१३ फागुण, बाँपिझ्याला, दोलखा । तामाकोशी गाउँपालिकामा ट्याक्टर दुर्घटना हुँदा गम्भीर घाईते भएका चनौटेका एक युवकको मृत्यु भएको छ । तामाकोशी गाउँपालिका–३ चनौटेका ३२ बर्षिय बद्री मगरातीको उपचारको क्रममा हिजो साँँझ मृत्यु भएको हो ।
तामाकोशी गाउँपालिका–३ चनौटे स्थित भित्री सडक खण्डमा ट्रयाक्टर ब्रेक फेल भई दुर्घटना हुँदा चार जना घाईते भएका थिए । घाईतेमध्ये मगरातीसहित दुई जनालाई थप उपचारको लागि हिजो काठमाडौँ रिफर गरिएको थियो ।
राप्चेबाट चनौटेतर्फ ढुंगा लोड गरी जाँदै गरेको लु ३ त ३९८७ नम्बरको ट्रयाक्टर अचानक ब्रेक फेल भई सडकको भित्तामा पल्टिँदा ट्याक्टर दुर्घटना भएको थियो ।
यस्तै गरी चालक रामेछापको गोकुलगंगा गाउँपालिका–५ फर्पुका अन्दाजी ३० बर्षिय टार्जन तामाङको धुलिखेलको शाखा अस्पताल किर्नेटारमा र तामाकोशी–३ जफेका ३६ बर्षिय हरी बिकको चरिकोट अस्पतालमा उपचार भइरहेको दोलखा प्रहरीले जनाएको छ ।
