थिता रोचक यथार्थः
बाँपीझ्याला, एजेन्सी । ब्याहा हङ जीवनकु थिपुल यरिमल । आमु थिपुल ब्याहा यङन्ली वन्सामी थ्वजु आले मिसामी् ब्याहान्लीय जीवन बाँलस्केइत बल यरि मल ताकि लिबिय जीवनकु हातिङ बाँमलकु व मभिङ्गु मजुयन् थ्यच्वँ हङन् दोखुसेनुङ गिथि यङन् जिर थउ त लगनशील यरि त म्वालहिन् ।
ब्याहा यङन्ली उ जीवनकु नाप च्वँङन् यउता दुःखकष्ट यरिमल्सङ् कैमु कालात निस्माङ हाखेन उइँफै मल, मिसामीन् वन्सामीय दुपानय खँ थुकेइ मल, वन्सामीन् मिसामीय, थिमान् निस्मा त आरोप, दोष, शंका मयङन् टुटी पाराककु ग्वाहार बिउरितु ब्याहान्लीय जीवन बाँलकु जुइरी सफलता खेउँ । उ दुपान निस्माकेङ आत्मीय भावना, विश्वास व माया दैमल, दोखुनु सोयन ड्वाकु निस्मह दातीकु अडई जुउ खँ तु विश्वास खेउ ।
तर थनुकेसि उ समाजकु ब्याहा हङ थिगुर काँठाबरी मेथय् थिनागु खोइँ दयन् ययन् च्वन । ब्याहा यरिस्वयन् हाखेन यङ बाचा कसम तयन् पा फय हङ थिगुर मेथय् प्याखन्कु थिनागु जुयन् वंगु खोइँ दयन् यर । यिनागु कारण न आमु ब्याहा यकु कैमु कालात तु जुकुन् मखे ट्वाल समाज त टुल्के बाँमलकु प्रभाव परैजुर । यिनागु खँकु खोइँ दके वा खोइँ मदके वातावरण नास्जुयन् वंगु थिगुर एजेन्सीन् सर्वेक्षण यङन् थउ खँ पित हायन तरै ।
घत्के थें थनुकेसि पिपान देशये स्वंगु किपापेन स्वयन् आमे नक्कल यरिउरि, कि कालात पिपान देशकु ज्य यरित वंगु थ्वजु या कैमु आपे थउ थउ दातीकु तु दुपानय भावना मिलैमजुयन् फायन् यइरी, साङतपे हाखेन जिङ आपेन् स्वयन् कोत मखे हङन् प्रतिस्पर्धाकु डोइँरी यत्नसिन् थन्केसि पारिवारिक खटपट जुयन् त्वार्त वङ्गुपेनुङ खोइँ दयन् च्वन ।
कैमु पित उइँ दोन्केयन्ली मेबु वन्सामीये लिखन जुयन् थउ मुचापेन् तु त्वार्त वंगु मिसामीङ उ समाजकु मदउ मखे, आन्थि तु वन्सामी पिसिनुङ् थउ कालात पिपान देशकु छोयन् छेंकु मेबु मिसा हायेन कय मिचपिस्त मुलकु त्वार्तउपेनुङ दमु, यिनागु हात्त जुरले हर्स निस्माय दातिकु समझदारी मदयन् जुर, पिपान मेबे खँ न्येङन् शंका यङन् छें दुपान ल्वारिउरि, हातिङ यत्चुरा, ढ्याबा पिपान मेपिस्त बिर्जुरा हङन् मनकु टोइँरी थिनागु चिचा मन यङनुङ बाँलकु जुयन् वंगुङ नास जुयन वंगु दमु ।
