बाँपीझ्याला, काठमाण्डौं । विश्वकप टी-२० एसिया क्षेत्र छनोट अन्तर्गत आज नेपालले ओमानसँग प्रतिस्पर्धा गर्दैछ। यसअघि सिंगापुर र मलेसियालाई पराजित गरेको नेपालले बिहीबार अन्तिम खेल ओमानसँग खेल्न लागेको हो। नेपाल र ओमानबीचको खेल बिहान ९ बजेदेखि कीर्तिपुरस्थित त्रिवि अन्तर्राष्ट्रिय क्रिकेट मैदानमा हुनेछ।
समूह ‘ए’ मा लगातार दुई खेल जितेर सेमिफाइनल पुगिसकेका नेपाल र ओमानबीचको आजको खेलले समूह विजेता को बन्ने भन्ने निर्धारण गर्नेछ।
पहिलो खेलमा सिंगापुरलाई ८ विकेटले पराजित गरेको नेपालले दोस्रो खेलमा मलेसियालाई ६ विकेटले पराजित गरेको थियो। यस्तै ओमानले मलेसियालाई ३२ रन र सिंगापुरलाई २२ रनले पराजित गरेको थियो।
यी दुई खेलसहित बिहीबार समूह चरणका बाँकी चार वटै खेल हुनेछ र त्यसपछि सेमिफाइनल पुग्ने बाँकी दुई टिम र सेमिफाइनल समीकरण पनि टुङ्गो लाग्नेछ ।
समूह ‘बी’ अन्तर्गत यूएई र हङकङबीचको खेल पनि आजै मुलपानी क्रिकेट मैदानमा बिहान ९ बजे सुरु हुनेछ। कुवेत र बहराइनबीच दिउँसो सवा १ बजे मुलपानी मैदानमै अर्को खेल हुनेछ।
