बाँपीझ्याला, येँ । थन्हु इसाई धर्म मानेकु पिसिन् आपे द्यउ हङ जिसस क्राइस्टय् बुन्हिय् ल्याखान् यक्कु ज्येखँ ग्वयेन् रसतायेन् क्रिसमस मानेतहिन् । धर्मय् खँ लार्नसिन् गुनान् उ लोकय् मिपे लागिन् बाँलकु हो भिंगु ज्ये यतै, दुखसिउ पिस्त ग्वाहार बिरै, मदउ पिस्त हतिइथि येङन् ग्वाहारयतै आम्ततु ल्यउय् ल्याखान् स्वयेन् आमु मन दउत लुवन्के रसतनयेन् ज्ये येरिउरितु धर्मय् थिगुर ख्वाल हङन् सिकेइमल ।
थन्हस अंग्रेजी पे ल्याखान् डिसेम्बर लाय् २५ तारिख खेउँ, थन्हु सोयेन् निस्सरदोल निथिदँ हाखेन इजरायलय् वेथलेहेम हङ ठाइँकु येशु ख्रीष्ट बु खेउँ । इसाई धर्मय् लिखन लिङाउ पिसिन् येशु त परमेश्वरय् थिगु ड्वाक्कु ख्वालय् ल्याखान् सोरहिन् । मिपे जीवन त स्वतन्त्र जुयेन् म्वारिमल म्वात्केइमल, शासकीय दबाबकु च्वइँ मजि हङ सैद्धान्तिक मुलोंकु लिङाइ त लों केङ्गु भिंगु मिय् ल्याखान् येशु त मानेतहिन् ।
उ तु मुलोंकु नेपालदेशय् मिपेनुङ घत्केङ लिखन लिङाउ खोइ दमु । थन्हुय् न्हि त प्रेम, सद्भाव, शान्तिय् लागिन् प्रेरणादायी ख्वालय् ल्याखान् इसाई धर्म मानेकु पिसिन् थन्हुय् न्हि त प्रेम व शान्ति बुन्हिय् ल्याखनुं मानेतहिन् ।
इथि जुये लागिन् नेपाल देशय् सरकार नं सार्वजनिक विदा बियेन् उ बुन्हि मानेरित भिंगु टोङन् बाँलकु सन्देश बियेन् तये सिदमु ।
थन्हुय् न्हि खुन्हु येँ देशय् ठमेल, बानेश्वर, दर्बारमार्गकु दउ ड्वाकु ड्वाकु होटेल दुन्दु क्रसमसय् चिन्ह सिमाकु इतार च्यात्के येशुय् ख्वाल थें थउ म्वग्र त छाइ येङन् मानेङ खोइँदत ।
तर उकु थिता खँरि धर्मय् ल्या मद, येउसेन् येउता भर्म मानेर्सं जिर हङ नेपालय् राज्य सत्तान् मुलों त्वार्त बिर्सं स्वाभिमान दउ नेपालय् दुपानय् धर्म त कित्के आशा हो लोभ केङन् नेपाल देशय् धर्म त ट्वाप्चियेन् मेबे लिखन् लिङाइरि ज्येखँरि भात्चा भिंगु म्वजुयेउरा ?
थउ धर्म व संस्कृति पिपानय् मिपिसन् सोरहिन् रसतारहिन् नाप जुरहिन् तर लिखन् लिमाङाहिन् हात्त रु हात्तहर्स आपिस्त थउ धर्म तु थउ नुगर खेउँ हङ गर्व दमु । गुनेङ आशा हो भरोसा मकाहिन् । तर नेपालकु पिपान रि ड्वाकु फलय् आशा केङन् दुपान् दुपान् थउ स्वार्थ पूरा येकुपिसिन् सिधा सादात म्येथकेरहिन् उ खँकु दोखुसेनुं मिखा चल्केइमल्गु दमु ।
यउता जुर्सं थन्हु थिम्हा मनदउ बाँलकु विचार दउ आत्माय् बुन्हि खेउँ । दोखुसेतं बाँलकु थ्वजु हङन् भिंगु टोङन् य ब्वय् खँ तर्गु ।
