ब्यालाय् ल्याखाःन् स्वर्न न्हुलु न्हुलु खँग्वारा (शब्द) पितयेर, येउता खँ लार्नसिनुं पिपान देशय् खँग्वारा नाप मछ्यात्के नयेतेक् माङा ! थेट् द्वाल्खाय नेवारी भाषान् हत्नसिन् कोखुर स्वन हङ थेँ, येरिन्चाउ खा थेँ, बहर सा थेँ हरिमल्नसिन् छिजि झिम्सोँद झिम्पिद दउ मुचापिस्त पर्वते भाषान् ’किशोर किशोरी’ हतहिन्, पिपानय् अंग्रेजी भाषान् ’ टिनएजर’ हतहिन् । भातिचा थातय् दँकु च्वंगुपिस्त वा ल्यास्म्हा व ल्यासिमिसा हतहिन् उ दोखुसेनुं सियेताय् खँ खेउँ, आन्थिनुं आमुस्वेन् हाखेनय् मुचापिस्त हाति हङन् हरिउरि ले ? थपिसिन् सिरगु हर्स थउ खँ तयेन्दिलौ हङन् थिगुर ब्वय् खँ तैत अनुमति कार्गु ना ।

थन्केसिय् कोखुर ल्याखाःय् मिसाओन्सा मुचापिसिन् थउ ब्वङ कुठीकु ब्वइँमल्गु साँफर स्वयेनुं घत्के ब्याला मेब्मेबु साँफर ब्वइँ त हाखेन तयेन् येउ खँ उकु पित ययेन् च्वन । साँफरकुठी (पुस्तकालय) कु स्वर्सं, छेँकुठाकु स्वर्सं थन्केसि थउ त मल्गु विषयगत साँफरलान् स्वयेनुं पिपानय् साँफर ब्वंगुपेन् घत्के ख्वइँदमु । उकु चिचा अथवा मुचा ल्यास्म्हा व मुचा ल्यासिमिसा मुचापिसिन् माया व प्रेमय् खँ द साँफर ब्वनहिन् हङनन् थिगुर म्वाले ज्येखँकु सिदयेन् येउ दमु ।

घत्के थेँ आनागु खाले साँफरकु ’समर लभ, साया, गुलाबी जवानी, मधुमुस्कान्, मात्र प्रेमासक्ति’ थिनागु साँफरपेन् ब्वंगुपेन् येक्कु पितययेन् च्वंगु दम । गुनान् गुनान् रि ’थ्रिलर एक्शन, मारधाड, लुटेरा’ हङ साँफर ब्वइँ रसताहिन् । अझ घत्के ब्वङनुं थुइ ठाकउ (सस्पेन्स) बाखन्पेनुं म्वालेन् म्वालेन् ब्वंगुपेनुङ् दमु । तर यिनागु हङ थिनागु साँफर छिजि देशकु मदनि थिप्ट निस्पट गिबिङ् गिबिङ दमु । जासुसी उपन्यासपेनुं दमु आन्थिनु सर्सं मसर्सं, थुर्सं म्वथुर्सं पिपानय् मिपिसिन् च्वय् साँफरतुब्वइँ रसताउपेन् येक्कु दउ खँ सिदयेन् येउ दमु ।

नेपाल देशय् थिम्हा उपन्यास साँफर च्वउ मिन् हङथेँ तु ब्याला ओँसिके यिनागु साँफर पितकाइ फर्जुहर्स थउ देश दुपानय् तु साँफर ब्वंगुपेन् अझ घत्के दयेन् येइफरै । थउ तु भाषालान् आनागुखालेय् साँफर च्वउ मिपिसन् ब्याला ओँसियेन् कलम हाखेन येन्जु हर्स दोखुसेलागिन् भिंगु ब्याला येइत लिमाबारेउ हङन् तये खँ पितयेउ दमु ।