नेपाल सम्वत् ११४४ कछलागाः १२.८ (१३ मंसिर , २०८१) नोभेम्बर २८, २०२४ , बिहिबार, बाँपीझ्याला ।सोलुदुधकुण्ड नगरपालिका–३ मा रहेको पिकेडाँडा र ज्वालामाई मन्दिरजस्ता महत्वपूर्ण पर्यटकीय र धार्मिक गन्तव्यहरू सञ्चार सेवाको अभावका कारण समस्यामा परेका छन्। नेपाल टेलिकमको कमजोर नेटवर्क र अन्य सेवा प्रदायकको अनुपस्थितिले यहाँका स्थानीय बासिन्दा र पर्यटकले सञ्चार समस्याका कारण सास्ती भोग्नुपरेको छ। सदरमुकाम सल्लेरीसँग जोडिएको भए पनि पिकेडाँडा र ज्वालामाई मन्दिर क्षेत्रमा भरपर्दो सञ्चार सेवा उपलब्ध नहुँदा यात्रु र पर्यटकहरू अलमलिने, बाटो भुल्ने र उद्धारमा ढिलाइ हुने समस्याहरू सामान्यजस्तै बनेका छन्।
पिकेडाँडाको पर्यटकीय महत्व र समस्या
चार हजार ६५ मिटर उचाइमा रहेको पिकेडाँडा सगरमाथा, ल्होत्से, मकालुजस्ता हिमालहरूको अवलोकनका लागि चर्चित गन्तव्य हो। यहाँ सुनपानी, चिमल, र लालीगुँरासजस्ता हिमाली वनस्पतिले पर्यटकलाई आकर्षित गर्दै आएका छन्। सिजनमा करिब १५ हजार स्वदेशी तथा विदेशी पर्यटक यहाँ आउने गरेका छन्। यद्यपि, कमजोर सञ्चार सेवाले पिकेडाँडाको पर्यटकीय सम्भावना र सुविधामा बाधा पु¥याएको छ।
पर्यटकले भ्रमणका क्रममा साथीभाइसँग सम्पर्क गर्न नसक्दा रातभर हराउने र उद्धारमा ढिलाइ हुने समस्याहरू देखिने गरेको स्थानीय व्यवसायी र पर्यटक गाइडले बताएका छन्। पाँच वर्षअघि एक पर्यटकको बाटो भुलेर ज्यान गएको घटना पनि कमजोर सञ्चारको प्रतिनिधि उदाहरण बनेको छ।
धार्मिक आस्थाको केन्द्र ज्वालामाई मन्दिर
ज्वालामाई मन्दिर चिताएको पूरा हुने धार्मिक आस्थाको केन्द्र मानिन्छ। यहाँ हरेक वर्ष करिब ३० हजार भक्तजन आउने गरेका छन्। तर, सञ्चार सेवाको अभावले भक्तजनले पनि यात्रा र सम्पर्कमा समस्या भोग्नुपरेको मन्दिर व्यवस्थापन समितिले जनाएको छ। धार्मिक पर्यटकले पनि नेटवर्क नहुँदा निराशा व्यक्त गर्ने गरेका छन्।
स्थानीयको गुनासो र समाधानका प्रयास
स्थानीय बासिन्दा र व्यवसायीले पटकपटक गुनासो गर्दा पनि समस्या समाधानमा ठोस चासो नदेखाइएको आरोप लगाएका छन्। सल्लेरीस्थित च्यानडाँडाको रेडियो लिङ्कको क्षमता विस्तार गर्ने प्रयास भए पनि समस्या जटिल रहेको नेपाल टेलिकमका अधिकारीले जनाएका छन्। नयाँ टावर स्थापना गर्न थप बजेट र पूर्वाधारको आवश्यकता रहेको बताइएको छ।
वडाध्यक्ष र पर्यटन व्यवसायीले भरपर्दो सञ्चार सेवाको विकास गर्न सरकार र सरोकारवालालाई सहयोग गर्न तयार रहेको बताएका छन्। पिकेडाँडा र ज्वालामाई मन्दिरको पर्यटन र धार्मिक महत्वलाई बचाइराख्न दिगो सञ्चार सेवा उपलब्ध गराउनु आवश्यक रहेको सरोकारवालाको भनाइ छ।
