नेपाल सम्वत् ११४५, कछलागाः त्रयोदशी, (१३ मंसिर, २०८१, २८ नोभेम्वर, २०२४) बुधबार, बाँपिझ्याला । भक्तपुरको गठ्ठाघर चोकमा ट्रकले स्कुटरलाई ठक्कर दिंदा एक जनाको मृत्यु भएको छ भने अर्का एकजना घाइते भएका छन् ।
भक्तपुरबाट काठमाडौंतर्फ जाँदै गरेको ना ८ ख २३११ नम्बरको १२ चक्के ट्रकले आज बिहान ७ बजे सोही दिशातर्फ गइरहेको बा.प्र. ०२-०३८ प ४४०१ नम्बरको स्कुटरलाई ठक्कर दिंदा एक महिलाको मृत्यु भएको हो ।
मृत्यु हुनेमा ४१ वर्षीया नवीना देउला रहेको जिल्ला प्रहरी परिसर भक्तपुरले जनाएको छ । उनको उपचारको क्रममा भक्तपुर इन्टरनेशनल अस्पतालमा आज बिहान पौने ८ बजे मृत्यु भएको हो ।
दुर्घटनामा नबिनाका श्रीमान् जिते देउला घाइते छन् । उनको उपचार नागरिक अस्पतालमा भइरहेको छ । उनी राष्ट्रिय सेवा दल सुन्धाराका कार्यालय सहयोगी हुन् ।
ट्रक चालक मकवानपुरगढी–४ का ३८ वर्षीय बुद्ध बहादुर घलानलाई प्रहरी वृत ठिमीले नियन्त्रणमा लिएको छ ।
गत साउन ३१ गते विहीबार दिउँसो गठ्ठाघरमा ट्रकले एक स्कुटरलाई ठक्कर दिँदा एक जनाको मृत्यु हुँदा स्थिति तनावग्रस्त भएको थियो ।
