२२ माघ, बाँपिझ्याला, काठमाण्डौं । आज काठमाडौँ उपत्यका बिहानैदेखि धुम्म छ। बिहानैदेखि उपत्यकामा कुहिरो लागेको छ। जाडोका अधिकांश दिन बिहानदेखि सफा देखिने उपत्यकाको आकास सोमबार बिहान भने धमिलो देखियो।
‘पश्चिमी वायुको प्रभाव छ। बादल पनि लागेको छ। त्यसैले हो’, मौसम पूर्वानुमान महाशाखाकी मौसमविद् गंगा नगरकोटीले नागरिकन्यूजसँग भनिन, ‘बिहान यस्तो भए पनि दिउँसो घाम लाग्छ।’ उनले बिहान ९ बजेदेखि नै घाम लाग्ने बताइन्।
नगरकोटीका अनुसार त्यसो त अहिले कोसी, मधेस र बाग्मती प्रदेशमा बादल लागिरहेको छ। यी प्रदेशका अधिकांश स्थानमा मौसम काठमाडौँ उपत्यकाको जस्तै छ। सुदूरपश्चिमको पहाडी भू–भागको मौसम सफा छ। तराईका केही भागमा हुस्सु र कुहिरो लागेको नगरकोटीले जानकारी दिइन्।
‘आज बिहानको न्यूनतम तापक्रम ६ दशमलव ७ डिग्री सेल्सियस छ। न्यूनतम तापक्रम बढ्दै छ’, उनले भनिन्। काठमाडौँ उपत्यकाको न्यूनतम तापक्रम २.१ डिग्री सेल्सियससम्म पुगेको थियो।
