Aug 19 2026 | २०८३, भाद्र ३ गते
२०८३, भाद्र ३ गते
Aug 19 2026 | २०८३, भाद्र ३ गते
चिचाबाखन्
रमानन्द थन्केसि याकर्चा ओर्गसी सिमाय् पुलकु च्वँगन् आम्तु सिमाय् काँचापेन् व लप्तीपेन् स्वयेन् टोल्है जुयेन् च्वँगन् च्वंगु खोइँदम् । गु ब्यलाकु प्याटा वारेउ, गु ब्यलाकु हाति नइमलेउ हातिं वास्ता मद । आमु सिमाय् काँचाकु च्वइँत गुंिलं थरीय् जाङलपेन् ब्वयेन् ययेन् च्वनहिन् वनहिन् गर्छि चिलिंमिलिं न हलहिन् लितं थउ ठाइँकु ब्वयेन् ओनहिन् ।
तर न आमू जाङलपिसिन् रमानन्द आँकु ययेन् च्वंगु कारण क्येनहिन् न रमानन्दन् आम जाङलपिस्त हात्त हलमिन्, हात्त ओहोरदोहोर येतमिन् हँगन् न्येइत वास्ता तउजुर ।
रमानन्द त वा बेस्न चर्कोङन् च्वंगु नेभार त किङन् सिच्चके बियेन् तउ समिाय् जुकुन् मतलब दमु, आले आमु ओँगयेन् च्वंगु लप्तिन् बिय् प्राकृतिक अक्सिजन्न थउ नुगरकु बल थपेँगन् बिय् खँ नाप जुकुन् मतलब दउ थिनागु चायेन् आनन्द कायेन् च्वंगु थिनागु लगैजुर । आन्थिनुं आमे मन थिरकु म्वचों ।
आम सिमाय् काँचा देपान् ययेन् च्वन्दयेउ कस्मिलिपेन् हल्नसिन् बेकारकु अर्थ मदके भाषण बिउ नेतापेन् थिनागु लगैजुर, आले लित कोकपेन् ययेन् का का येँगन् हल्न ड्वाक्ड्वाकु नेतापिसिन् येल्पनु थिता खँ त पुल्के पुल्के भाषण बियेथेँ जुररा मसिगी राकन रमानन्दन् जुरुक्क डोँगन् लुङान् कके ख्याँगन् लियेन् छोइरा हँगथेँ हुँच्चके स्वरै, आन्थिनु थउ नुगर त क्वाट्टके तयेन् बरु नस्पुटि तियेन् च्वन, जाङलपिस्त लियेन् म्वछोउ ।
रमानन्दय् मनकु आमु जाङलय् जीवन व नेतापे जीवन थिगुरतु थिनागु तु लगैजु्र । हात्त हर्स जाङलपिसिन् थिता भाषासिवाय् मेबु भाषा न्वन्माहाउ, नेता पिसिनुं थिता खँन् बाहेक मेबु खँ ट्वाक्स्याँगन् न्वन्हाइमसहिन् । येल्पनुं सर्वहारा, समृद्धि, समानुपातिक व सचेतना बाहेक हातिं हरि मसहिन् गिथि कि कोक हल्न राक येर्सं काँ..काँ… रसतार्सं काँ…काँ… जुकुन् सर पितकायेन् हलहिन् ।
आन्थिनुं रमानन्द त नेतापे अर्थमदउ भाषण स्वयेन् जाङलपे थउ खुशीन् हले सर तु साक्कु तायेन् आमु ओर्गसी सिमा पुलकु च्वइँत रसताय् खोइँदमु ।
बिके श्रेष्ठ पासा
१९९७–०७७–०७८
© 2026 All right reserved to bampijhyala.com | Site By : Sobij
