८ माघ, बाँपीझ्याला, काठमाण्डौं । पाँचौं संस्करणको सुदेश मेमोरियल हिमशिखर कप फुटबल प्रतियोगिता माघ १२ गतेदेखि हुने भएको छ । सुनसरीको तरहरा स्थित हिमशिखर स्कूलले वार्षिक रुपमा आयोजना गर्दै आईरहेको सुदेश मेमोरियल हिमशिखर कप फुटबल यसवर्ष माघ १२ देखि १९ गतेसम्म हुन लागेको हो ।
प्रतियोगितामा कक्षा-५ सम्मका १२ वर्षमुनिका विद्यार्थीहरुको सहभागिता रहनेछ । प्रतियोगितामा विजेताले नगद २५ हजार र उपबिजेताले १५ हजारसहित ट्रफी, मेडल र प्रमाणपत्र प्राप्त गर्नेछन् ।हरेक खेलका उत्कृष्ट खेलाडीले म्यान अफ द म्याचको पुरस्कार प्राप्त गर्नेछन् भने प्रतियोगिताको विद्यागत तर्फका उत्कृष्ट खेलाडीलाई समेत आकर्षक पुरस्कार प्रदान गरिने आयोजकले जनाएको छ ।
प्रतियोगितालाई मर्यादित, सभ्य, अनुशासित, निष्पक्ष एवं पारदर्शी ढंगले सञ्चालन गर्न प्रतियोगितामा सहभागी हरेक विद्यालयको टीमको डिजिटल अभिलेख राखिने र उक्त अभिलेखमा विद्यालय टीमको खेलाडीहरुको आवश्यक विवरण समावेश गरिने प्रतियोगिता संयोजक शैलेष पुरीले बताए ।
प्रतियोगितामा जिल्लाका १६ विद्यालय सहभागी हुनेछन् ।
