चिनाखँ
गजाःगु न्हि जुल थौं
गजाःगु ई वल थौं
मंमदु जि तापाये छलिसे
अय्नं
तापाना बिल छ जिलिसे ।
द्यःया नां गुलि काये जिं
छन्त हे फ्वना गुलि जिं
नुगः हिलेधुंकूम्ह छ
अय्नं
आश जिगु लिहां वइ ला छ ।
जिगु मिखाया ख्वबि गुबलें मखन छं
स्याःचाः नुगस्या दुघाः गुबलें मखन छं
नये त्वने मयल जि म्ह गना वनाच्वन
अय्नं
जितः ल्वःमंकाः मस्तिया
जिन्दगी दुबिना च्वन छ ।
जिन्दगीया पासा जुइभनं
बचं बिल छं
ल्हाः ज्वनाः वनाच्वनाम्ह जि,
लँ दथुइ त्वःतावन छं
धुँतय् दथुइ चलाया आत्मसमर्पण थें जुल जि
अय्नं
गुबलें गुबलें जिगु ल्हाः
ज्वं वै थें वै थें छं ।
नुगः हिमही चाल जि,
न्हिलासू नं गन तन तन
वंम्ह मनू छ लिहां वै मखुत
हूलमूलय् छ तनावन
सागरया सि थे च्वना
पियाच्वंम्ह मनू थें जि जुल
अय्नं
म्वायेगु लिधंसाय् थ्व मिखां
छंगु हे लँपु स्वयाच्वन ।
पुखूया लखय् दुबिना च्वंगु छंगु किचः
अर्गचा वान्छ्वयाः तनावं थें
अथें अथें छ तनावन
पुखूया लखय् दुबिना च्वंगु छंगु किचः
अर्गचा वान्छ्वयाः तनावं थें
अथें अथें छ तनावन ।
रिता महर्जन
