बाँपीझ्याला, काठमाण्डौं । सैफ अली खान र अमृता सिंहकी छोरी सारा अली खान ठूलो हिट फिल्मको खोजीमा छिन् । साराले आफ्ना हरेक फिल्ममा कडा मेहनत गरे पनि उनका केही फिल्म सफल हुन सकेनन् । यसका विभिन्न कारण हुन सक्छन् तर साराका लागि यो निकै पीडादायी छ ।
एक अन्तर्वार्तामा साराले आफ्नो फिल्मले काम नगरेको कुरा गरेकी छन् । अभिनेत्री सारा अली खानले पछिल्ला केही फिल्म ‘लभ आज कल’, ‘कुली नम्बर १’, ‘अतरंगी रे’बाट धेरै आशा राखेकी थिइन् तर यी फिल्मले बक्स अफिसमा खासै कमाई गर्न सकेनन् । तर, यी तीनै फिल्मबाट साराले राम्रो प्रतिक्रियाको अपेक्षा गरिरहेकी छिन् ।
आफ्नो फिल्म ‘कुली नम्बर १’ को बारेमा कुरा गर्दै सारा अली खानले पूरै मसाला फिल्म भए पनि सफल नभएको बताइन् । नायिकाले भनिन्, ‘राम्रा गीत, रंग र रमाइलोले भरिपूर्ण मनोरञ्जनात्मक फिल्म राम्रो हुन्छ भन्ने सोचेको थिएँ तर त्यस्तो भएन ।
त्यस्तै सारा अली खान आगामी फिल्म ‘ग्यासलाइट’मा कार्तिक आर्यनको अपोजिटमा देखिने भएकी छिन् । यो जोडीले सन् २०२० मा फिल्म ‘लभ आज कल’मा सँगै काम गरेका थिए । ‘ग्यासलाइट’ डिज्नी प्लस हटस्टारमा मार्च ३१ मा रिलिज हुँदैछ ।
सारा अली खानको वर्कफ्रन्टको कुरा गर्ने हो भने धेरै फिल्म रिलिज हुँदैछन् । ‘ग्यासलाइट’ बाहेक उनी अनुराग बसुको ‘मेट्रो इन दिन’, करण जोहरको ‘ए वतन मेरे वतन’ गरिरहेकी छिन् ।
सारा अली खान विक्की कौशलको अपोजिटमा लक्ष्मण उत्रेकरको अनटाइटल्ड फिल्ममा पनि देखिनेछिन् र होमी अदजानियाको फिल्म पनि पाइपलाइनमा छ ।
