नेपाल सम्वत् ११४५, प्वहेलाथ्वः ४, प्रतिपक्ष (१९ पुष, २०८१, ३ जनवरी, २०२५) शुक्रवार, बाँपीझ्याला, दोलखा । बागमती प्रदेश सरकारले दोलखा जिल्लाको लामाबगर सहीत प्रवेश मार्गमा आफ्नो अत्याधुनिक चेकपोस्ट निर्माण गर्ने भएको छ ।
यसरी प्रवेश चेकपोष्ट निर्माणक्रममा पहिलो चरणमा मधेश प्रदेशसँग सीमा जोडिएको मुख्य प्रवेशमार्ग चेकपोस्ट निर्माण सुरु गरिने भएको छ ।
बागमती प्रदेश सरकारले सुरुमा हेटौंडा–१५ स्थित रातोमाटे र सिन्धुलीको भिमानमा चेकपोष्ट निर्माण गर्ने भएको छ । यसै गरी प्रदेश सरकारले पहिलो चरणमा रातोमाटेसहित सिन्धुलीको भिमानमा चेकपोस्ट निर्माण गर्ने भएको हो ।
दोस्रो चरणमा चितवनको नारायणगढ मुग्लिनमा तथा तेस्रो चरणमा दोलखासहित चार स्थानमा चेकपोष्ट निर्माण गरिनेछ । तेस्रो चरणमा दोलखाको लामाबगर, सिन्धुपाल्चोकको कोदारी, सिन्धुलीको नागथान र रसुवाको रसुवागढीमा चेकपोष्ट निर्माण गरिने भएको हो ।
चेकपोष्टमा सवारी साधनको निरिक्षणका लागि अत्याधुनिक मेसिनसहित सीसीक्यामेरा र सुरक्षाकर्मी परिचालन गर्ने बागमती प्रदेश सरकारको योजना रहेको जनाएको छ ।
आज मुख्यमन्त्री बहादुरसिंह लामाले हेटौंडा–१५ रातोमाटेस्थित चेकपोष्ट निर्माणस्थलको अनुुगमन गर्नुभएको छ । उहाँले स्थानीय तहसँग समन्वय गरेर चेकपोस्ट निर्माणस्थलको अनुुगमन गर्नुभएको हो ।
आन्तरिक सुरक्षा अवस्था थप बलियो बनाउनका लागि प्रदेशको प्रवेशमार्गमा चेकपोष्ट निर्माण गर्न लागिएको मुख्यमन्त्री लामाले बताउनुभयो ।
