हाबिये घत्केङ् नाम जायेन् च्वंगु मूल प्याखनमि (नायक) सरोज खनाल थउतु मूल प्याखन नाइके जुयेन् म्येथयेन् च्वङ सोङ्गुकिपा बगान न झिन्हु चल्यात्न न्हैदोलटाका ढ्याबा कम्याङ खँ पित येउ दमु । नकिन् करिश्मा मानन्धर व प्रमिला कार्की मिसामी प्याखन् मुचा जुयेन् म्येथये उ सोङ्गुकिपा आउ थन्केसि निस् हप्ताकु चलैजुयेन् च्वन ।
ए सोङ्गु किपाकु सरोज खनाल ‘विजय’ नामये ओन्सामीये पाठ कायेन् मेथये दमु हर्स नकिन करिश्मा मानन्धर न याकर मिसामी (कैमु मदइधोङ्गु) ‘आकांक्षा’ नामये पाठ कायेन् मेथउ दमु । आले आकांक्षये मिच (‘प्राप्ति’) जुयेन् प्रमिला कार्की मेथउ दमु । आकांक्षाये कैमु थउन थउततु स्याङन् (आत्महत्या) मदयेन्लि मिच त घत्केङ् दुुःख सियेन् लहियेन् च्वंगु दमु ।
आकांक्षा आखर सिउताउ जुइत व थउ टुटिकु थउतु डोइँ फकेइत आखर ब्वइँतु मल्गुजिन हङन् ब्वन्द उइम्वालै । तर आमे छेँये जाहानपिसिन् कैमु मदउ मिसामीन् ब्वङ ज्ये मद हङन् ब्वन्द उइँ मबित मुल प्वङन् बिरै आन्थिनुं आकांक्षान् गुनेङ् खँ मङेङन् ब्वइँत बल पित कारै । आमे मिच त स्वउ मदये कारण्न ठाकयेन् च्वङ ब्यालाकु हाबि हाबिये नाम जायेन् च्वंगु ड्वाकुन्दांगु प्याखनमिसामी (अभिनेत्री) मिथिला शर्मान् मिच लहित ग्वाहार बिरै ।
उ प्याखनकु याकरमिसामी (लाँडी मिसा)न् थउ न मन्न टोङ ज्येखँ येरि त ट्वाल समाज न मदउ मदउ खँ डायेन्, नामन्ते खँ लायेन् लोँ प्वङन् उइँ मबिउ त थउ न बल पिताकायेन् नेये टुटिन् चुयेन् हाखेन लिङाइ सइफइ मल हङ सन्देश बियेन् तरै । उकु आमुतु मुल लियेन् आखर ब्वइ धोन्केयेन्लि जागिर नइल्दन हङन् म्वालेन् लिङार्नसिन् विजय (सरोज खनाल त नापलतै । विजयन् आकांक्षाये ब्वङपति व खँ ख्वन्न थउ नथेँ मेबु मिसामीपिस्तं बल दके पुरान् रुढिवादी समाज त हिल्केइ त आँट काउ मिसामी ख्वङन्ली विजयन् थउ नापतु जागिर नकेइत ग्वाहार बिरै । आँकुलान्ली निस्माङ् बाँलकु साङत जुयेन् पितयेरहिन् । इथि साङत जुयेन् नाप ज्ये येत्न येत्न थिम्हान् निस्म्हात थउ मन लाछायेन् मन पर्यातहिन् ।
थउ मा बा मदयेन् याकर्चा थिनागु मन्न चायेनुं घत्केङ् दुःख सियेन् थउतं ब्वन्के थउङ् ब्वङन् मेबु मिसामीपिस्त बाँलकु मुलकु येइँत बेस्न दुःख सियेन् च्वङ ख्वङन् च्वंगु मिच प्राप्तिन् विजय त नुगर दुपानन्लान्नसि मन पर्याङन् च्वङ खँ सियेन्ली आमु विजय नाप तु माउरीये ब्याहा येङन् बिइत मुल म्वालि लगैजुर । उ खँकु प्राप्तितं समाजये मुल हत्तर्काइत घत्केङ् संघर्ष येरिमल्दन । लिबि यथे येङन् जुर्सं माउरी ब्याहा येङन् बिइउरी लक्ष्यकु थ्येङ्गु ख्वइँ दमु ।