छिजि समाजकु वन्सामीपेन तु घत्के बलदउ, दोखुनु सिउ ताउ हङन् हतगु तर थउ पारिवारिक संसार भिंकेईरी रा नासेरिउरी हङ कु मिसामीय नाप ओम्सामीयङ ड्वाक्कु लाहा दमु । उ खं दोखुनु मिसामीय जीवनकु लागु जुयन् च्वन हरिम्वाले मखे कि मिसामी पिसिन् थउ त परैजु खँ ख्वबी हाके क्यनहिन् हर्स, थउ यङ गल्ती सुलित ड्वाक्ड्वाकु सर्न हलेन्तु त्यारी म्वालहिन्, आले आम्लिनुङ् मजिर हर्स थउ माइती वङन् सद्दे जुइ म्वाल्गुपेनुङ् दमु । ब्या यरी दोन्केयन्ली मिसामी वन्सामीय अन्तरङ्ग सम्बन्धकु फायन् वंगुबारे मेबु खँ यिथि हतहिन् एजेन्सीन् ।
ब्याहायङ ताक्कु गुरि म्वग्रये सम्बन्ध ( यौन ) री रसतायन् न्यिलेन, लास्चायेन् हाति तु जु थें यङन् दंगदास जुरहिन् ताकि जिन्दगी हङ तु यिनागु खेङ, मेबु हातिङ मखे हङ थें यतहिन् आले गुबेलाकुङ मुचा बुरहिन् आलेन्ली वन्सामी थउ मिसा (कालात ) खोङन् बातिचा टापायन् वनहिन् थिगुर कारण जिम्मावारी घत्के थपैजुयन् येइरी आले मेबुरि थउ कालातये जिउ त कमजोरी व बामलङन् वंगु ताइरी, उ कारण न वन्सामीपेन् छें दुपानये मिसा त वास्ता मयङन् पिपान पिपान तु अलमलैजुयन् छें लिबात्के यैरि, लित यै दोन्के थउ कालात त बोल बिरि राक क्येँइरी यङनुङ बामलकु खोइँदमु ।
एजेन्सीपे खँ थे मिसामीपे जिउ कु सुत्केरी जुइ दोन्केयन्ली ब्यागल जुयन् वंगु खोइँदर्सङ यौनय ईच्छारी झन् घत्के जुयन् यर, उ तु कारण नङ् ४० दँ ल्यान्लिये मिसामी पिस्त झन् मेबु वन्सामी हाखेन हाति यङन् बाँलकु जुइ हङन् मनकु टोङन् थउ कैमु नाप टापायन् उइँम्वालिन हङन् हतहिन् । ४० दँन्ली मिसामीय जिउकु हार्मोन झन् थात बढैजुर, थउ कैमुन् बातिचा वास्ता मयकु थिनागु चारहिन् मतलब हाबिय थिनागु ज्य खँकु वास्ता मयङन्ली मेबु वन्सामी नाप हाखेन वनहिन् हङन् तरै ।
मिसामी गुनुङ वा वप्तेचा जुर्न तु ब्याहा यङङ् जुइफरै । आमु दँकु यौनय ज्ञान बाँलस्के मथुय कारणनङ् लिबि थुय्न्लि आमु खँकु घत्केङ हाखेन उइँ फरै, थिगुर खँरी वन्सामीन् यउता यङनुङ मिसा मुचापिस्त लहितु मल हङ उ समाजकु चछ्छिङ निच्छिङ् ज्यकु लगैजुर्न, गलैजुयनुङ जुर तनावनं जुइफरै थउ मिसाय दुपानय खँ मथुयनुङ जुइफरै, वन्सामी पिसिन् घत्के सोच मतयनुङ मिसामीपेन् मेबु मुल लिरहिन् हङन् तरै ।
छँें दुपानय मदउ अवस्थानुङ मिसामीपेन् थउ छें स्वयन् बात्चा दउ, बाँलकु, जिउ ड्वाक्कु बात्चा हतिइथि यङन् पिपानय संसार केङ्गु, खर्च यकुपेन् खोन्स छेंय कैमु त झिम्ङाता बहाना दकेङ पिपान मेले लिङारहिन् हङन तरै, तर थउ वन्साहिन् गुलि माया यतै फयन् दकेरै रा मफयन् मदकेउरा हङ बारेकु गुङ गुङ मिसामीन् आम्खेन्न वास्ता मतयन् लिङारहिन् हङन् एजेन्सी पिसिन् क्येङन् तरै ।