ओंगु बैशाख ३० गते जु स्थानीय चुनावकु त्याँगन् दिउ भीमेश्वर नगरपालिकाय् मूलमि मेयर भाजु ईश्वर नारायण मानन्धर, उपमेयर मयजु कमला बस्नेत, वडानाय्पेन् दोखुसेतं मुङन समकालीन एकता समाज द्वाल्खा–काठमाडौ आले नाय् आले समाजसेवी मयजु सकुना श्रेष्ठय विशेष पहलकु ग्वसाग्वय् ज्य खँ धोन् । ईथिनु उ ज्य खँकु ग्वाहार यङन दिउ कुठी कालिन्चोक युवा क्लव, द्वाल्खा गुठी, लायन्स क्लव अफ द्वाल्खा, बनारसी सहयोगी हातहरू, छिजि द्वाल्खा डोबर, साथी कल्याणकारी समुह, साथीका लागि साथी समुहन् ग्वाहार बियेन् ङाकेय् बधाई व सगुन् बिये ज्येखँ मेघय् न्हिखुन्हु रसताइदके धोन ।

थउ बुय् ठाइँय् भाषा, कला, संस्कृति, नखतचखत, परम्परा त म्वात्के तइय् लागिन् गुल्पनुं लिमचिल्गु मयजु सकुना श्रेष्ठन् भौतिक ल्याखाःन् लुङा चा ल्वाप्ठोँगन् कुँ बुइ मफर्सं थउ गच्छेय् ल्याखाःन् ढ्याबान् ग्वाहार बियेन् द्यउ देगल दकेइत ड्वाकु ज्येखँ येँगन् ययन चोङन दिरहिन् । मयजु सकुना त गुं राजनीतिक पार्टी दलय् मतलब मद, येउ पार्टीय् मिपेन् त्याँगन् येर्सं द्वाल्खाय् उन्नति थयेत् द्वाल्खा त बाँलकु थदकेउ हँगन् बाँलकु टोँगन् च्वंगु थिम्हा दयाय् भावना दउ मिसामि खेउँ ।

उ स्वयेन् हाखेन येउ संघ संस्थान् येउता ज्येखँ ग्वर्सं द्वाल्खाय् हितय् लागिन् ज्येयेरि टेनइ हँगन् ङिलेन् ङिलेन् बुन्चा फेंंगु दानदेवी मयजुु सकुना खेउँ । गुनुं मफउ जुर, गुन्तं वासर येरिमफयेन् लासाकु डिँगन् च्वन हँगन् खँजुकुन् तार्जुृ हर्सं गिथियेँगन् जिर आमु मित उपकार येरिलागिन् हाखेन लिँगाउ मैजु खेउँ सकुना श्रेष्ठ मलेकु ।

यिनागु कल्याणकारी मन दउ मयजु सकुनान् थन्केसि थउ नाप ब्वँगु साँगतपिस्त ग्वार्मुुङन् थिगुर हातिं उद्यमशील ज्ये येँगन् ज्ये मदउ पिस्त ज्ये येत्केइरि, ढ्याबा मदयेन् हातिं ज्येखँ येरि म्वखोँगन् च्वंगुपिस्त ग्वाहार बियेन् ज्ये येत्केइरि उद्देश्य तयेन् समकालीन एकता समाज नेपाल हँग खलक दकेय् खेउ ।

उ समकालीन एकता समाज हँग मेमेबु संस्थाथेँ दोखुनु दुजपेन् दकेयेन् ओप्तेचा ज्ये ग्वयेन् सुम्मके च्वंगु मखे कि थउ दुपानय् दुजपे नापतु लच्छिन् थिपुल ढ्याबा ग्वार्मुँगन् कोष दके आम्त आयमूलक व श्रममूलक ज्येकु लगानी येरिउरी उद्देश्य खेउँ हँगन् थुकेर्स बाँलरेउ ।

मेघय् ज्ये खँकु द्वाल्खाय् मेमेबु संघसंस्थापे नाप ज्याँगन् द्वाल्खाय् मेयर व उपमेयर आले वडाध्यक्षपिस्त बधाई व सगुन बिइउरिकु ज्य खँकु दोखुनु स्वयेन् ड्वाकु ल्हाहा मयजु सकुना श्रेष्ठ मलेकुय् तु दमु । सकुनान् थउ नीजि ल्याखानुं उ ज्ये येरिमफउ मखे, चुनावकु त्याँगन् येउपिस्त बधाई बियेन् स्वगुन् नके आपे ल्हाहालान् थउ त हातिं थद हँग स्वार्थ तइमल्गु जरुरी मद खोईदम ।

छिजि ठाँईकु हातिङ ज्य खँ यरीमल हङन टुटी बात्चा जकुन चिल्स लिखनलान् छिकुपेन मदउ मफे । तर ईनागु हातीङ बाँमलकु ज्य खँत वास्ता मयन थउतु ल्याखाः न् ज्य खँ समाजसेवी सकुना श्रेष्ठ यङन ययन् चोङन दिरहिन् ।

थनुकेसी थउ नाप ब्वङ आले मिलईजु साङतपेन ग्वारमुङन समकालिन एकता समाज नेपालय् नामलान् ज्य खँ हिल्के ययन चोन । तर उ ज्य खँ गुलीङ मिपिस्त मनपईज मोजुई फरई हर्स गुलिङ मिपिस्त मन परई जुईङ फरई ईनागु दातीकु ज्यखँ यर्स झन हाखेन उईत ग्वाहार मिलई जुर हङन बाँलकु ज्य खँ यरी म्वाले खोईदमु ।

मेघय् ज्येखँकु सहभागी जु मिपे ल्याखाः स्वर्न उ समकालीन एकता समाज नेपालय् ज्येखँ खोँगन् दोखुनुं रसताये खोइँदमु । उ ज्येखँ गुल्पनुं मधियेन् थिगर ओप्तेचा ट्वाल्ननसि ड्वाकु देशटुल्के नाम जाके थथेङ् हँगन् इसिन् बाँलकु टोनगु ।