नेपाल सम्वत् ११४५, चौलाथ्वः १४, चर्तुदशी (२९ चैत्र, २०८१, ११ अप्रिल, २०२५) शुक्रवार, बाँपीझ्याला । मणि कुमार लामाको एक गोल र असिस्टमा एफसी चितवनलाई २-१ ले पराजित गर्दै ललितपुर सिटी एफसी नेपाल सुपर लिग (एनएसएल) २०२५ को शीर्ष स्थानमा उक्लेको छ ।
त्रिपुरेश्वरस्थित दशरथ रंगशालामा बिहीबार भएको खेलमा मिडफिल्डर मणि चम्किए । उनले पहिलो गोलका लागि असिस्ट गर्दा दोस्रो गोल आफैँ गरे ।
यस सिजन दोस्रो जितपछि ललितपुर चितवनलाई नै पछि पार्दै शीर्ष स्थानमा उक्लेको छ । ललितपुरले ४ खेलबाट ८ अंक जोडेको छ । पहिलो हार व्यहोरेको चितवन ४ खेलबाट ७ अंकसहित दोस्रो स्थानमा झरेको छ ।
खेलको तेस्रो मिनेटमै इमोह इजेकेलले गोल गर्दै ललितपुरलाई अग्रता दिलाएका थिए । उनले मणि लामाको फ्रिकिकमा हेड मार्फत गोल गरे ।
सुरुमै गोल खाएपछि चितवन बराबरी गोल फर्काउन संघर्ष गरिरहेको थियो । चितवनका लागि भिक्टोर मानसारले ७४औ मिनेटमा बराबरी गोल फर्काए । तर चितवनको बराबरीको खुशी लामो समय टिकेन।
मणि लामाले ८०औं मिनेटमा गोल गरेपछि ललितपुरले फेरि अग्रता बनायो । ललितपुर यस सिजन लगातार चार खेलमा अपराजित रहेको छ ।
