Oct 10 2026 | २०८३, आश्विन २४ गते
२०८३, आश्विन २४ गते
Oct 10 2026 | २०८३, आश्विन २४ गते
नेपाल सम्वत् ११४६, दिल्लागाः १ प्रतिपदा (१४ साउन, २०८४, ३० जुलाई, २०२६) बिहीबार, बाँपिझ्याला । दोलखाको विगु गाउँपालिका–२, पल्लो देउलाङकी एक महिला वडा कार्यालयको काम सकेर घर फर्कने क्रममा हार्चे खोलाले बगाउँदा बेपत्ता भएकी छन्। घटनापछि स्थानीयवासी, जनप्रतिनिधि र सुरक्षाकर्मीको समन्वयमा उनको खोजी कार्य तीव्र रूपमा अघि बढाइएको छ।
बेपत्ता हुनेमा विगु गाउँपालिका–२ पल्लो देउलाङ निवासी पती तामाङ रहेकी छन्। वडा कार्यालयमा आवश्यक प्रशासनिक काम सम्पन्न गरी उनी बिहीबार करिब साढे ३ बजे घरतर्फ हिँडेकी थिइन्। घर फर्कने क्रममा करिब ४ बजे हार्चे खोला तर्ने प्रयास गर्दा खोलाको तीव्र बहावले उनलाई बगाएको विगु गाउँपालिका–२ का वडा अध्यक्ष दीपक ठकुरीले जानकारी दिए।
वडा अध्यक्ष ठकुरीका अनुसार पती तामाङ त्यसबेला एक्लै घर फर्किरहेकी थिइन्। उनलाई खोलाले बगाएको दृश्य सोही वडाका स्थानीय काले तामाङले प्रत्यक्ष देखेका थिए। उनले तत्काल गाउँमा खबर गरेपछि स्थानीयवासी घटनास्थल पुगेका थिए।
घटनाबारे जानकारी प्राप्त हुनासाथ स्थानीयवासी, जनप्रतिनिधि तथा सुरक्षाकर्मीको टोलीले खोजी सुरु गरेको थियो। खोलाको बहाव तीव्र भएका कारण खोजी कार्यमा कठिनाइ भइरहेको जनाइएको छ। यद्यपि सम्भावित स्थानहरूमा निरन्तर खोजी जारी रहेको वडा कार्यालयले जनाएको छ।
हालसम्म पती तामाङको अवस्था खुल्न सकेको छैन। सुरक्षाकर्मी र स्थानीयवासीले खोलाको तल्लो तटीय क्षेत्रसम्म खोजी कार्यलाई विस्तार गरेका छन्। मनसुनका कारण जिल्लाका अधिकांश खोला तथा नदीमा पानीको बहाव अत्यधिक बढेकाले स्थानीय प्रशासनले अत्यावश्यक कामबाहेक खोला तर्ने वा जोखिमपूर्ण स्थानमा आवतजावत नगर्न सर्वसाधारणलाई आग्रह गरेको छ।
यस घटनाले मनसुनका बेला बढ्दो प्राकृतिक जोखिमप्रति पुनः सचेत रहनुपर्ने आवश्यकता औँल्याएको छ। स्थानीय प्रशासनले मौसम प्रतिकूल रहेका बेला विशेष सावधानी अपनाउन सबैलाई अनुरोध गरेको छ।
१९९७–०७७–०७८
© 2026 All right reserved to bampijhyala.com | Site By : Sobij
