Search

रत्न राज्यलक्ष्मी (आर.आर) क्याम्पसय् नेपालभाषा स्नातकोत्तर एम.ए. तहलय् ब्वंकेज्या यायेमाःगु माग तया ब्वमिपिन्सं ज्ञापन पौ

रत्न राज्यलक्ष्मी (आर.आर) क्याम्पसय् नेपालभाषा स्नातकोत्तर एम.ए. तहलय् ब्वंकेज्या यायेमाःगु माग तया ब्वमिपिन्सं ज्ञापन पौ

बाँपीझ्याला, येँ । येँय् च्वंगु भृकुटी मण्डप प्रदर्शनी मार्गया रत्न राज्यलक्ष्मी (आर.आर) क्याम्पसय् नेपालभाषा स्नातकोत्तर एम.ए. तहलय् ब्वंकेज्या यायेमाःगु माग तया ब्वमिपिन्सं ज्ञापन पौ लःल्हागु दु।

नेवाः विद्यार्थी युनियनया नायो रीदेन महर्जन, मूछयाञ्जे प्रशान्त डंगोल, सुरोज तन्दुकार, सुनिल महर्जन व नेवाः अभियन्ता विद्या श्रेष्ठं मांभाय् ह्यःमिपिं ब्वनामिपिनिगु पहलय् क्याम्पस प्रमुख प्रा. डा. जीवनधर ज्ञवालीलिसें त्रिभुवन विश्वविद्यालय डिन कार्यालय, मानविकी विभागयात मंकाः कथं विहिबाः ज्ञापन पौ लःल्हाःगु दु ।

उगु ज्ञापन पतिइ नेपाःया संविधान २०७२ या प्रस्तावनाय् बहुजातीय, बहुभाषिक, बहुसांस्कृतिक विविधता दथुइ एकता, सामाजिक सांस्कृतिक ऐक्यबद्धता, सहिष्णुता व सदभावयात संरक्षण एवं प्रवर्द्धन यासें जातीय, भाषिक विभेद अन्त्य यानाः सामाजिक न्याय सुनिश्चित यायेत समानुपातिक, समावेशी व सहभागितामुलक सिद्धान्तया लिधंसाय् समतामुलक समाजया निर्माण यायेगु न्ह्यथनातःगु दु।

अथेहे उगु संविधानया भाग ३ य् मौलिक हक व कर्तव्यया धारा ३१ दुने शिक्षा सम्बन्धी हकया ५ य् नेपालय् बसोबास याइपिं प्रत्येक नेपाःमि समुदाययात कानून बमोजिम थःगु मातृभाषाय् शिक्षा कायेदइगु हक दैगु व धारा ३२ य् भाषा व संस्कृतिया हकया १ स प्रत्येक व्यक्ति व समुदाययात थःगु भाय् छयलेदैगु हक दैगु ३ स नेपालय् बसोबास याइपिं प्रत्येक नेपाली समुदाययात थःगु भाषा, लिपि, संस्कृति, सांस्कृतिक सभ्यताया सम्बर्द्धन प्रवर्द्धन व संरक्षण यायेगु दुगु न्ह्यथनातःगु दु ।

उगु परिप्रेक्षय्, थुगु क्याम्पसय् स्नातक तहलय् नेपालभाषा विषयया पठनपाठन याकेगु व्यवस्था तःदँ न्ह्यःनिसें जुयाच्वंगु खः । छुं दँ न्ह्यः थुगु विषयया पठनपाठन मजूसां नं आः हानं बि.ए. न्हापांगु दँ, निगुगू दँ व स्वंगुगू दँया कक्षा जुयाच्वंगुलि क्याम्पस प्रशासन व त्रिविवियात दुनुगलंनिसें इनाप यानाः च्वना धकाः धाःगु दु ।

नेपालभाषाया लिखत परम्परा थौसिबें ११०० दँ न्ह्यःनिसें न्ह्याःगु खः । नेपाःया सामाजिक व सांस्कृतिक सभ्यताया अध्ययन यायेत थुकिया विशेष महत्व दु । नेपालभाषा व नेपाललिपिइ लिखित १००० दँ अभिलेखत थौंकन्हय् देय् दुने पिनेया थीथी ततःधंगु अभिलेखालय, सफूकुथि व देय् दुनेया बहाः बही व जनसुमदायया धुकुतित संरक्षित जूगु दु ।

थुगु नेपालभाषा विषयया अध्ययन अध्यापनया निति त्रिविया मानविकी विभाग डिन ज्याकुथिं २०३० या दसकनिसें स्नाकोत्तर एम.ए.या व्यवस्था यानाः केन्द्रिय नेपालभाषा विभागया पलिस्था यानाः पाटनध्वाखाय् संचालन जुयाच्वंगु दु । थौंकन्हय् थन स्नातकोत्तर व विधाविारिधी एम.ए. व पिएचडी यायेगु व्यवस्था दु ।

थुगु नेपालभाषा विषयया अध्ययन यायेगु नुगः क्वसाःपिं आपालं ब्वनामिपिं उगु थासय् तापाःगु हुनिं पाय्छि मजुगुलिं अध्यापनया ई तकं अनुकूल मजुनि । अथे जुगुलिं रत्न राज्यलक्ष्मी क्याम्पस येँय् एम.ए. कक्षा संचालन यायेत इनाप यानागु खँ ज्ञापन पतिइ न्ह्यथनातःगु दु । ज्ञापन पतिइ छु ई न्ह्यः २०७७।१०।११ गते तकं पौ च्वया इनाप यानागु खँ न्ह्यथनातःगु दु ।

थुगु विषयलय् क्याम्पस प्रशासनं झिम्ह ब्वनामिपिन्सं अध्ययन यायेत नुगः क्वसायेकल धाःसा उगु व्यवस्था यानाः बिइगु बचं ब्यूगु दु । थ्वहे कथं नेपालभाषा विषय अध्ययन यायेत नुगः क्वासाःपिं ब्वनामिपिं माःगु कथं ल्याः पुवंगु न्ह्यथंसां नं थौं तक्क थुगु खँय् माःगु पलाः छ्यूगु खनेमदु ।

थौंकन्हय् थुगु विषय अध्ययन यायेत नुगः क्वसायेकूपिं ब्वनामिपिं थ्यंमथ्यं २० म्ह ब्वनामिपिं व वसिबें अप्वः दइगु खनेदु । उकिसं थ्वहे शैक्षिक सत्रनिसें उगु विषयया अध्यापन याकेत इनाप याःगु दु ।

रत्न राज्यलक्ष्मी क्याम्पसय् उगु नेपालभाषा कक्षा सनिलय् जुइगु जानकारी ब्यूगु दु ।

Written by 

Related posts

Leave a Comment

error: Content is protected !!