९ बैशाख, बाँपीझ्याला, काठमाण्डौं । प्रिमियर लिगको शीर्ष स्थानमा रहेको आर्सनलले शुक्रबार राति रेलिगेसन जोनमा रहेको साउथह्याम्पटनसँग बराबरी खेलेपछि उपाधि होडमा धक्का लागेको छ ।
साउथह्याम्पटनलाई हराउँदै दोस्रो स्थानको म्यानचेष्टर सिटीमाथि ७ अंकको अग्रता बनाउने अवसर थियो । तर घरेलु मैदान एमिरेट्स स्टेडियममा आर्सनलले अन्तिम दुई मिनेटमा दुई गोल गर्दै साउथह्याम्पटनसँग ३-३ गोलको बराबरी खेल्यो । घरेलु मैदानमा आर्सनलले दुई पटक पछि परेको अवस्थामा उत्कृष्ट पुनरागमन गर्द मुस्किलले हार टार्यो ।
कार्लोस् जोनास अल्कारेसले पहिलो मिनेटमै गोल गर्दै साउथह्याम्पटनलाई अग्रता दिलाएका थिए । १४औं मिनेटमा आर्सनलका पूर्व खेलाडी थिओ वाल्कोटले अल्कारेजकै पासमा गोल गर्दै साउथह्याम्पटनको अग्रता दोब्बर पारे ।
२०औं मिनेटमा आर्सनलका गाब्रिएल मार्टिनेलीले गोल गर्द लण्डन क्लबलाई खेलमा फर्काउन खोजेका थिए ।
६६औं मिनेटमा कालेटा कारले गोल गरेपछि साउथह्यानम्पटनले ३-१ को अग्रता बनायो र आर्सनललाई स्तब्त्र बनाउने संकेत देखाएको थियो । तर आर्सनलले अन्तिम समयमा दुई गोल फर्कायो ।
कप्तान मार्टिन ओडेगार्डले ८८औं मिनेटमा गोल गर्दै खेल ३-२ को स्थितिमा ल्याए । त्यसपछि बुकायो साकाले इन्जुरी टाइमको पहिलो मिनेटमा गोल गरेपछि खेल ३-३ को बराबरीमा सकियो ।
बराबरीपछि लि लिडर आर्सनल र दोस्रो स्थानको सिटीबीच अंक दूरी ५ मात्र छ । सिटीले आर्सनल भन्दा २ खेल नै कम खेलेको छ । जसले गर्दा आर्सनलको लगातारको बराबरीले सिटीलाई फाइदा पुगेको छ ।
अर्कोतर्फ अब आर्सनलको अर्को खेल नै सिटीसँग सिटीको मैदानमा छ । यो खेलले धेरै हदसम्म उपाधि होडलाई निर्णायक बनाउन सक्छ । आर्सनलले सिटीलाई हराउन सके ८ अंकको अग्रता बनाउन सक्नेछ । सिटीले पराजित गरेमा भने उपाधि होड रोमाञ्चक बन्नेछ ।
साउथह्याम्पटन भने ३२ खेलबाट २४ अंकसहित पुछारमै छ ।
