नेपाल सम्वत् ११४४ कछलाथ्वः ७ (२३ कार्तिक , २०८१) नोभेम्बर ८, २०२४ , शुक्रबार, बाँपीझ्याला । भक्तपुरको कमलपोखरीमा यसवर्ष छठ पर्व विशेष उत्साहका साथ मनाइएको छ। झकिझकाउ बत्तीले सजाइएको पोखरीको किनारमा झिलिमिली प्रकाशका बीच भक्तपुर र वरपरका तराईवासी समुदायले परम्परागत पूजा अर्चना गरेर यो पर्व मनाएका हुन्। व्रतालुहरू पोखरीमा अस्ताउँदो सूर्यलाई अर्घ दिँदै जलाशयमा उभिएर छठी देवीको पूजा गरे। छठको यस विशेष अवसरमा पोखरीको वरिपरि घेराबन्दी गरी बत्ती बालिएको थियो, र तराईबाट भक्तपुरमा बसोबास गरिरहेका तराईवासी समुदायले यो पर्वलाई स्थानीयसँग मिलेर मनाए।
यो पर्व विशेष गरी तराईका समुदायले मनाउने भए पनि पछिल्ला केही वर्षयता भक्तपुरमा पनि स्थानीयहरूले तराईवासीसँगै सामूहिक रूपमा मनाउन थालेका छन्। भक्तपुरका कमलपोखरीमा छठ मनाउने प्रचलन झण्डै १० वर्ष पुरानो भइसकेको छ। यसवर्ष १५० भन्दा बढी परिवारहरूले यो पर्व मनाएका छन्, जसमा स्थानीयहरूको सहभागिता पनि उल्लेखनीय देखिन्छ।
छठको चार दिन लामो विधिमा पहिलो दिन ‘नहाय-खाय’को रूपमा मनाइन्छ, जहाँ शुद्धता र साधारण भोजनको महत्त्व छ। दोस्रो दिन खरना, जसमा व्रतालुहरू दिनभर उपवास बसेर साँझमा खीर खाँदै आफ्नो आत्मशुद्धिको प्रतीक मान्छन्। तेस्रो दिन अस्ताउँदो सूर्यलाई अर्घ दिइन्छ भने चौथो र अन्तिम दिन उदाउँदो सूर्यलाई अर्घ दिएर यो पर्व सम्पन्न गरिन्छ। छठको मुख्य आकर्षण भनेको जलाशयमा उभिएर सूर्यलाई अर्घ दिइने परम्परा हो, जसले परिवारको कल्याण र समृद्धिको कामना गरिन्छ।
सम्बन्धित समुदायका सदस्यहरूका अनुसार, छठ पर्वले सांस्कृतिक एकता र धार्मिक सद्भाव झल्काउँछ। भक्तपुरमा तराईवासीहरूको सहभागिताले तराई र पहाडी क्षेत्रबीचको सुमधुर सम्बन्धलाई सुदृढ तुल्याएको छ। कमलपोखरीमा गरिएको सामूहिक पूजा, परम्परागत साँस्कृतिक उत्सव र विभिन्न समुदायको सहभागिताले भक्तपुरमा पनि छठ पर्वलाई लोकप्रिय बनाएको छ।