ओन्सामीये हैकमकु च्वइँमल्गु उ समाजये लाङाकु कालत (मिसा) सित हर्सरी दाँछीङ् म्वधोन्के मेबु कालत दुत हाइज्यु हँ, कैमु सित हर्सरी दँ म्वमोउ ल्यासिमिसा जुर्सं ट्वाल समाज न हातिं हरेउरा हङन् ग्याङन् च्वइँमल्गु आले कय मिचये ख्वाल स्वयेन् थउ मन्कु दउ इच्छा त सुलेन् उर् उर् प्वङन् ख्वयेन् च्वइँ मल्गु, थउ साङतपे नाप ङिलेन् खँ लाइत टुल्के जउखउ स्वयेन् च्वइँ मल्गु मिसामीपे बाध्यता त टप्छ्यारी मल हङ सन्देश उ सोङ्गु किपाकु ख्वइँदमु ।
आउ थन्केसि नेपाल देशये समाजकुङ् घसान् घसान् हाबिये खँ पेन् त्वार्त मा मदउत जुर्सं बा मदउत जुर्सं कयमिच पिसिन्तु समाजये खँ त लिखन् तयेन् ब्याहा येङन् बिइउरी चलन पित ययेन् च्वंगु ख्वइँदमु ।
यिनागु तु खँये ल्याखाःकु रविना देशराज, श्वेता खड्का, आरती श्रेष्ठन् समाजेये ल्याखाः त हिले ख्वइँ दमु । गु मिसामीपिसिन् कैमु मदयेन्ली मेबु ओन्सामीनाप ब्याहा येङन् हाबिये रुढिवादी त प्यङ्के छ्वयेन् न्हुलु चलन पित काये ख्वइँदमु । हो, इथि येरिमल हङ बाँलकु सन्देश स्वाकटाकेये उ सोङ्गुकिपा बगान थेँतु छीजि नेपाल देशये समाजकु थिर जुइत वा ठाकइ फरै आन्थिनुं थिगुर बाँलकु मुल क्येइँत हर्स ज्ये बिये ख्वइँदमु ।
उ सोङ्गुकिपाकु निर्देशन येरि त लाहा तउ सरोज खनाल न मिसामीये दुपानये नुगरकु थायेन् च्वंगु गु खँरी मुथुलान् पितकाइ हत्नसिनुं काँठालान् पित मायायेन् च्वंगु त पितकाइत येक्कु बल बिये ख्वइँदमु । वये नापनापं सरोज न उ किपाकु छीजि गाउँठाइँये लाङा फरकु छ्यालेन्च्वङ उखानपिस्त छ्याङन् खँ लाइत कत दकेये ख्वइँदमु, गिथिकि,..‘लुङा टप्छ्यात्न चुलाङ् टप्ज्यारिफरै,’ थेँ तु ‘वा येर्न कुइ त मदौ मिसा व थउत दुःख जुर्न नाप म्वच्वङ्गु मिसा’ ये हातिं अर्थ मद हङ थिनागु खँलाङा उ सोङ्गु किपाकु हत्केये दमु ।
उ सोङ्गुकिपाकु मुचाब्यालाकु ब्याहा येरिमटे, येङन् बिइङ् मटे हङ सँदेश त्वार्तये दम । मिसामी मुचान् आखर ब्वङ ज्ये मद, मेबे छेँ उइँ मल्गु वा खेङ्ले हङ थिनागु हाबिये खँपेन् पित कायेङ् ख्वइँदमु । मिये जुनीकु ओन्सा व मिसा निस्म्हान् निस्महाये नुगरये खँ थुयेन् ख्वइङिली नाप नापतु जुइमल भरसक गुन्तङ् म्वख्वके ङिल्के तर्स जियेउ हङ खँ उ सोङ्गु किपाकु सोइताइ दमु ल्येङ्गु खँ प्याखन् स्वयेन् थुकेइलौ ।
