Search

१२ वर्षीया नेपाली बालिकाको सामूहिक भारतमा बलात्कारपछि हत्या, शव जबर्जस्ती जलाइयोः प्रहरीमाथि मिलेमतोको आरोप

१२ वर्षीया नेपाली बालिकाको सामूहिक भारतमा बलात्कारपछि हत्या, शव जबर्जस्ती जलाइयोः प्रहरीमाथि मिलेमतोको आरोप

बाँपीझ्याला, एजेन्सी । भारतको बिहारस्थित नेपाली मूलकी १२ वर्षीया बालिकामाथि सामूहिक रुपमा बलात्कारपश्तात् हत्या गरेर जबर्जस्ती शव जलाएको बीबीसी हिन्दीले जानकारी दिएको छ । प्राथमिक अनुसन्धान र एक भाइरल अडियोले यो पूरा घटनामा स्थानीय थानाका थानाध्यक्षको मद्दत रहेको संकेत भेटिन्छ ।

एसपी नविनचन्द्र झाले बीबीसी हिन्दीसँग यसबारे कुरा गरेका छन् । उनले भनेका छन्, ‘जुन अडियो भाइरल भएको छ, त्यसबाट स्पष्ट भइरहेको छ कि थानाध्यक्ष सञ्जिव कुमार रञ्जनले लापरवाही गर्दै आफ्नो कर्तव्यबाट विमुख भएका छन् ।’

के हो घटना ?

बीबीसी हिन्दीका अनुसार नेपालको ५ नम्बर प्रदेशको बर्दिया जिल्लामा पर्ने बारबर्दिया नगरपालिकामा बस्ने सुरेश (परिवर्तित नाम) पछिल्लो एक वर्षदेखि भारतको मोतिहारीमा मजदुरी गर्दै आएका छन् ।

सुरेशका अनुसार यो घटना २१ जनवरीमा घटित भएको बताएका छन् । त्यतिबेला उनी श्रीमती नेपालको आफ्नो गाउँ आएकी थिइन्, सुरेश मजदुरी गर्न गएका थिए र छोरा कुनै कामले बजार गएका थिए ।

पूर्वी चम्पारणको सिकहना, अनुमंडल पदाधिकारीलाई सुरेशले प्राथमिकी दर्ता गराउनका लागि दिएको आवेदन अनुसार बेलुका करिब ४ बजे जब उनका छोरा बजारबाट फिर्ता भए तब उनका घर मालिक सियाराम साहले उनलाई रोके । आवेदनमा उनले भने, ‘तर मेरो छोरा उनीहरुको कुरा नमानिकनै कोठामा जाँदा बहिनीलाई भुइँमा घाइते अवस्थामा लडिरहेको देखे । यो देखेर छोराले मलाई बोलायो । म घर जाँदा छोरी भुइँमा लडिरहेको देखेँ र उनको घाँटीमा रातो दाग पनि देखेँ । मैले छोरीलाई उपचारका लागि स्थानीय चिकित्सक भएठाउँ लिएर गएँ तर कसैले पनि उपचार गरेनन् ।’

सुरेशका अनुसार त्यसपछि थुप्रै मानिसहरु (अभियुक्त) त्यहाँ जम्मा भए र छोरीको शवलाई जलाउन दबाब दिन थाले ।

ऊजुरीमा भनिएको छ, ‘देवेन्द्र कुमार साहले शव चाँडै जलाउन दबाब दिँदै यसो नगरेको खण्डमा म र मेरो छोराको हत्या गरेर नेपालमा फ्याँकिदिने धम्की दिए । त्यसपछि एउटा सादा कागजमा मेरो औंठाछाप पनि लिइयो र राती १२ बजे बलपूर्वक पोखर रोडको सडक किनारामा नुन र चिनी हालेर शव जलाइदिए । बिहान भएलगत्तै मलाई नेपालमा भगाइदिए ।’

घटनाको १२ दिनपछि दर्ता भयो एफआइआर

२१ जनवरीमा भएको यो घटनाको प्राथमिकी २ फेब्रअुरीमा दर्ता गरिएको छ ।

कूल ११ जनालाई अभियुक्त बनाइएको छ जसमध्ये चार अभियुक्त विनय साह, दीपक कुमार साह, रमेश साह, देवेन्द्र कुमार साहमाथि सामूहिक दुष्कर्म र हत्याको आरोप छ । यस्तै सातजना (जसमा घर मालिक सियाराम साह पनि समावेश छन्) माथि शवलाई जबर्जस्ती जलाएर प्रमाण मेट्ने प्रयास गरेको आरोप लागेको छ ।

घटनाको एफआईआर दर्ता भएपछि तीन दिन अघि ५ फेब्रुअरीमा एउटा अडियो भाइरल भयो जसमा २१ जनवरीमा कुंडवा चैनपुरका थानाध्याक्ष संजिव कुमार रञ्जन र एक अभियुक्त रमेश साहबीच कुराकानी भएको छ । यो कुराकानीमा थानाध्यक्ष संजिव कुमारले अभियक्त रमेश साहसँग भनिरहेका छन्, ‘बालिकाको व्यवस्था गरिदेउ र लेखिदेउ कि बालिका चिसोका कारण मरी ।’

एसपी नविनचन्द्र झाले बीबीसी हिन्दीसँगको कुराकानीमा दुई अभियुक्त पक्राउ परेको र अन्य अभियुक्तको गिरफ्तारीका लागि प्रहरी टोली गठन गरिएको जानकारी दिए ।

Written by 

Related posts

Leave a Comment

error: Content is protected !!