाहा दमकी आमुन हातिङ बुझई मोजु हङन जुर्सङ जीन हाति यरीटेङ खेङ हङन आम नाप खँ लाइत हो जीन हाती यरीटेनगी हङन जीन जन ज्य यत्कु ज्य यकुइजु । गसान गसानन् चार्लीन जन प्रतिए अत्याचार ओल्तेचा यङन उई थालेत्चु ।

जन बल्नीय ड्युटी, आम बल्नि करिब थिगुर घडी ताक्कु जी चार्लीए कुठाकु आमे नियमित वाषर बिर वन्गी । आम्त वाषर विएन जी आमे कुठालान पित यइत लुखा खोलेत्की । लिखनलान गुनान जन नाम कायन सतर्जु । जी ग्याङन लुखाकु सोर्गी । “खेङ, जी तु खेङ छन्त सत्तउ । छि ग्यारिमाल । जीन बाँलस्के खँलाई फरगी तर उ दुनियाँकु जन्त आउ गुलीङ खँलाई इच्छा मद । मुचाताक्कु खँ लाई सेयङतुङ खँलाई थालेकुमी जीवन टुल्ले खँ लाउन गुल्पनु थाकेइ मोजु । मल्गु माल्गु अझ माल्गु खँतु गत्के खँ लायन मीन थौ समय आन्थिङ मोके चोन । समाजनङ खँलाईत तुङ प्रोत्साहन बियन हो खँलाई त जुकुन सम्मान यकु जुय लागीन तु थनु दोखुनुङ मी बेकारय खँकु थायन चोनहिन् । जीन थउ जीवनलान सेङ हो अनुभव यङ खँ तुङ उतुङ खेङकी खँलाई शक्ति, सार्मथ्य हो मस्तिष्कय घोर दुरुपयोग जुकुन खेङ । ” चार्लीन अचानक खँलाए खोङन जी अचम्म जुयन आमे नाप वन्ङ चार्ली जन प्रतिक्रिया मपियनतुङ खँ लायन ओन ।

“मी थनु खँय कारणन तुङ गत्के बेइमान, असत्य हो भ्रष्ट बनैजुयनचोन । मन दुपान दुश्मनीय प्वाका बुयन खँन जुकुन गुनेङ साङत जुयन चोन मीपेन थनु । उ यथार्थ बुभैm, जुय नसीतु जीन गसान गसानन् खँ लाई बन्द यङन वङ्गी ………………।” जन्त चार्लीन खँ लाय खोङन ग्यात्की हो जीन आकुलान उम्कै जुइत म्वाल्गि हात्त हर्स जन मेवु ज्य दय लागिन जी उइ टेङ खेङ हङन हत्कि तर चार्लीन झन जन्त रोकेङन झन् सक्रिय जुयन खँलाई थालेत्जु । “ जिन सिरगी, छन्त जन खँ ङेङन चोनन तर जन हातिङ खँ ङेङन छि उई फरन ।” जी आमुन मेबु खँ शुरु यरी हाखेन तुङ आम त उलिकार खँ मालाइरीय कारण हात्त हङन ङेन्गी । आमुङ थउ निस्गुर मिखा तिसियन विस्तारन खँलाई थालेत्चु ।

“जीन हत्किले छिन हातिङ खँ लाएन फाइदा तुङ मदले ? थिताल सोंचेतले छिन । मी पेन मेवु प्राणी सरह खँ मालाउ जुय जुर्स आम गुलि निर्दोष, स्वस्थ, स्वच्छ हो प्राकृतिक जु ज्यउ । जीन जीवनभरि खँ लाइए निरर्थकता हो खँ ङेङ्गु मी तुङ गुनुङ मदयन खँलाई बन्द यङ खेङ । छिन विश्वास यत मेवु हातिङ विशेष कारण मद । तर उ बल्नि छि थिनागु धैर्यवान हो सेवाप्रेमी मी नाप जन्त उ बल्निमे हलित मन लगइजुर । वास्तवकु बल्नि गुली रमाइलो, गुलि प्यारो दम ? दोखुन दुष्टमी सिरीेतुल्य तुलेन बल्निय ब्याला उ पृथ्वी हो उकुय मानव बेस्न खुसीजु ज्यउ । मखेर्स न्हिच्छी आमे होहल्ला, अत्याचार हो चकचकी गीभी सहेरी फरइ कि मखे ?” ।

