नेपाल सम्वत् ११४४ थिंलाथ्वः ११(२६ मंसिर , २०८१) डिसेम्बर ११, २०२४ , बुधबार, बाँपीझ्याला ।संयुक्त राज्य अमेरिकाले कम्प्युटर फायरवाल ह्याकिङमा संलग्न भएको आरोपमा चिनियाँ नागरिक गुआन तियानफेङ र उनका सह–षड्यन्त्रकारीहरूको गिरफ्तारीका लागि जानकारी दिने व्यक्तिलाई एक करोड डलरको पुरस्कार घोषणा गरेको छ। ३० वर्षीय गुआन चीनको सिचुआन प्रान्तका निवासी हुन्, र उनलाई कम्प्युटर धोखाधडी तथा तार धोखाधडीको षड्यन्त्रमा संलग्न रहेको अभियोग लगाइएको छ।
गुआन सिचुआन साइलेन्स इन्फर्मेसन टेक्नोलोजी कम्पनी लिमिटेडका लागि कार्यरत थिए। उक्त कम्पनीमाथि अमेरिकी अर्थ मन्त्रालयले प्रतिबन्ध लगाएको छ। अभियोगअनुसार गुआन र उनका सह–षड्यन्त्रकारीहरूले बेलायतको साइबर सुरक्षा कम्पनी सोफोस लिमिटेडका फायरवाल उपकरणमा कमजोरीको फाइदा उठाएका थिए। २०२० को अप्रिलमा, ८१ हजार फायरवाल उपकरणमा एकसाथ आक्रमण गरिएको थियो, जसले प्रयोगकर्ताहरूको नाम, पासवर्ड तथा अन्य संवेदनशील जानकारी चोरी गर्न र रानसमवेयर फैलाउन सहयोग गर्यो।
यस ह्याकिङ आक्रमणबाट अमेरिकामा मात्र २३ हजार फायरवाल प्रभावित भएका थिए, जसमा ३६ वटा महत्त्वपूर्ण पूर्वाधार कम्पनीका प्रणालीहरू थिए। यदि सोफोसले कमजोरी पत्ता लगाएर तुरुन्त प्रतिक्रिया नदिएको भए, क्षति अझ गम्भीर हुन सक्थ्यो।
अमेरिकी न्याय विभागका अनुसार सिचुआन साइलेन्सले ह्याकिङबाट संकलित डाटा चिनियाँ व्यवसाय र सरकारी संस्थाहरूलाई बेचेको थियो। अमेरिकी सुरक्षा अधिकारीहरूले गुआन र उनका सह–षड्यन्त्रकारीहरूका गतिविधिले विश्वव्यापी साइबर सुरक्षामा खतरा उत्पन्न गरेको बताएका छन्।
