बाँपीझ्याला, येँ । नेपाली सोङ्गु किपाये नाम जाउ थिमा मुल मिसामी (नायिका ) वर्षा राउत न मेथयन्दिये थिगुर चिचा स्वंगु किपा ’सावधान’ पितयउ दमु । दिपेन्द्र लामान् च्वयन् थउ तु निर्देशन यङ उ स्वंगु किपाकु ओप्ते ओप्तेचा मुचापिसिन् यङ यौन दुराचारये खँ ल्वाप्ठोङन् तये खोइँदत, उकु थिमा ओप्तेचा मिसा मुचा त थउ नापये मिपिसिन् वा थउ तु नातागोता पिस्न बाँमलकु ज्ये यङन्ली आमु खँ आमु पीडित मिसा मुचान् थउ छेंय् बा मा दाइ तातापिस्त हरि मफयन् मछलेन् सुलेन् तर्न लिबि बामलकु जुयन् पितयउ खँ त क्येङन तरै ।
उ स्वंगु किपाकु वर्षा राउत नापं मयजु काव्या अधिकारी व भाजुपेन् प्रवीण खतिवडा, आर्जेस रेग्मी, अनिता बस्नेत र भूपेन्द्र सिं धामीन् मेथय् उ स्वंगु किपाकु दोखुनु मुचापे अभिभावक पिस्तं चेतना थद हङन् दकेय् खँ निर्देशक भाजु लामान् हङन्दिय् दमु ।
“छिजिन् थउ मुचापिस्त आखर ब्वंकेरगु, बाँलकु खँ ज्ये सेइँ त ज्ञाननुङ् बिरगु आन्थिनु मुचापिस्त बिये घत्केङ् माया व ममताये हाखेन मुचापेन् गु मुलकु लिङायन् च्वन, गिनागु साङतपे नाप हिमचिम यतै गु ठाइँकु वन हङ खँ त आम्लिस्टुल्के वास्ता मयेत्कु, खाली मेबे हाखेन मुचापेन् गिथियङन् बाँलकु जुकेइ हङन् च्वनगु, आले मुचापिसिनुङ् जन बा मान् हङ थें माग पुरा यङन् बिरै हङन् झन् झन् उत्ताउलोपन जुयन् यरहिन्, आमु कारण्न ब्यालाकु तु मुचापे बानी ब्यहोरा त भिंकेइ सकेइमल…“ हङन् भाजु लामान् हङन् दिर्जु ।
झिगुर मिनेटये उ स्वंगु किपा दकेइ त जाङ्मु शेर्पा, फुर्वा याङ्जी शेर्पा व निमा शेर्पान् ढ्याबा तयन्बिये खँ सिदत । उ स्वंगु किपाये बाखन् ब्वङन् स्वर्न तु नुगरकु थिउ भाव खोङन् उकु मेथइत हाखेन यये खेङ हङन् मू मिसा मयजु वर्षा राउत न यिनागु संवेदनशील विषय त दोखुसे हाखेन यङन् केइँमल हङ खँ तयन्दिर्जु ।
शैलेन्द्र ध्वज कार्कीन् किपा खिचेरी ज्ये यङ उ स्वंगु किपा त निमेष श्रेष्ठ भाजु बाखन् मिल्याङ दमु, शेलेश श्रेष्ठ भाजुन् लयचिङन् उतम न्यौपाने भाजुन् सरये नक्शा पितकाये दमु । कपन हङ ठाइँकु थिन्हुन् तु दकेय् उ स्वंगु किपा त दोखुसेनुङ्।रसतायन् स्वये खँ ताइदत, उ स्वंगु किपा दकेउ व मेथउ खलक त उ बाँपीझ्याला तर्फलान् भिंगु टोनगु ।
