दर्जा !

दर्जा !

बालकृष्ण श्रेष्ठ “पासा”
मनू धयाम्ह छम्ह प्राणी ख:,
मनुखं दयेका हयेगु ख: दर्जा,
दर्जा जन्मजात वइगु मखु,
दर्जा धइगु ला छगू सिरपाः ख:
मनूतय्‌सं दर्जाया सम्मान यायेमा:गु ख:,
दर्जा स्वयाः त:धंम्ह ला स्वभाव जुयेमा:गु ख:,
दर्जा नाप लाताकिं सर्गतय् हे थ्यन ला थें जुइगु छाय् !?
मनू ला मनू हे ख: नि,
दर्जा ला थःपिसं दयेकेगु ख:
क्षमता, ज्ञान नं नाप लाइगु ख:,
तर…
दर्जा नाप लात धायेवं मनू इतिमिति कनीगु छाय्,
दर्जापाखें अभिमान क्यनेगु छाय्,
दर्जा नं च्वय् थ्यंकल धायेवं,
क्वय् च्वंपिं मनूतय्‌त अपमान यायेगु छाय्,
दर्जावालातय्‌सं न्ह्याम्हसितं न्ह्याक्व धाःसां जी ला…?
डाक्टरं नर्सतय्‌त ख्याइगु,
नर्सं परिचारिकातय्‌त ख्याइगु,
ईन्सपेक्टरं असईयात हकिगु,
असईंन हवलदारयात ब्व:बीगु छाय्…?
ड्राइभरं खलाँसीयात म्हुतु ल्हाइगु,
खलाँसिं यात्रीयात हकिगु छाय् !
आँखिर दक्वं मनू हे ख:,
मनूया थासय् मनुू हे जुये मा: नि,
आदर यायेमाःपिन्त यायेगु ख:,
सम्मान धायेगु थ:थगु थासय् तयेमा:गु खः,
तर दर्जावालातय्‌सं याइगु व्यवहार,
दर्जावाला नं क्यनीगु ब्यहोरा…
गनं गनं पाय्‌छि मजूगु जुल,
दर्जावाला हे असभ्य जुल धाःसा,
सभ्यता गथे म्वाका तयेगु ख:..
दर्जावालातय्‌सं अभिभारा थुइका च्वने फयेमा:,
थ:गु अधिकार छ्यलेत सयेके मानि,
थ:गु कर्तव्यत पालन याये फयेके मा:गु ख:,
तर… जिगु देसय्च्वंपिं दर्जावालात,
मांया प्वाथं ला पिहां ववं दर्जा ज्वनाव:गु थें याइगु,
थ: नाप नापं ब्वना ह:गु थें याइगु,
लिफ मस्व:सें लाक्वपाक्व धाइगु,
वयकःपिसं थज्या:गु चाइगु कि,
जि थज्याःम्ह स:म्ह न्ववाये फुम्ह सुं हे मदु थें ताइगु,
अले छाय् ल्वापु ख्यापु मजुइगु,
छाय् दर्जाया अपमान मजुइगु,
अय् जुगुलिं…
दर्जायात दर्जायागु थासय् तयेमा:,
दर्जाया अस्तित्व दयेका च्वनेमा:

Written by 

Related posts

Leave a Comment

error: Content is protected !!