भूत ज्यामी

भूत ज्यामी
बाखन ग्वार्मुंगु – श्रेष्ठ सत्य, द्वाल्खा

निकै हाखेनय खँ खेङ । द्वाल्खाकु थिमा बेस्न सिपालु तान्त्रिक दउजु । आमे कय मिचपेन दोखुनुङ सिरि दोंगुजु । आले आमु थउ थिमा सिरि दोंगु कयय मिसानाप चोंगुजु । थउ इरित आमुन थउ मिचत थेंतु माया यकुजु । आम तान्त्रिकय माइछि या पुया वंगु बेस्न ड्वाकु बुँ दउजु । आमु बँुकु या पिइत, तुचिइत आले या डाइत निस्मा कुबा इरित निकै ठाकयन वङन चोंगुजु । हात्त हर्स तान्त्रिकत बुढेसकालन थि दोंगुजु हर्स इरिउरिङ पहिलाय थे ज्य यरी मफउजु । लाटा खायन आमु बँुकु या पिइत नेय बजि यालित थेंतु ठाकयन चोंगुजु ।

तान्त्रिकनाप निकै बाँलकु तान्त्रिक विद्या दउजु । गुनुङ मफउ मिपिस्त देउ, भूत, पिरेत, वायु, बुडेनी, सिरी दोंगु मिपिस्तङ यउता लगै जुर्सङ आमुन गर्सिनुङ लाके बिउजु । आमुन् देउ, भूत, मसानपे नापङ खँलाय सउजु हर्स, छिजिन् मिखान् खोंइँ मदउ आत्मा, पिचासपेनुङ आमुन् खोंगुजु ।

साउन मास दोंइ टेंगुजु । दोखुसेय बुँकु या पिइ दोंकेङ वङके सप्रै जुइ दोंगुजु । विचरा तान्त्रिकय बँु री अझङ बाँझो तु चोंगुजु । थउ कुबा इरित नइत तोंइत मफउ मिपे उपचार यङन यउ अन्न, ढ्याबा पिसिन मजान् गर्सङ घट्टसिलान् नित्यङ थउ बाँझो बँु खोङन्ली तान्त्रिकत नुगर डायन चियन चियन खोइ यउजु । थउ बुँ इथि दोखुसेय बँुपे दात्तिकु सोइतङ मोछुत्के बाँझो तइ सोयन आमुन् थउ सय तान्त्रिक विद्याय प्रयोग यङन बाँझो बुँकु या पिइरि निधो यत्चु ।
केसीखुनु तान्त्रिकन सुन्नितु डोङन इरिउरित हत्चु– “थनु बल्नी जिन छिजी बुकु या पिइत जेमीपेन हङन तरगि छिन् ङैमातेक जेमीपे लागिन निजा दके बिउ ”


“गिबिलान् नाप्लत्कु आले आम्ली थुप्रो जेमीपेन ?” इरिउरिन् अचम्म मानइजुयन ङेन्जु ।
“यउता यङनुङ जिन नाप्लत्की, छिन निजा ठिक्क यङन तउ बल्नी टुल्के ।”
उली हङन तान्त्रिक डिन्द वन ।


तान्त्रिक निच्छी डिङन निबार डुइँन्ली सन्ध्यालताक्कु डोङन् इरिउरिन् बुत्के तय निजा बुयन “जि केसी सुन्नी जुकुन यइ, बाँलस्के लुखाझ्यालापेन टियन डिं ।” हङन बुँ खेन्न लिङार । इरिउरि हातिङ हरी मफयन छक्क परै जुर ।


केसी खुनु नास्चातु तान्त्रिक ठाकके बुँलान् छें यर । इरिउरित “थनुङ ङैमातेक त निजा दके तउन बल्नी टुल्के, थनु बल्नी दोयङ ज्यउ ।” हङन थउ डिन ।


इरिउरि अचम्म मानै जुयन निबार लुय कत्न घटसि वङन थउ बुँ खेन्न सोर्नसिन वा सत्नानुतु थउ बच्छीसोयनुङ गत्के बुँकु या पि दोंके तउजु । इरिउरित माङस रा सत हङथें लगै जुर । कुबान् हाति यङन उल्ली थुप्रो ठाकउ ज्य यरी फर्जु हङन आमुतङ सोइ यर । आमुन् बल्नी कुबाय लिखन लिखन वङन उ खँ पत्ता ल्याङन तु त्वार्तइरि निधो यत्चु ।


निच्छि इरिउरिन निजा दकेर्जु । सन्ध्यालताक्कु कुबाउरि निजा बुयन बुँ खेन्न लगै जुर । कुबाउरि वङ्गु गर्सि लोङन्नी कुबाउरिन चाइ मदक्के इरिउरिङ कुबाय लिखन लिखन तु बँु खेन्न वन ।
तान्त्रिक थउ बँुकु थेन्नसिन थुप्रो भूत पिरेत, पिचास, मसानपेन ययन आमे बुँकु या पि थालेरि दोंगुजु । तान्त्रिकय ज्य यकु मिपेन हङ उतु भूत पिरेतपेनतु खेङ ।


तान्त्रिकन थउ बँुकु थेन्नसिन बल्नीय नौ दस बजै जुर ज्यउ । तान्त्रिक आँकु थेङन थिगुर मन्त्र बोन्जु । मन्त्र तायकत्न भूत पिरेत मसानपेन फस बोउ थें बोयन तान्त्रिक चोङ्गु ठाइँकु निजा नइत यर्हिन् । तान्त्रिकय बातिचा लिखन आमे इरिउरिङ बँुकु थेंइदोंगुजु तर तान्त्रिकन आम खँ चात्तु माचार्जु । भूतपे नाप चोन्नसिन तान्त्रिकन लिपुलेन सोइ मजिउजु । भूत पिरेत पिसिन इरिउरित खोङ कत्न मेन स्वाद कायन कायन हत्चु – “निजा नइ सोयन हाखेन थपे लिखन चोंगु इसित नइ बिसिन” हत्चु ।
तान्त्रिकन थउ लिखन इरि ययन चोयङ हङन वा गुल्पनुङ सोचै तु मयङजु । आमतु कारणन भूत पे मन हात्त स्यात्केइ हङन, जिर हङन हत्चु ।


तान्त्रिकन जिर हङ कत्न दोखुनुङ भूत पिरेतपे मुथुकु हेंङउ हि खोंइँ दत । आले आपिस्न सात्के हि तोंइँ थालेत्हिन् ।


तान्त्रिकत उपेस्न गुने हि तोन्जु हङन यउताङ थोजु हङन लिखन पुलेन सोर्नसिन वा थउ लिखन थउतु इरि बँुय बोंकु तुलेन सिरी दोंगुजु ।


आमुन्ली तान्त्रिकन राक न थिगुर मन्त्र बोंङन दोखुनुङ भूत पिरेत मसानपिस्त आँकुलान् लिर्जु ।
तान्त्रिकय थउ हङ थिमा इरिउरि सिरि दोंगुजु । आमुन् अनेक यङनुङ इरिउरित म्वात्केइ मफर्जु ।
थउ थिमा इरिङ इथि थउतु मिखा हाखेन थउतु कारणन सिङन्ली तान्त्रिक याकर्चा जुयन बउला थें लिङाइ थालेत्चु । आमुन आमुन्ली गुल्पनुङ तान्त्रक विद्याय प्रयोग मयत्चु ।

Written by 

Related posts

Leave a Comment

error: Content is protected !!