गुली फरई चाँर आमलान उम्कई जुयन उइत जीन हत्कि – “चार्ली, बल्नि गक्तेङ उइ धोन्जु । थमु आरामन निरकासीन, जी थय निरकु बाधा पु¥याएरी चाहेइमोजुगी ।”“जन्त थाहा दम, छि हात्त उ दोखुङ हङन चोनन तर सत्य वा उतु खेङ्की विगत ङादँन्नसी जी बल्निय १ घडिन्नसी ४ घडी टुल्के दाँतिकु गुल्पनुङ डिङ मद । उ ब्यलाकु मी पेन दोखुनुङ निरकु चोनहिन् । प्रकृतिय सुमधुर संगीत स्पष्ट ताइदम हो उ संगीत थिनायु साक्कु हो मनमोहक संगीत उ दुनियाकु मेवु हातिङ संगीत मद । ल ल आउ उइ फरन । तर जीन खँलाई फरगी हङन मेस्त गुनतङ दहत । छिनुङ मेबु मी चोन्ङ खँ दालाउ ना ।”

उलि खँ लायन चार्ली जि वङ मोवङ वास्तातु मयङन मिखा तिसियन लितङ सुम्मके डिन । जिन आमत “शुभरात्री ” हङन पित यर्गि तर उ स्तब्धतुङ जुयन चोन । चार्लीेय कुठालान पित ययन नर्सिङ स्टेशन थेन्ङ जन्त चार्लीय खँलाय क्षमताय बारेकु लितङ शंका लगैजुर । जन्त आम जम्मै घटना माङस खेङ हङन लोखुन ख्वाल सियन आराम यत्कि । केसिखुनु म्यानेजरत आम खँ हरिरा महरिरा हङ दोधारकु चच्छि काटेत्कि ।
नर्सिङ होमय नियम कानून थे (अनुसार) जिन चार्लीय दोखुनु खँ म्यानेजरत हरिमल्गुजु तर जिन चार्लीय बिस्वासत ट्वाकमठईरी निर्णय यत्कि । बरु चार्लीय उ स्वभावय बारेकु मेबु रहस्यपेनु म्वालिउरी इच्छा लगैजुर जन्त ।

आम खुनु नसि जि ज्यकु बाच्चा फुर्सद जुईहो चार्लीयतुङ कुठाकु थेंउइजु । इथियङन चार्लीनाप जन गत्के समय बितै जुईथालेत्चु । तर चार्ली यउ व्यला जन नाप खँ मालाउजु । गुल्प गुल्प जुकुन खँलाई म्वाल्गुजु ।

थिनु लितङ आमे कुठाकु वन्ङ आमुन ङेन्जु “छन्त संगीत ग्वल्तके मन परैजुर ?” “ बाती बाती मनपरैजुर तर उ अंग्रेजी संगीत मखे, इसि नेपाली संगीत, आम्कुङ लोकसंगीत ।” जिन ङिलेन हत्कि । आमुन जन्त हत्चु – “धत् हाति हङ यिनागु ? संगीतकयङ गुङ भाषा हो सीमित क्षेत्र गिबिङ जुररा आले धमरा ? जि थिमा थिगुर जमानाय बेलायतय ड्वाकु संगीतकार खेङ । जन मनपरैजु वाध्य गितार खेङ । गितारतुङ जन जीवन बनैजु थिगुर ब्याला । तर प्रकृतिकु तुङ गितार, पियानोय सोयन साकु संगीत हल्गु जुयनचोन । गु खुनु नसि आम संगीत ङेइ थालेत्कि, गितार हो पियानो फिक्का लगैजुर । उ मानवीय कोलाहलकु जुइतवा उ प्रकृतिय संगीत ङेइ बेस्न ठाकौंतु खेङ । तर छिजी मौन जुयन ङेन्स आम्लि ठामक । प्रकृतिय संगीत हङतु मौनता खेङ । प्रकृति मौनकुतुङ ङिल, म्ये हल, प्याखन उर ।

आन्थिजुयलागिन जि यल्पनुङ हतगि–शान्ति हो मौनता सोयन साकु संगीत मेबु हाती मद हङन । लित उ संगीत थुइत हो ङेइत गुङ भाषाय ज्ञान जरुरी मद । उ वा सर्वव्यापी संगीत खेङ । उ त यउसेनुङ ङेइ फरई हो महशूस यरि फरई ।” जिन वा आमे उ खँ मोथुउईजु । चार्ली गत्के ब्याला टुल्के संगीत, मौनता, प्रकृतिय विषयकु हाति–हाति खेङ हङन चोन । आम्लीकु अचानक लुखा गुनानुङ ड्वाक ड्वाक यत्चु, जि पित वन्गि । चार्ली जननाप गहिरो आले गहन खँ लाउजु । जिन आमे ओल्तेचा खँ जुकुन थुउईजु । शायद मेब्सिन मोथुयन ज्यउ आमुन खँलाई त्वार्तय । आमे अनौठो खँपेन ङेइ चाख लगैजु हर्स गुल्प–गुल्परि ग्यारिङ दउजु ।

