२६ बैशाख, बाँपीझ्याला, काठमाण्डौं । कोरोना संक्रमण तिब्र बनेपछि बेलायतले नेपाललाई ‘रेडजोन’ मा राखेको छ । कोभिड–१९ को नयाँ भेरिएन्ट फैलिएको भन्दै बेलायतले नेपाललाइ ‘रेडजोन’मा राखेर नेपालबाट हुने सम्पूर्ण यात्रालाई आगामी सातादेखि प्रतिबन्ध लगाउने तयारी गरेको छ ।
विदेशी यात्राका लागि बेलायतले ल्याएको यो नयाँ नियम आगामी मे १७ तारिखदेखि लागु हुनेछ ।
बेलायतका यातायात तथा पारवहन मन्त्रालयका सचिव ग्रान्ट सेपल लन्डनमा आयोजित पत्रकार सम्मेलनमा नेपाल, टर्की र माल्दिभ्सलाई रेडजोनमा राखिएको घोषणा गर्नुभयो ।
यात्रा प्रतिवन्ध बेलायती नागरिक बाहेक अन्य मुलुकका नागरिकमा लागू हुने जनाइएको छ ।
रेड जोनमा राखिएका मुलुकबाट आउने आइरिस र बेलायती नागरिकले चाहिँ सरकारले तोकेका क्वारेन्टिनमा १० दिन अनिवार्य बस्नुपर्ने भएको छ ।
यातायात मन्त्रालयले जारी गरेको ट्राभल नियममा हरियो सूचीमा परेका देशका नागरिकले आफ्नो देशमा फर्कँदा क्वारेन्टिनमा बस्नु नपर्ने प्रावधान राखिएको छ ।
