बाँपिझ्याला येँ, नेपाल सम्वत् ११४३ कौलात्वाः द्वितिया तिथि (२०८० अशोज २९) सोमबार । बागमती प्रदेश दुपानये दोखुनु सरकारी ज्येकुठी धुन्दु नेपाल भाषा व तामाङ भाषालान् दोख्ताङ् ज्ये चल्केइरी ल्याखाःकु बागमती प्रदेश सभालान् ‘प्रदेश सरकारी ज्येखँ भाषा ऐन २०८० – प्रदेश सरकारी कामकाजकाजको भाषा ऐन २०८०)’ पारित येङ खँ सिदत ।
उ बाँलकु ज्ये त मन्ननसितु ध्यान बियेन् ज्ये हाखेन हाये ब्यालाकु थन्हु नेवार देशये डोबर (नेदेदबू) व येँ देश दुपानये नेवार खलकपे साझी कुठीपेन् मिलैजुयेन् थन्हु बागमती प्रदेशये मुल मन्त्री भाजु शालिकराम जमरकट्टेल व आम्तु प्रदेशये सभामुख भाजु भुवनकुमार पाठक त नेवार देशये डोबरये कार्यवाहक मुलमि भाजु चन्द्रलाल राजभण्डारीजु न बेटारीन् चियेन् सम्मान येङन्दिर्जु । उ थिगुर नेवार जातियय थिगुर भिन्न पहिचान खेउ ।
कार्यवाहक मुलमि भाजु चन्द्रलाल राजभण्डारीये सभा नाइकेकु जु थन्हुये ज्येखँये मुल पाउना मि नेपालभाष मंकाः खलये मुलमि आले नेवारी साहित्य खेन्नये जनकवि भाजु दुर्गालाल श्रेष्ठ जु दउजु । विशेष मानेरीमल्गु पाउनामिकु बागमती प्रदेशये मुख्य मन्त्री शालिकराम जमरकट्टेल, आम्तु प्रदेश सभामुख भुवन पाठक जु दउजु । आन्थितु विशेष पाउनामि बागमती प्रदेश सरकारये मन्त्रीपेन संस्कृति, पर्यटन व सहकारी मन्त्री पुकार महर्जन, आन्तरिक मामला व कानुन मन्त्री गंगानारायण श्रेष्ठ, कृषि व पशुपंक्षी विकास मन्त्री प्रा. राजेन्द्रमान श्रेष्ठ, नेवार देशये डोबरये संरक्षक मल्ल के. सुन्दर जु दउजु ।
आन्थितु पाउनामिकु नेवार देशये डोबरये सल्लाहकार व संघीय सांसद कृष्णगोपाल श्रेष्ठ, सल्लाहकार आले हाखेनय महान्याधिवक्ता मुक्ति नारायण प्रधान नाप नापं झिम्च्याम्हा बागमती प्रदेशसमाये ज्येकुमि (दुज)पेन् व नेदेदबूये सल्लाहकारपेन् दउजु ।
थन्हुये ज्येखँकु नेपाल देशये राष्ट्रिय म्ये, नेवारपे राष्ट्रिय म्ये व नेवारपे साझी म्ये हलि धोनकेयेन्लि नेदेदबूये हाबिये पुरान सल्लाहकार नरेन्द्रभक्त हाडान् दोख्सेतं लसकुस खँ न्वन्हायेन्लि बागमती प्रदेश दुपान दउ दोखुनु सरकारी ज्येकुठीकु नेवार भाषा व तामाङ भाषालान् ज्येखँ चल्केइत ऐनतु दके पारित येङन् बिइत घत्केङ् ज्ये येङन् प्रदेशसभालान् हिल्केईय लागिन् मुख्य मन्त्री त व सभामुख त सुभाय (धन्यवाद) बियेन् नेदेदबूये संरक्षक मल्ल के. सुन्दर न थउ खँ तये दउजु ।
आमु खँये ल्याखाःकु उ ज्येखँ पारित वा जुर वये नापनाप थउ मुलं भाषा त फाइलकु जुकुन् माथाके मदिके गुलिफरै आम्ली चाँडतु ज्ये पितकायेन् छ्याल्केइत बागमती प्रदेश न भिंगु पहल येरि लाहा ल्वाप्ठोयेङ् हङ थउके विश्वास दमु हत्चु ।
मुल पाउनामि जनकवि दुर्गालाल श्रेष्ठन् थन्हु मुख्यमन्त्री थउ बार्मुन जुर्सं नेवारपे मूल खँ लाकेउ नेपालभाषा व तामाङभाषालान् सरकारी ज्येखँ छ्याल्केइत ऐनतु दकेइ धोङ खँ तार्न व थउ हाखेनतु ख्वन्न घत्केङ् रसताये खँ तये दउजु । बागमती प्रदेशये सभामुख भुवनकुमार पाठकन मन्त्रालय व सांसदपिसिन् बागमती प्रदेश दुपान लकु भाषा, संस्कृति सम्पदाये लागिन् जाउमदियेन् ज्ये येङन् च्वङ खँ तयेन् थन्हु थउन नापलङ सम्मान त कदर येङन् चाडङ् ज्ये पिचल्केइत हाखेन लिङाइ हङन् वचन बिर्जु ।
आन्थितु विशेष पाउनामि बागमती प्रदेशये मुख्य मन्त्री शालिकराम जमरकट्टेल न थउ बार्मुन जुर्सं दोखुनुं जातिपे नाप च्वङन् देश व देशये मिपे लागिन् भिंगु ज्येखँकु टुटि पाराक ल्येइ दर्न थउ मन घत्केङ् खुसी चाये खँ तये दउजु । उ तु खँये ल्याखाकु मन्त्री जमरकट्टेल्न आउ ऐन जुकुन् सुम्मके म्वच्वन्गु खुला (६महिना) दुपान ज्येतु ग्वयेन् चल्केइरि थउ ड्वाकु मन बुयेन् च्वङ खँ दमु हङन दोखुसेत सिके दिरहिन् ।