यल्पनुङ शनिबार हो आइतबार चार्लीय परिवार आम्त नापलरित नर्सिङ होमकु यउजु । थउ परिवारनापङ चार्लीन हातिङ खँ मालाय थें अभिनय यकुजु । थिनु चार्लीत उ विषयकु ङेन्गी– “चार्ली थउ परिवारनाप खँलाई माया रा ?” “परिवार ? थिमा मिय लागिन थउ परिवार थे बिरानो गुन जुयौं ? मेबु वा टायन जुयन टायन लगैजुर तर थउ परिवार थउनाप जुयनुङ गुलि टायन लगैजुर ? उ खँ जन थउ जीवनलान थुय हो भोगेङ खँ खेङ । जन्त बाँलस्के थाहा दम जन परिवार जि सिङ खुनु बेस्न खुशी जुइतन ।

जि सिङनि आपेन जन्त नापलरित यई मल्गु झण्झटलान छुट्कारा नापलरितन । जन्त थाहा दम, उ नर्सिङ होम थिगुर प्रतिक्षालय खेङ । उकु चोङन मीपेन मृत्युत पियन चोनहिन् । प्रत्येक परिवारन थउ बा–मात उकु त्वार्त वङननी आप्सिन मृत्युय खबर ङेइत म्वालेन चोनहिन् । उ दोखुनु खँ ङेङेननुङ जि दुःखी मोजुगी । जिन वा जम्मै धर्तीत तुङ प्रतिक्षालय बार्फरगि ।

नर्सिङ होमकु चोंई थालेङ केही महिना दुपान चार्लीय स्वास्थ्य बाँलकु जुइ थालेत्चु । आम हृष्टपुष्ट जुयन मोटै जुर । उलुकु चार्लीत नर्सिङ होमलान डिस्चार्ज यङन छेँ छोइरी खँ जुयन चोन्गु । जिन छेँय खँ थुई म्वाल्गि आले आम्त थिनु ङेन्गी – “चार्ली थमु चार्हेस छेँ उई फरगु ।” आमुन ङिलेन हत्चु – छेँ ? जि छेँ उई मजि । जन परिवारन यउ चाहैमोजु । तर जन्त छेँ यई हो मयईकु हातिङ पाउ मद हात्त हर्स जि लछिङ म्वाम्वात्कि । उ खँ जन्त बाँलस्के थाहा दम ।” चार्लीन जन्त हत्चु ।

जिन आम्त उलि जुकुन हत्गि “चार्ली थमुन खाली यिनागु वाहियात खँ जुकुन लारगु । थमु स्वस्थ हो फूर्तिलो जुरगु तुनि । आले गिबि सिरिरि खँ लारगु” “आन्थिजुयलागिन वा हतगि, छन्त । सिरी हाखेन जम्मै मिय स्वास्थ्य बाँलकु जुर । उ आमय शरिरय कारण मखे बरु आमे दुपानय उर्जाको कारणन खेङ । गिथि यङन सिरि टेन्ङ इतार बेस्न चहकिलो च्यात, आउ जि आमतु अवस्थाकु चोनगी ।” चार्ली थउ सिरिउरि खँकु निश्चित रुपन हङन चोङ्गुजु ।

जन्त चार्लीय खँ पत्यार लगै मोर्जुसङ हातिङ विवाद मेयेङन सुम्मके कुठालान पित यर्गि । अन्ततः चार्ली नर्सिङ होमकुतुङ चोङ्गु जुर । आमे परिवारन आम्त छेँ यईत अस्वीकार यत्चु । चार्लीन जननाप खँलाय सो हप्ताकु जि ज्य धोन्के छेँ उईटेन्ङ मुलकु मोबाइलकु थिगुर म्यासेज यर । आकु चोयन तउ । छिजि सेवाग्राही चार्ली नक्क सित ।” आम जिन ज्य यङ नर्सिङ होमलान जन्त छुसाय सन्देश खेङ । केसि खुनु ज्यकु वन्ङ नर्सिङ होमय चोकेय पाटीकु थिगुर चोय खँ टाँसेङन तउजु – “आउ यउ सोमबार चार्लीय मालामी उइत कर्मचारीपिस्त कृपया प्रशासनकु जानकारी यतुन ।” जन्त विश्वास यरित ठार्कौ जुर्सङ चार्ली सन्नानुङ सिकु खेङ ।

जन नसपुटिकु चार्लीय आमतु भनाइ गुंजै जुर – “जि लछिङ पुरा म्वाम्वात्कि ज्यउ ।”